Ezai 6 - Bibeli do fee

Ezai í ce kuyɛ

¹ Si adɔ̃ iyi ilaalu Oziasi í kuu bɛ, ǹ yɛ Aɔ̃ Lafɛ̃ɛ wa buba si kitãi bomma gɔ hee lele. Nɔ itĩi ibɔɛ ŋa í kɔ̃ kpasɛ̃i Ilaaɔ̃u fei.

² Amaleka gɔ ŋa iyi à ya kpe serafɛ̃ɛ, à wa do leleɛ. Inɛ akã nŋa fei ikpa mɛɛfai í nɛ. Do ikpa minjii à ya biiò waju nŋa, nɔ à bii ara nŋa mɔ do ikpa minji. Ikpa minji iyi à gbe ŋaui à ya foò.

³ Ŋɔi à ya dɔ̃ anu a maa jɔ̀a njɛ a maa ni, Aɔ̃ Lafɛ̃ɛi lele do ilɛ, í má, í má, í má, nɔ amboeɛ í kɔ̃ ilɛ fei.

⁴ Ŋɔi ide ku fɔi serafɛ̃ɛ ŋau í jɔ̀ icui andɛi kpasɛ̃i Ilaaɔ̃ ŋau à wasi ku yaya, nɔ inɔ kpasɛ̃i Ilaaɔ̃u í kɔ̃ò cua.

⁵ Ŋɔi ǹ dɔ̃ anu ǹ ni, inɔ kufɔi í jɛ tom. Ǹ ce nfe mbɛ, domi gɛlɛm kù maaju, nɔ ǹ wa si aninii inɛ ŋa iyi gɛlɛ nŋa ŋa kù maaju. Nɔ wee ǹ yɛ ilaalu Aɔ̃ Lafɛ̃ɛi lele do ilɛ do ijum.

⁶ Ŋɔi inɛ akãi serafɛ̃ɛ ŋau í fo í naa bi tom wa mu ina nyɛnyɛ iyi í bu wa hai bii à ya ce kuwee si mii ku bu ina gɔ.

⁷ Ŋɔi í naa í lu gɛlɛm do ina nyɛnyɛu, nɔ í sɔ̃m í ni, si bɛi iyi ihɛ̃ í lu gɛlɛɛ bɛbɛi, kuraraɛ í tã mbɛ, nɔ à kpa idei dulum dɛɛ mɔ mbɛ.

⁸ Si anyii nŋu, ŋɔi ǹ gbɔ Aɔ̃ Lafɛ̃ɛ wa ni, yooi an bɛ. Yooi á jɛ inɛ iyi á koo ku fɔ nwa ide. Ŋɔi ǹ jɛaa ǹ ni, ǹ tã sɔɔlu, bɛm.

⁹ Nɔ Aɔ̃ Lafɛ̃ɛ í sɔ̃m í ni, koo sɔ̃ inɛ ŋau ihɔ̃ i ni, aa ya de itĩ i gbɔ ide ŋa mɔ sãa sãa, amma i kaa ya gbɔ yaaseɛ ŋa, aa ya cɔ ilu ŋa, amma i kaa ya yɛ nkãma ŋa.

¹⁰ Lele idɔi inɛ ŋau nɔ i dĩ itĩ nŋa ku ba a maà ya gbɔ ide gɔ, bii iju nŋa ku ba a maà ya yɛ ngɔgɔ. Ce nŋa bɛɛbɛ ku ba a maà yɔkɔ a nyi wa bi Aɔ̃ Lafɛ̃ɛ hee a ba faaba.

¹¹ Ŋɔi ǹ bee ǹ ni, hee waati yooma Aɔ̃ Lafɛ̃ɛ. Nɔ í jɛɛm í ni, hee bii à ce nfei ilu ŋau nɔ zamaa kãma kù wa si, nɔ inɛ kãma kù gbe si kpasɛ̃ ŋau hee ilɛu ku baa ku kpɔò bomma.

¹² Aɔ̃ Lafɛ̃ɛ á lele zamaai ilɛu, nɔ ilɛu ku gbe ngbɛ.

¹³ Si zamaau, bii si mɛɛwa fei inɛ akã í gbe, inai á jo inɛ nŋu. Amma bɛi jĩi ndii terebɛnti walakɔ jĩi ndii sɛni iyi à da í ya wu wa má hai si icuɛ, bɛɛbɛ mɔi dimi iyi Ilaaɔ̃ í cica á fita wa má hai si zamaau.