Ezai 55 - Bibeli do fee

I naa wa baa bii i kù nɛ fia ŋa

¹ Iŋɛ iyi agbɛ wa kpa fei, i naa wa tengi bii inyi í wa ŋa. Baa inɛ iyi kù nɛ fia, ku naa wa. I naa wa i naa i gba i jɛ ŋa, kù nɛ fia ku sã. I naa wa i naa i gba vɛ̃ɛ do amɔ ŋa hai nɛ fia ku sã.

² Na mii í jɔ̀ ì waa jɛ fia ŋa si mii iyi kù jɛ sɔnda. Na mii í jɔ̀ ì waa gbɛɛji ara nŋɛ si mii iyi kaa yo ŋɛ. I sotĩ i gbɔ idem ŋa nɔ i jɛ mii iyi í jɛ jiida ŋa. Sɔnda jiida iyi á jɔ̀ i nɛ inɔ didɔ̃ nla nlai aa jɛ ŋa.

³ I sotĩ i gbɔ nɔ i naa wa bi tom ŋa. I sotĩ i gbɔ idem nɔ i wɛɛ ŋa. An dĩ akabuu do iŋɛ hee do ajɔ fei. An ce nŋɛ jiida ŋa bɛi ǹ tako ǹ cea Davidi kuwãɛu.

⁴ Nŋui ǹ jɔ̀ í jɛ sɛɛdam bi inɛ ŋa, nɔ nŋui í jɛ ilaalu iyi wa gbã zamaau wo.

⁵ Aa kpe dimi gɔ iyi i kù mà, nɔ dimi gɔ iyi kù màɛ, á sɛi ku naa bi titɛɛ na irii Aɔ̃ Lafɛ̃ɛɛ Inɛ Kumái Izirɛli nŋu iyi í jɔ̀ ì nɛ bɛɛrɛu.

Kuwã iyi kaa gbe hai kɔ̃

⁶ I dɛdɛ Aɔ̃ Lafɛ̃ɛ ŋa hai waati iyi nŋu takaɛ á jɔ̀ i yɔɔ ŋa. I kpoo ŋa hai waati iyi í wa amɛɛ.

⁷ Ilu inɔ kukã ku sinda ku jɔ̀ kpãaɛ, nɔ woo ce laalɔ mɔ ku jɔ̀ lasabuɛ ŋa nɔ ku sinda ku baa bi Aɔ̃ Lafɛ̃ɛ iyi á ce araareɛ. Ku sinda ku baa wa bi Aɔ̃ Lafɛ̃ɛ nwa nŋu iyi í ya ce suuru ntɔ ntɔ.

⁸ Aɔ̃ Lafɛ̃ɛ í nyi í fɔ má í ni, ntɔ ntɔ lasabum ŋa kù jɛ dimi akã do lasabu nŋɛ ŋa, nɔ yaasei kuce nŋɛ ŋa à jĩò yaasei kucem ŋa.

⁹ Do yaase bɛi lele do ilɛ à jĩò njɛ, do yaase bɛɛbɛ mɔi yaasei kucem ŋa à jĩò yaasei kuce nŋɛ ŋa, nɔ lasabum ŋau mɔ à jĩò lasabu nŋɛ ŋa.

¹⁰ Yaase bɛi ijĩ í ya maa wɔ wa do kuta hai lele, nɔ í ya jɔ̀ ilɛ ku mandi, nɔ í ya jɔ̀ amaajɛ ŋa a fita, nɔ í ya jɔ̀ dimi iyi woo gbɛ̃ í gbɛ̃u ku bí, nɔ í ya jɔ̀ inɛ iyi ari wa kpa ku ba sɔnda iyi á jɛ,

¹¹ bɛɛbɛ mɔi do idem iyi wa fita wa hai si gɛlɛm. Ci ya sinda ku nyi wa bi tom iyi kù ce icɛɛ, nɔ ci ya nyi wa bi tom iyi kù ce idɔɔbim, nɔ ci ya nyi wa bi tom má iyi kù ce mii iyi ǹ bɔɔ do wa.

¹² Ntɔ ntɔ, aa fita wa ŋai do inɔ didɔ̃, nɔ aa maa gbã ŋɛi do laakai ku sũ. Iri kuta do geete ŋa aa maa dɔ̃ anui do inɔ didɔ̃ si waju nŋɛ, nɔ jĩi ndii inɔ sako ŋa fei aa maa dakpɛi.

¹³ Tengi bii ama jĩi ku nɛ agũ ŋa à fita wo, tengi bɛi jĩi nla ŋa aa fita. Tengi bii kakayɛtɛ ŋa à fita wo, tengi bɛi jĩi ŋa iyi wua nŋa ci ya wɔ aa fita. Bi Aɔ̃ Lafɛ̃ɛ iri ku nɛ bɛɛrɛi á jɛ do nyinda hai nɛ kɔɔ iyi kù nɛ ku nya.