Ezai 57 - Bibeli do fee

¹ À ya kpa inɛ dee dee ŋai, nɔ inɛ kãma ci ya ce weewea na iri nŋa. Woo ce jiida ŋa à ya kui, nɔ inɛ kãma ci ya gbɔ yaaseɛ. Inɛ kãma ci ya mà iyi inɛ dee dee í ya kui na ku fita si wahala.

² Á ba laakai ku sũ, nɔ inɛ ŋa iyi à waa too kpãa iyi í tɛ aa na a yɔkɔ a sĩ njoo do laakai ku sũ cau.

Ilaaɔ̃ í yɛ taalei woo tɔɔ iwɛ̃ ŋa

³ Amma iŋɛ, i sɛkɛɛ wa ihɛ̃ ŋa iŋɛ ama inɛmɔkɔi abo à ce alisi, iŋɛ woo ce sakara ŋa do woo ta icu ŋa.

⁴ Yooi ì waa yaako ŋa. Si yooi ì la gɛlɛ nŋɛ nla nla nɔ ì yɔ amɛ ì waa yaakoɛ ŋa. Iŋɛ ama hai jirima inɛ ŋai, nɔ ì jɛ dimii woo sɔ ibo ŋa.

⁵ Ì ya maa tɔtɔɔ sɛ̃ɛ ŋai si abɛ jĩi nla ku nɛ wua tũtũ ŋa fei. Ì ya maa saka amu ŋai si itĩi ido ŋa do si inɔ isai kuta ŋa.

⁶ Kuta ku yɔrɔ ŋa iyi à wa acãi inyiui à jɛ ikpɛ̃ɛ Izirɛli. Aŋau bɛ, aŋai à jɛ titɛɛ. Na iri nŋai ì waa ce amuai vɛ̃ɛ do kuwee ŋa iyi à ya jo si ina fei sãa sãau. Ǹ nɛ n jɛsi mii ŋau bɛ?

⁷ Si antaii iri kuta kugboka gɔi ì koo ì ce bi ku sũɛ. Nɔ tengi bɛ mɔi ì ya gũ i koo i ce kuweeɛ ŋa.

⁸ Ì kɔa iwɛ̃ɛui si jĩi ndii gamboi ileɛ do anyi ikpa lele. Ì ya manjiim nii i fita basĩ i koo i gũ antaii daayiɛ nɔ i ce inya. Tengi bɛi ì ya koo i dĩ akabuu do inɛmɔkɔ ŋa. Ì ya bi iŋɛò ŋa i sũ, nɔ ì ya maa cɔ ŋa.

⁹ Ì ce isɛɛnɛ ì bɔ bi iwɛ̃ɛ do amuai ikpo ŋa. Ì fãsi araɛ tuae ku dɔ̃ inunu ŋa, nɔ ì bɛ inɛ ŋa hai ihɛ̃ à bɔ hee jĩijĩ. Ì jɔ̀ à bɔi hee bi kuwai iku ŋa.

¹⁰ Isɛɛnɛ ku ce waati kãma feiu, í na í jɔ̀ ì gbɛɛji. Nɔ do nŋu fei, i kù ni, n kaa n koo má. Amma ì kɔ̀ ì ba gbugbã, nɔ i kù gbɛɛji má.

¹¹ Njoi yooi ì waa ce wo, nɔ si yooi zigiɛ wa da wo, í jɔ̀ ì waa sɔ ibo, nɔ i kù waa ye gigim nɔ i kù waa lasabu. Hai ku kpɛ n kù ni ide kãma. Na ŋɔi í jɔ̀ i kù waa jirimam má.

¹² Amma nsɛi, taale iyi ì jilɔɔ si i kù nɛu, do kuceɛ ŋau, an fɔɔ wai ku fita gbugbãa nɔ a kaa naaɛ aranfãani kãma wa.

¹³ Baa bii ì na ì waa dɔ̃ anu ì waa tɔɔ iwɛ̃ ikã ikãɛ ŋau a faabaɛ, fufu á so ŋai fei ku nɛò ŋa. Fufu á cei ku gbangaa ŋa. Amma inɛ iyi í ce bi ku manjiɛ bi tom, titɛɛi ilɛu á jɛ, nɔ nŋui á nɛ iri kuta kumám nɔu.

Iri ku bai inɛi Ilaaɔ̃ ŋa

¹⁴ Aɔ̃ Lafɛ̃ɛ í fɔ wo í ni, i teese kpãa ŋa. I ce sɔɔlui kpãa gɔ, nɔ i nya mii ŋa iyi aa jɛ bi ku kosi isɛ fei hai si kpãai inɛm ŋau.

¹⁵ Ntɔ ntɔ inɛ iyi í wa hee lele feiu, nŋu iyi kuwɛɛɛ kù nɛ kɔɔ, nɔ iriɛ í máu í fɔ í ni, lele bii í mái ǹ wa amma ǹ nyi ǹ wa bi inɛ ŋa iyi à waa taa gbugbã nɔ à waa ba wahala ku ba n dede ŋa nɔ n mu nŋa gbugbã.

¹⁶ Ntɔ ntɔ, kù jɛ a ni hee do ajɔ feii an maa n yɛ taalei inɛ ŋa, kù nɔ kù jɛ a ni hee do ajɔ feii idɔm á maa kɔ̃, domi bii bɛɛbɛi, inɛ feii á kua hunde.

¹⁷ Idɔm í kɔ̃ si Izirɛli na laalɔ ku ceɛ do na mii ŋa iyi í ba si kpãa iyi kù jɛ dee dee. Na ŋɔi í jɔ̀ si idɔɔkɔ̃m ǹ kpãa iju nɔ n kù bi baa ku yɛɛ má. Amma í kɔ̀ í lele idɔɛ nɔ í leekĩ si dee dee hai jɛɛ.

¹⁸ Ǹ wa n yɛ kuceɛ ŋa, amma an jɔ̀ ku ba iri. Amui an maa n gbãa, nɔ n tũ idɔɛ, nŋu do inɛ ŋa iyi à wɛɛò inɔ kufɔi iku na iriɛu.

¹⁹ Nɔ Aɔ̃ Lafɛ̃ɛ í ni má, an dasi iri ku kɔ̃i saabu si gɛlɛ nŋa. Laakai ku sũi á jɛ ti inɛ ŋa iyi à wa amɛɛ hee do inɛ ŋa iyi à wa hee jĩijĩ fei. Amui an jɔ̀ a ba iri.

²⁰ Amma inɛ laalɔ ŋa à yɛi bɛi tenku iyi wa yaya iyi kaa yɔkɔ ku sũ sɛ̃ɛ. Inyiɛu í ya tale mii riisi ikã ikã fei wa icei.

²¹ Aɔ̃ Lafɛ̃ɛm í ni, laakai ku sũ kù wɛɛa woo ce laalɔ ŋa.