Ezai 54 - Bibeli do fee

A kù fũsi Zeruzalɛmu awɔ má

¹ Ŋɔi Aɔ̃ Lafɛ̃ɛ í ni, dɔ̃ anu do inɔ didɔ̃, awɔ inaabo gbɛnda iyi i kù bí. La, i dɔ̃ anu do inɔ didɔ̃, awɔ iyi i kù mà ara kuroi kubí, domi awɔ inaabo iyi à kɔ̀si, amaɛ ŋa aa na a kpɔ a re amai inaabo iyi í wa idei mɔkɔ.

² Na nŋu, kɔ̃ɔsi kucĩi ilei acɔɛ, nɔ i tɛ acɔ ŋa bi kuwaɛu i kɔ̃ɔsi. Maà cɔ fia iyi ì nɛ ku jɛ, amma jɔ̀ ikũɛ ŋau a sɔ a kɔ̃ɔsi, nɔ i jɔ̀ kɛkɛɛ ŋau a nɛ gbugbã a kɔ̃ɔsi.

³ Aa ce bɛɛbɛi si na iyi í jɔ̀ canga do njɛɛ fei, bi kuwaɛ á cĩ ku kɔ̃ɔsii. Tɔkuɛ ŋa aa gba ilɛ ŋa, nɔ ilu ŋa iyi à tako à gbe ngbɛ ŋau, aa baa a kɔ̃ mái do inɛɛ ŋa.

⁴ Na nŋu, maà jɔ̀ njo ku muɛ, domi i kaa jɛ ilu anyɔ má. Maà jɔ̀ anyɔ ku muɛ domi bɛɛrɛɛ kaa kaye má. Ntɔ ntɔ aa gbɛjɛ idei anyɔi waatii mudɛ̃ɛɛ, nɔ i kaa ye gigii anyɔi waatii jaaɔ̃ɛu má.

⁵ Ntɔ ntɔ, inɛ iyi í takaɛ, lafɛ̃ɛi í jɛ mɔkɔɛ. Iriɛi í jɛ Aɔ̃ Lafɛ̃ɛi lele do ilɛ. Nŋui í jɛ woo yaɛ, nɔ nŋui í jɛ Inɛ Kumái Izirɛli. Nŋui à ya kpe Ilaaɔ̃ Lafɛ̃ɛi ilɛu fei.

⁶ Aɔ̃ Lafɛ̃ɛ wa kpeɛ awɔ iyi ì wa si inɔ kufɔ bɛi inaabo iyi à kɔ̀si. Aɔ̃ Lafɛ̃ɛ í ni, bɛirei inɛ á ce ku fũsi abo iyi í cica hai waatii awaasũɛ awɔ.

⁷ Si awaati keeke gɔ wo, ǹ fũsiɛ awɔ, amma si araare nlam, ǹ nyi ǹ gbaɛ bi titom má.

⁸ Si waati keeke gɔ wo, ǹ fa wajum hai bi tɛɛ si idɔɔkɔ̃ nla nlam. Amma si kubi hai nɛ kɔɔm, an ce araareɛi. Amu Aɔ̃ Lafɛ̃ɛ woo yaɛi ǹ fɔ bɛɛbɛ.

⁹ Nnyiu ihɛ̃, an cei bɛi si waatii Nowee. Ǹ fɔ wo do kugbasi ǹ ni inyi nla nla iyi í ce nfei inɛ ŋa si waatii Noweeu, kaa naa si ilɛ má. Bɛɛbɛ mɔi ǹ wa n fɔ do kugbasi iyi n kaa n ce idɔɔkɔ̃ do awɔ má, nɔ n kaa n fɔ idei ijuukpã si gãmɛɛ má.

¹⁰ Baa bii iri kuta ŋa aa tekĩ, nɔ baa bii geete ŋa à waa yaya, dee dee ku jɛm kaa sɛkɛɛ hai bi tɛɛ, nɔ akabuui laakai ku sũ iyi í wa si gãmɛi awaɛ kaa fũ. Aɔ̃ Lafɛ̃ɛ nŋu iyi í nɛ araareɛi í fɔ bɛɛbɛ.

Kuwɛɛi Zeruzalɛmu si waati iyi wa naa do waju

¹¹ Inɔ kufɔi í jɛ ti awɔ ilu iyi fufu í yaga nɔ i kù ba inɛ kãma iyi á tũ idɔɛ. Aɔ̃ Lafɛ̃ɛ í ni, nsɛi amu an teese n maɛi do kuta ŋa iyi à ce si booda. An teese n jilɛ icuɛ ŋa do kuta ilu bɛɛrɛ gɔ ŋa iyi à ya kpe safira.

¹² Nɔ lelei bindiɛ ŋau mɔ, kuta ilu bɛɛrɛ gɔ ŋai an dasi, nɔ n dasi mmuɛ gɔ ŋa má si andɛ bi ku lɔɛ ŋau. Bɛɛbɛi an ce bindiɛ ŋau fei.

¹³ Amaɛ ŋa fei, mɔcɔm ŋai aa jɛ nɔ aa wɛɛò laakai ku sũ nla nla.

¹⁴ Dee dee ku jɛ á jɔ̀ i nɛ gbugbãi ntɔ ntɔ. Fa araɛ i jĩò woo taa inɛ ŋa gbugbã. I kaa wɛɛò njo do zigiida má. Njo do zigiidau, kaa naa bi tɛɛ má.

¹⁵ Bii inɛ gɔ wa naa siɛ igũ bɛbɛi, kù jɛ amui ǹ jɔ̀ wa naa má. Nɔ mɔm, inɛ baa yooma iyi í naa siɛ igũ fei, aa jɔɔ igũi.

¹⁶ Amui ǹ taka gbɛdɛ, nŋu iyi í ya fufu ina nɔ ku ce jĩnɛi igũ dimi ikã ikã fei. Amma ǹ taka inɛ gɔ mɔ iyi á yɔkɔ ku ce nfeɛ.

¹⁷ Dimii jĩnɛi igũ baa yooma iyi à ce na iriɛ fei, kaa ceɛ laalɔ kãma, nɔ inɛ baa yooma iyi á bɔòɛ bi ku ce kiiti fei, aa jɔ̀ a yɛ taalei lafɛ̃ɛi. Ikpɛ̃ iyi ǹ jilɛa inɛ ŋa iyi à jɛ woo ce icɛm ŋa mbɛ. Ikpɛ̃ui í jɛ dee dee ku jɛ iyi wa naa hai bi tom. Amu Aɔ̃ Lafɛ̃ɛi ǹ fɔ bɛɛbɛ.