Ezai 63 - Bibeli do fee

Aɔ̃ Lafɛ̃ɛ wa jaa inɛɛ ŋa

¹ Inɛ iyi wa naa hai ilɛi Edɔmu hai si ilu nla iyi à ya kpe Bɔsura nɔ wa dasi jĩnɛ nkpau ihɛ̃, yooi. Lafɛ̃ɛ wa dasi ibɔ nla kusĩaɛ nɔ wa nɛ do gbugbã nla nlaɛ do idɔ ku buba. Nɔ í ni, amui ǹ ya n kiiti do dee dee ku jɛ nɔ ǹ nɛ gbugbãi inɛ ku faaba.

² Na mii í jɔ̀ jĩnɛɛ ŋa à kpã bɛ ihɛ̃. Aa ni bɛi jĩnɛi woo fɔ̃ inyii isoi rezɛ̃ɛi.

³ Amu akãi ǹ ce icɛ bi ku fɔ̃ inyii isoi jĩi nɔu si dangala, nɔ si dimi ŋau fei, inɛ kãma kù wa bi tom. Si idɔɔkɔ̃m nɔu, ǹ jojo si ŋai, nɔ ǹ lɛgɛ ŋa. Ŋɔi njɛ nŋau í fãsi jĩnɛm ŋa. Do yaase bɛɛbɛi ǹ riisiò jĩnɛm ŋau fei.

⁴ Ntɔ ntɔ, ǹ wa n lasabu si ajɔ iyi an jaa inɛm ŋa, nɔ adɔ̃i ku ya nŋaui í to wa bɛ.

⁵ Ŋɔi ǹ sinda ǹ cɔ, nɔ n kù ba inɛ kãma iyi á sobim. Ŋɔi ǹ biti do iyi n kù ba inɛ kãma iyi á muum gbugbã. Do gbugbãm nii ǹ jɛò igũ, nɔ idɔɔkɔ̃m nii í jɛ gbugbãm.

⁶ Ǹ tɛɛsɛ inɛ ŋa si idɔɔkɔ̃m, nɔ ǹ jɔ̀ idɔɔkɔ̃m nɔu í kpa ŋa bɛi atɛ̃, nɔ ǹ dikã njɛ nŋa si ilɛ.

Faajii jiida ku jɛi Aɔ̃ Lafɛ̃ɛ

⁷ An fɔ idei jiida ŋa iyi Aɔ̃ Lafɛ̃ɛ í ce si kubiɛ do kuceɛ ŋa iyi í to saabu, na jiida ŋa iyi í ce nwa fei, do na jiida nla nlaɛ iyi í cea inɛi Izirɛli ŋa, do jiida iyi í ce nŋa na araareɛ do si kubi nlaɛ.

⁸ Nŋu takaɛ í fɔ wo í ni ntɔ ntɔ inɛ ŋau ihɛ̃ inɛi nŋu ŋai, nɔ à jɛ amu ŋa iyi a ci ya sɔ ibo. Nŋui í jɛ woo faaba nŋa.

⁹ Si inɔ kufɔ nŋa fei, kù cica inɛ gɔ ku naa ku sobi ŋa, amma nŋu takaɛi í naa í faaba ŋa si kubiɛ do si araareɛ. Nŋu takaɛi í ya ŋa nɔ wa gbɔ nŋa. Nŋui wa mu ŋa waati kãma fei baa hai tako.

¹⁰ Amma à jɛ woo kɔ̀ ide ŋa nɔ à fɔ inɔi hunde kumáɛ. Na ŋɔi í jɔ̀ í sinda í ce araɛ mbɛɛ nŋa nɔ nŋu takaɛ í lɔsi ku ba ŋa ja.

¹¹ Ŋɔi inɛɛ ŋau à ye gigii faajii waatii Moizi, à waa ni, hee iwoi Ilaaɔ̃ í wa, nŋu iyi í tako í jɔ̀ inɛ ŋa à kua tenkuu bɛi mɛɛmu gaa do woo degbe nŋa. Hee iwoi nŋu iyi í da nŋa si hunde kumáɛu í wa.

¹² Nŋui í sobi Moizi si waatii isɛɛnɛu do gbugbã, nŋui í jɔ̀ inyi í kpɛ̃ si waju nŋa ku ba ku nya iri hee do ajɔ fei,

¹³ nŋui í jɔ̀ à nɛ à waa bɔ do waju hee à kua tenkuu bɛi acĩ iyi wa nɛ si gbaa nɔ a kù waa koosɛ si nkãma.

¹⁴ À yɛi bɛi mɛɛmu iyi wa dasi inɔ fatama nɔ hundei Aɔ̃ Lafɛ̃ɛ í gbã ŋa wa bɔò ŋa bi kusĩmi. Do yaase bɛɛbɛi ì waa gbãò inɛɛ ŋa Aɔ̃ Lafɛ̃ɛ, nɔ iriɛ wa nɛò bɛɛrɛ.

Kutɔɔi faaba

¹⁵ Aɔ̃ Lafɛ̃ɛ, cɔ hai lele bi kuwa kumá ilu bɛɛrɛɛu wa aa yɛ mii iyi wa ba wa. Hee iwoi kubi nla nlaɛ do jiida ku jɛɛu í wa. Hee iwoi araareɛ do kubiɛu í wa. Ì gɛɛ kubiɛu ì kɔ̀ ku nyisi awa zamaaɛ ŋau.

¹⁶ Do nŋu fei, awɔi ì bɛi ì jɛ baa nwa. Aburahamu bala nwau kù mà wa, nɔ Izirɛli kù mà wa. Awɔ Aɔ̃ Lafɛ̃ɛ, awɔi ì jɛ baa nwa. Awɔ, iriɛi í jɛ woo ya nwa baa hai tako hee do nsɛi fei.

¹⁷ Aɔ̃ Lafɛ̃ɛ, na mii í ce ì jɔ̀ à nyɔ à jĩò kpãaɛ ŋa. Na mii í ce ì jɔ̀ à lele idɔ nwa nɔ à kɔ̀ ku mà bɛɛrɛɛ. Sinda i nyi wa na kubii awa woo ce icɛɛ ŋa, na awa dimi ŋa iyi à jɛ inɛɛ ŋa.

¹⁸ Awa zamaa iyi à nya ikã à jɛ titɛɛ, a kù ba a kù buba si ilɛu kù kpɛ, mbɛɛ nwa ŋa à naa à tɛɛsɛ kpasɛ̃ kumáɛu.

¹⁹ Hai ku kpɛ, à yɛi bɛi inɛ ŋa iyi i kù jɛ ilaalu nŋa, inɛ ŋa iyi a kù waa kpe iriɛ si ŋa. Ntɔ ntɔ, bii ì ga lelei Aɔ̃ nɔ ì kita wa wo, iri kuta ŋa aa lɛgɛi si wajuɛ.