Ezai 61 - Bibeli do fee

Woo bɛi Aɔ̃ Lafɛ̃ɛ, icɛɛ do laabaauɛ

¹ Hundei Aɔ̃ Lafɛ̃ɛ í wa sim, domi Aɔ̃ Lafɛ̃ɛi í nyam ikã. Nŋui í bɛm n koo n sisia ilu are ŋa laabaau jiida, inɛ ŋa mɔ iyi à wɛɛò inɔ kufɔ, n tũ idɔ nŋa, nɔ n sɔ̃ aru ŋa n ni à nɛ ara nŋa mbɛ, inɛi piisɔ̃ɔ ŋa mɔ, n sɔ̃ ŋa n ni a fita.

² Nɔ n sɔ̃ inɛ ŋau n ni, si adɔ̃u ihɛ̃i Aɔ̃ Lafɛ̃ɛ á nyisi ŋɛ jiida ku jɛɛ. Nnyiu ihɛ̃i á ja nŋɛ. Nŋui í bɛm wa n naa n tũ idɔi inɛ ŋa iyi à wa si inɔ kufɔi iku fei.

³ Inɔ kufɔi ikui inɛi Siɔ̃ɔ ŋa à wɛɛò, amma icɛ iyi ǹ naa ku cei í jɛ, n kpaasi agbɛ bii inɔ kufɔ nŋa í wau do inɔ didɔ̃ nla nla. Ilúlu iyi í wa si iri nŋau, n nyaa nɔ n we nŋa bɔngɔtɔbɛɛ kusĩa gɔ. An jɔ́ nŋa ikpo si waju nŋa iyi í bɛjɛ na ara kurou. Araare iyi à wɛɛòu, an nyaai nɔ n da nŋa si ibɔi jingau. Waati bɛɛbɛ, aa so ŋai a wãò jĩi nla ŋa iyi à jɔ̀ Aɔ̃ Lafɛ̃ɛ í nɛ bɛɛrɛu do bɛi lambo iyi wa nyisi amboei Aɔ̃ Lafɛ̃ɛ.

⁴ Inɛ ŋa aa teese a ma ilu iyi í tako í cukuui. Aa teese a ma kpasɛ̃ ŋa iyi à cuku ŋaui do ilu ŋa iyi à ce asɔɔ nŋa hai ku kpɛu.

⁵ Inɛ njoo ŋai aa na a maa degbe nŋɛ mɛɛmu gaa nŋɛ ŋau. Inɛi ilɛ mmu ŋa mɔi aa na a maa logoo nŋɛ ilɛ nŋɛ ŋa, nɔ aŋai aa ya maa ce nŋɛ icɛ si ikoi rezɛ̃ɛ nŋɛ ŋau mɔ.

⁶ Amma iŋɛ, woo weei Aɔ̃ Lafɛ̃ɛ ŋai aa ya kpe ŋɛ. Bii à waa fɔ ide nŋɛ, woo ce icɛi Aɔ̃ Lafɛ̃ɛ nwa ŋai aa ya ni. Iŋɛi aa jɛ aranfãanii amanii inɛi ilɛ ŋau ŋa, nɔ iŋɛi aa tɔɔ fufu do amani nŋa ŋau.

⁷ Aɔ̃ Lafɛ̃ɛ í ni, à dasi ŋɛ anyɔ ntɔ ntɔ. Ikpɛ̃ iyi ì ba ŋai í jɛ arabu. Na ŋɔi í jɔ̀ aa ba ikpɛ̃ ikɔ minji ŋa si ilɛ nŋau, nɔ inɔ didɔ̃ nŋɛ á maa wɛɛi hee do ajɔ fei.

⁸ Ntɔ ntɔ, amu Aɔ̃ Lafɛ̃ɛ, asaiyai ǹ bi inɛ ŋa a ya too si. N kù bi laalɔ do a bata inɛ a gba mii ndɛɛ do gbugbã. Nɔ [bii ì waa ce bɛi ǹ dɔ̃u ŋa,] amui an jɔ̀ i ba riba nŋɛ ŋa dee dee nɔ n dĩ akabuu hai nɛ kɔɔ do iŋɛ.

⁹ Inɛi ilɛ ŋa fei aa mà tɔku nŋɛ ŋa. Inɛ ŋa iyi aa yɛ ŋa fei, aa mà iyi à jɛ dimi ŋa iyi à ba kuweei Aɔ̃ Lafɛ̃ɛ.

Iri ku kɔ̃i saabu

¹⁰ Aɔ̃ Lafɛ̃ɛi í jɛ icui inɔ didɔ̃ nla nla bi titom. Aɔ̃ Lafɛ̃ɛm nii í jɔ̀ ǹ wa si ididɔ̃ nla nla, domi faaba iyi í jɔ̀ ǹ ba, í yɛi bɛi ibɔ ŋa iyi í daam si. Í biim nii do ibɔi dee dee ku jɛ bɛi mɔkɔ titɔ̃ iyi í dasi booda kusĩa gɔ si iriɛ bɛi woo wee, do bɛi abo titɔ̃ iyi í ce boodai saba kusĩa ŋa.

¹¹ Ntɔ ntɔ, yaase bɛi ilɛ í ya jɔ̀ ngboi mii iyi à gbɛ̃ ku fita, walakɔ bɛi lambo í ya jɔ̀ mii iyi à gbɛ̃ ku fita, bɛɛbɛ mɔi Aɔ̃ Lafɛ̃ɛ á jɔ̀ dee dee ku jɛ do iri ku kɔ̃i saabu ku fita, nɔ inɛi ilɛ mmu ŋa fei aa yɔɔi.