Ezai 56 - Bibeli do fee

Kpasɛ̃ bi ku ce kutɔɔi inɛi andunya fei

¹ Ide iyi Aɔ̃ Lafɛ̃ɛ í fɔ wee. Í ni, i ya jirima asaiya ŋa, nɔ i ya ce iyi í jɛ dee dee ŋa, domi faabam í maai ku to wa, nɔ dee dee ku jɛm í maai ku fita gbugbãa.

² Ilu inɔ didɔ̃i inɛ iyi wa ce bɛi ǹ fɔ, inɛ iyi wa leekĩ si dim dim nɔ wa jirima ajɔi kusĩmi, nɔ wa mu araɛ si mii iyi í jɛ laalɔ fei.

³ Nɔ inɛ njoo iyi í na Aɔ̃ Lafɛ̃ɛ araɛ ku maà fɔ ku ni, Aɔ̃ Lafɛ̃ɛ á fɛɛfɛɛm do inɛɛ ŋa. Nɔ inɛmɔkɔ bantãm mɔ ku maà fɔ ku ni, amu jĩi ngbɛi,

⁴ domi ide iyi Aɔ̃ Lafɛ̃ɛ í fɔ wee. Í ni, inɛmɔkɔ bantãm ŋa iyi à waa jirima ajɔi kusĩmim ŋa, bii à cica aŋa a ce mii iyi á dɔ̃ɔm si, nɔ à leekĩ dim dim si akabuum,

⁵ an jɔ̀ nŋa inya si kpasɛ̃m do si idĩi kpasɛ̃m nɔu tengi bii aa kɔ iri nŋa. Inɛ nŋu bɛ á jɛ nŋa jiida ku re ama inɛmɔkɔ ŋa do ama inaabo ŋa. An jɔ̀ iri nŋau ku maa wɛɛi hee do ajɔ fei, inɛ kãma kaa kpaa.

⁶ Inɛ njoo ŋa iyi aa na amu Aɔ̃ Lafɛ̃ɛ ara nŋa ku ba a bim nɔ a maa jirimam hee a baa a jɛ woo ce icɛm ŋa, aŋa iyi à waa jirima ajɔi kusĩmi nɔ à waa mu ara nŋa ku ba a maà bɛjɛɛ, nɔ à waa leekĩ dim dim si akabuum nɔu,

⁷ an gbã ŋai n bɔò ŋa si iri kuta kumám nɔu, nɔ an jɔ̀ inɔ nŋa ku dɔ̃i si inɔ kpasɛ̃m bi ku ce kutɔɔu. Kuwee nŋa iyi à ya jo si ina fei sãa sãa do kuwee mmuɛ nŋa ŋa iyi aa ce si antaii bi ku ce kuweem nɔu á dɔ̃ɔm si, domi aa kpe kpasɛ̃m nii, kpasɛ̃ bi ku ce kutɔɔi inɛi andunya fei.

⁸ Aɔ̃ Lafɛ̃ɛ, nŋu iyi í tɔtɔɔ inɛi Izirɛli ŋa iyi à fangaa ŋau, í ni, ǹ tɔtɔɔ inɛ gɔ ŋa tã wo, nɔ an nyi n tɔtɔɔ inɛ mmu gɔ ŋa má.

Inɛ ngbo ŋa iyi kuce nŋa kù sĩa

⁹ Iŋɛ mɛɛmui sako ŋa fei, do iŋɛ mɛɛmui inɔ agbo ŋa fei, i naa i jɛ ŋa.

¹⁰ Inɛ ŋa iyi à jɛ woo degbe ilui Izirɛli ŋau fei fɛɛju ŋai, a kù mà nkãma. Aŋa fei aja dekĩ ŋai, a kaa yɔkɔ a gbongboo. À ya sũi a maa laalaò nɔ à ya bi idei njoo ku sũ.

¹¹ Inɛ ŋau aja so n mi ŋai iyi a ci ya yo. Woo degbe ŋai iyi a ci ya gbɔ yaasei nkãma. Aŋa fei à waa too kpãa nŋai, nɔ inɛ fei idei irii nŋu akãɛi wa ce.

¹² À ya fɔi a maa ni, i naa wa ŋa kaa dɛdɛ atɛ̃ vɛ̃ɛ nɔ ka mɔ atɛ̃ iyi í nɛ gbugbã. Nɔ ala má, bɛɛbɛi aa ka ce, domi nkpɔ nkpɔi í gbe iyi aa ka mɔ má.