Ezai 59 - Bibeli do fee

Mii iyi í fɛɛfɛ ŋɛ do Ilaaɔ̃

¹ Ì waa tamaa ŋa bɛi awɔi Aɔ̃ Lafɛ̃ɛ kù sɔ bɛi á tosi ŋɛ ku faaba ŋɛi? Mà ì nɔ ì waa tamaa bɛi itĩɛ í lele í caa bɛi kaa gbɔ ide nŋɛi.

² Ntɔ ntɔ, kurara nŋɛ ŋai wa fɛɛfɛ ŋɛ do Aɔ̃ Lafɛ̃ɛ nŋɛ. Dulum dii iŋɛ taka nŋɛ ŋai í jɔ̀ Ilaaɔ̃ í sinda hai bi tu ŋɛ, nɔ dulum du ŋɛ ŋaui wa ganjiɛ ku gbɔ ide nŋɛ ŋa.

³ Ntɔ ntɔ ì kpa inɛ ŋa nkpɔ nkpɔ nɔ ì ce dulum dimi ikã ikã ŋa. Iboi í ya wa si gɛlɛ nŋɛ ŋa, nɔ ide ku fɔ nŋɛ ci ya jɛ dee dee.

⁴ Ide ŋa iyi ì ya bɔò ile bi ku ce kiiti ŋa ci ya jɛ dee dee. Inɛ kãma nŋɛ gɔ ci ya bɔ bi ku ce kiiti do ide iyi wa too kpãa. Si inya ngbɛi naanɛ nŋɛ í ya wa, nɔ ide ku fɔ nŋɛ ŋa kãma ci ya nɛ icu. Lasabu nŋɛ si inɛ ŋa ku kpã ijui í ya wa, nɔ iri ku kpaɛ, laalɔi í ya na ku bí.

^5-6 Nɔ lasabui mii ŋa mɔ iyi ì waa lele ku ce ŋa fei, laalɔi í ya naaò wa bɛi njɛ ŋa iyi njo í ye. Inɛ baa yooma iyi í jɔɔ fei, á kui tengi bɛ gbakã. Hai njɛu wa lɛgɛ gbakã, njo wukukui í ya maa fita wa. Ikũ ŋa iyi ì waa wɔ̃ ŋa fei, à yɛi bɛi ikũi dadaa. Inɛ kaa yɔkɔ ku soo ku ceò ibɔ, hee má jɛ ku ceò acɔ ku bii, amma inɔ kufɔi í ya naaò wa. Icɛ iyi awɔ nŋɛ ŋa à waa ce fei, icɛi inɔ kukãi í ya jɛ.

⁷ Ì ya maa sɛi ŋai do kutɛ gbãa ku ba i koo i ce laalɔ ŋa. Nɔ ì ya ce saasa ŋai i koo i kpa inɛ iyi kù ce taale kãma. Mii iyi ì waa lele si lasabu nŋɛ ŋa nŋu akãi í jɛ laalɔ ku cea inɛ ŋa. Laalɔ do inɔ kukãi í ya wa si kpãa nŋɛ ŋa.

⁸ I kù mà kpãai laakai ku sũ ŋa, nɔ tengi bii ì nɛ ì lɔ ŋa, inɛ ci ya yɛ tuubai dee dee ku jɛ. Kpãa ŋa iyi à kái ì ya bi ŋa, nɔ inɛ baa yooma iyi í too kpãa nŋɛ ŋau, kaa mà laakai ku sũ pai.

Inɛi Ilaaɔ̃ ŋau à mà kurara nŋa

⁹ Na nŋu mɔm nii í jɔ̀ wa kpɛ Ilaaɔ̃ kù naaò sobiɛ wa si gãmɛ nwa nɔ í ya maa tale idei faaba iyi í ce kuwãɛu do waju. À ya ka maa cɔ kpãai ka yɛ inya kumá, amma bii fei ilu kukui. À ya ka maa degbe iju ku má, amma à ya ka maa nɛi si ilu kuku nla nla.

¹⁰ À ya ka nɛi ka maa baabaaò inya bɛi fɛɛju iyi í wa kɔkɔi idĩ. Nɔ à ya ka maa sikai si isɛɛnɛ nwa bɛi inɛ iyi kù waa yɛ bii wa bɔ. À ya ka maa koosɛi baa si dasã nkpa bɛi inɛ iyi wa nɛ idũ si ilu kuku nla nla. À waa nɛ baani, amma a kù tia iku ŋa.

¹¹ À ya ka maa kungui bɛi mbo, nɔ ka maa dɔ̃ anu bɛi ankasiidi ŋa. À ya ka maa cɔ kpãai Ilaaɔ̃ ku naaò sobiɛ wai wo, amma nkãma ci ya naa. À waa degbe faabai wo, amma faabau í jĩò wa.

¹² Ntɔ ntɔ, Aɔ̃ Lafɛ̃ɛ, kurara nwa ŋa í kpɔ í caa si wajuɛ, nɔ dulum du wa ŋa à waa yɛ taale nwa bi titɛɛ. Wooda ku kua í wa si wa, nɔ à mà kurara nwa ŋa.

¹³ À ce ide ku kɔ̀ bi tɛɛ Aɔ̃ Lafɛ̃ɛ nɔ à zambaɛ. À kɔ̀ ku tooɛ awɔ Aɔ̃ Lafɛ̃ɛ nwa. Ide kulele ŋai à ya ka maa fɔ nɔ à ya ka bɛjɛ mii jiida ŋa. À ya ka ce sɔɔlui ibo ŋa si idɔ nwai nɔ ka maa lasabu si.

¹⁴ Do yaase bɛɛbɛ, ntɔ kù wa si anini nwa má, nɔ à jĩòɛ. À bii ntɔ si bantuma, nɔ kù wɛɛ má.

¹⁵ Ntɔ ku jirima í tã, nɔ inɛ iyi í bi ku saa laalɔ, í ya ba wahalai jiida jiida. Aɔ̃ Lafɛ̃ɛ í yɛ mii iyi wa ce fei. Í yɛ iyi nkãma kù waa nɛ si dee dee ku jɛ, nɔ iyi bɛ kù waa dɔ̃aa si.

Aɔ̃ Lafɛ̃ɛ í naaò sobiɛ wa

¹⁶ Aɔ̃ Lafɛ̃ɛ í yɔɔ iyi baai inɛ kãma kù wa si, nɔ í biti si na iyi í jɔ̀ inɛ kãma kù ce ngɔgɔ. Ŋɔi nŋu takaɛ í dasi idɔ nŋu ku dasi awɔ, nɔ dee dee ku jɛi nŋu takaɛi í jɛ gbugbãɛ.

¹⁷ Dee dee ku jɛ í wɛɛai bɛi ibɔi isɔ, nɔ fulai isɔ iyi í dasi si iriɛi í jɛ faabau. Nɔ í dasi ibɔ jaba gɔ í jɛ bɛi jĩnɛ ŋa iyi á dasi ku jaò ku ba ku gbaa inɛɛ ŋa. Ibɔ nla nla iyi í dasiui í jɛ himmaɛ iyi á ceò ija.

¹⁸ Á sãa inɛ fei mii iyi í nɛ ku baai. Idɔɔkɔ̃ɛ á naa si mbɛɛɛ ŋaui. Á sã nŋa idɔɔkɔ̃ui zaka bɛi kuce nŋa í to. Idɔɔkɔ̃ɛ iyi á sãu, á tosi hee do inɛi gũngũm ŋa fei zaka bɛi kucei aŋa mɔ í to.

¹⁹ Waati bɛɛbɛ, hai inɛ ŋa iyi à wa nunui daakɔ hee ku bɔ nunui alɛ fei, aa mà bɛɛrɛi Aɔ̃ Lafɛ̃ɛ do amboeɛ. Waati iyi mbɛɛ á maa naa bɛi inyii ido nla nla fei, fufui amii Aɔ̃ Lafɛ̃ɛi á ya jɔ̀ ku sa.

²⁰ Aɔ̃ Lafɛ̃ɛ í ni, woo ya wa naa na irii ilui Siɔ̃ɔ do na irii inɛi Zakɔbu ŋa iyi à waa fũsi ide ku kɔ̀ nŋa awɔ.

²¹ Nɔ Aɔ̃ Lafɛ̃ɛ í nyi í ni má, kuwã iyi ǹ wa n ce si gãmɛi inɛ ŋau ihɛ̃ wee. Hundem iyi ǹ da nŋa si do idem ŋa iyi ǹ dasi si gɛlɛ nŋa, n kaa n nyaa hai si ŋa má, nɔ n kaa n nyaa baa hai si gɛlɛi tɔku nŋa ŋa má, nɔ n kaa n nyaa hai si gɛlɛi tɔkui aŋa mɔ má hai nsɛi hee do ajɔ fei. Bɛi Aɔ̃ Lafɛ̃ɛ í fɔ mbɛ.