Ezai 60 - Bibeli do fee

Zeruzalɛmui á jɛaa inɛi andunya ŋa inya kumá

¹ Dede Zeruzalɛmu, má inya, domi inya kumá wa dede na iriɛ. Amboei Aɔ̃ Lafɛ̃ɛ wa máɛ inya bɛi inya kumái inunui daakɔ.

² Ntɔi, ilu kuku í bii andunya, ilu kuku nla nlai í bii inɛ ŋa. Amma Aɔ̃ Lafɛ̃ɛ wa naa siɛ, nɔ siɛi amboeɛu á faata wa.

³ Inɛi andunya ŋa aa nɛ a naa si inya kumáɛu, nɔ inya kumáɛu á fà ilaalu ŋa mɔ wa.

⁴ Wu ijuɛ nɔ i cɔ cingaaɛ bii fei. Aŋa fei à tɔtɔɔ nɔ à waa baa bi tɛɛ. Ama inɛmɔkɔɛ ŋa à waa baa hai jĩijĩ. Inɛ ŋa à so ama inaaboɛ ŋa à waa baaò ŋa wa.

⁵ Waati iyi aa yɔɔ, aa wai si ididɔ̃, nɔ idɔɛ á maa jojo do inɔ didɔ̃. Waati bɛɛbɛ, amani ŋa iyi à wa si tenku aa ko ŋa wai a baaò ŋa wa bi tɛɛ, nɔ amanii inɛi andunya ŋau aa baai hee bi tɛɛ.

⁶ Kpookpo dimi ikã ikãi Madiãa do ti Efaa do ti Saba ŋa fei, aa bii si ilɛɛ wai. Aa maa so wura do tuae ku dɔ̃ inunu wai, nɔ aa kɔ̃ iri a maa saabu Aɔ̃ Lafɛ̃ɛ.

⁷ Mɛɛmu gaai Kedaa ŋau fei sãa sãa, aa tɔtɔɔ wai bi titɛɛ bɛ. Angudã komboi Nebayɔti ŋai aa jɛ ti ku ce wũaɛ. Angudã nŋu ŋai aa ceem do kuwee iyi à ya jo si ina fei sãa sãa si antaii bii à ya ceem kuweeu nɔ á dɔ̃ɔm si. Do yaase bɛɛbɛ, an jɔ̀ kpasɛ̃m ku nɛ bɛɛrɛi nɔ ku maa daana.

⁸ Inɛ ŋau bɛ, yoo ŋai. Aa ni bɛi kudũi ijĩ iyi wa nɛi, walakɔ bɛi ankasiidi ŋa iyi à fo à koo à waa lɔ inɔ ile nŋa.

⁹ Ntɔ ntɔ, sim nii gũngũm ŋa à dasi kpãa ku cɔ nŋa, nɔ akɔi inyii Taasi ŋai à wa do waju ku ba a baaò ama inɛmɔkɔɛ ŋau wa hai jĩijĩ do isɔ fũfũ nŋa do wura nŋa na irii Aɔ̃ Lafɛ̃ɛɛ Inɛ Kumái Izirɛli iyi í jɔ̀ ì nɛ bɛɛrɛu.

¹⁰ Inɛ njoo ŋai aa teese a ma bindiɛ ŋa, nɔ ilaalu nŋa ŋai aa maa ceɛ icɛ. Ntɔ ntɔ, bii si idɔɔkɔ̃m n kpãɛ iju, si didɔ̃m mɔ, an ce araareɛ.

¹¹ Gamboi bindiɛ á maa cĩi waati kãma fei. A kaa ya cĩmboɛ idũ hee má jɛ dasã, ku ba ku jɔ̀ amanii ilɛ mmu ŋa a lɔ wa bi tɛɛ do ilaalu nŋa ŋa hee do inɛi anyi nŋa ŋa fei.

¹² Ilɛ gɔ, walakɔ bomma gɔ iyi í kɔ̀ ku ceɛ icɛ fei, í nɛ ku kpa irii. Ilɛ dimi bɛɛbɛ ŋa aa na a tãi mam mam.

¹³ Amboei Libãa fei, bi titɛɛ bɛi á baa. Jĩi ndii Libãa ŋa iyi à nɛ gbugbã nɔ à sĩa ŋau, fei ndɛɛ á baa bi titɛɛ bɛi ku ba a jɛ boodai kpasɛ̃m nɔu. Do yaase bɛɛbɛi an nyisiò amboei tengi bii ǹ wa.

¹⁴ Inɛ ŋa iyi à wahalaɛ ŋau, aa kɔmba iri ilɛi a maa naaò wa bi tɛɛ. Inɛ ŋa iyi à tako à waa yaakoɛ ŋau fei, aa na a sɛɛbatai si wajuɛ. Nɔ iri ŋa iyi aa maa kpeɛ do wee. Ilui Aɔ̃ Lafɛ̃ɛ, do Siɔ̃ɔ ilu iyi í jɛ ti Inɛ Kumái Izirɛliu.

¹⁵ Wee à tako à fũsiɛ awɔ wo, a kù bi ideɛ nɔ inɛ kãma ci ya naa bi tɛɛ. Amma an jɔ̀ i baa i jɛ ilu iyi inɛɛ ŋa aa maa tɔɔ fufu hee do ajɔ fei, nɔ a maa wɛɛò inɔ didɔ̃ aŋa do tɔku nŋa ŋa waati kãma fei.

¹⁶ Inɛi ilɛ ŋa do ilaalu nŋa ŋa aa maa woɛ. Waati bɛɛbɛ, aa mà iyi amui ǹ jɛ Aɔ̃ Lafɛ̃ɛ, amui ǹ jɛ woo faabaɛ do woo yaɛ, amui ǹ jɛ Lafɛ̃ɛi Zakɔbu iyi inɛ kãma kaa yɔkɔ ku kãmia.

¹⁷ Si agbɛi isɔ danya, wurai an naaò wa bi tɛɛ. Si agbɛi isɔ, isɔ fũfũi an naaò wa. Si agbɛi jĩi, isɔ danyai an naaò wa. Si agbɛi kuta ŋa, isɔi an naaò wa. Yiiko do gbugbã iyi an jilɛɛi í jɛ laakai ku sũ do dee dee ku jɛ.

¹⁸ A kaa gbɔ a fɔ idei inɔ kukã si ilɛɛ má hee má jɛ idei asɔɔ ku ce do idei wahala si ilɛɛu. Bindiɛ ŋau, faabai aa sɔ ŋa, gamboɛ ŋau mɔ, Ilaaɔ̃ ku saabu.

¹⁹ I kaa nɛ bukaatai inunu ku jɛ inya kumáɛ waatii dasã má. Nɔ idũ mɔ, i kaa nɛ bukaatai cukpa ku máɛ inya má. Aɔ̃ Lafɛ̃ɛɛi á jɛ inya kumáɛ hee do ajɔ fei. Nŋui á maa máɛ inya.

²⁰ Inunuɛ kaa ya lɔ má, nɔ cukpaɛ mɔ kaa ya lɔ má, domi Aɔ̃ Lafɛ̃ɛi á jɛ inya kumáɛ hee do ajɔ fei. Ajɔi inɔ kufɔi iku ŋau mɔ, aa kpa irii.

²¹ Inɛɛ ŋa fei, inɛ dee dee ŋai aa jɛ, nɔ aŋai aa nɛ ilɛu hee do ajɔ fei. Aŋai à jɛ bɛi jĩi iyi ǹ lɔ. Icɛi awɔm ŋai à jɛ ku ba inɛ ŋa a yɛ amboem.

²² Inɛ ŋa iyi a kù kpɔ si nyaanze nŋa, aŋai aa jɛ bɛi amanɛ dubu. Nɔ dimi iyi kù la, nŋui á baa ku jɛ dimi ilu gbugbã. Amu Aɔ̃ Lafɛ̃ɛ, an coo ńya ńyai bii waatiu í to.