Ezai 53 - Bibeli do fee

¹ Laabaau iyi à sɔ̃ wau, yooi í dasi naanɛ. Yooi í mà gbugbãi Aɔ̃ Lafɛ̃ɛ.

² Ntɔ ntɔ si wajui Aɔ̃ Lafɛ̃ɛ, woo ce icɛu í dede í lai bɛi kuyɔi jĩi. Í fitai bɛi jĩi iyi kù nɛ bɛɛrɛ si ilɛ ngbɛ. Wajuɛ kù sĩa, kù nɔ kù waa daana hee ka sinda ka cɔɔ. Wajuɛu kù nɛ nkãma iyi á fa laakai nwa.

³ Inɛ ŋa à dondaɛ nɔ à kɔ̀siɛ nɔ í nɛ dɔ̃ɔnɛi wahala do ara kuro. Awa à dondaɛ nɔ a kù dooaɛ si nkãma, nɔ í baa í yɛ bɛi inɛ gɔ iyi inɛ ŋa a kù bi ku cɔ.

⁴ Ntɔ ntɔ, wahala nwa ŋa do ara kuro nwa ŋai í so. Amma awa à tamaa bɛi Ilaaɔ̃i wa kpãa iju do yaase bɛɛbɛ. À tamaa bɛi Ilaaɔ̃ í cãai nɔ í dasiɛ anyɔ.

⁵ Wee na irii dulum du wa ŋai à gũu, nɔ na kurara nwa ŋai à mɛɛ ntɔ ntɔ. Ijuukpã iyi í nɛ ku ba wa ka bɛi ka ba laakai ku sũu, siɛi í cuku si, nɔ na saabui kumɛɛɛ ŋau bɛi awa à baò iri.

⁶ Awa fei à nyɔi wo à waa dabii bɛi mɛɛmu gaa ŋa. Waati bɛɛbɛ, inɛ fei í mu kpãaɛi, nɔ Aɔ̃ Lafɛ̃ɛ í jɔ̀ kurarai awa fei í baa siɛ.

⁷ À wahalaɛ, à kpãa iju, amma kù cĩ gɛlɛ bɛi angudã iyi à waa bɔ ku saka, do bɛi ama angudã iyi wa coko si wajui inɛ ŋa iyi à waa bu ntoɛ.

⁸ À muu do gbugbã, nɔ à kiitiɛ. Amma si inɔi zamaaɛ ŋau, a kù gbɔ bii inɛ kãma wa weewea si mii iyi í baa. À nyaa hai si inɔi inɛ ŋa iyi à waa mí si hunde si ilɛ ihɛ̃, à kpãa iju, nɔ à cã à kpaa na kurarai inɛm ŋa.

⁹ À koo à suui tengi bii à ya si inɛ laalɔ ŋa. Balɛɛ í wai bi balɛi ilu amani ŋa baa do iyi kù taa inɛ gɔ gbugbã nɔ idei zamba kãma kù fita hai si gɛlɛɛ.

¹⁰ Amma Aɔ̃ Lafɛ̃ɛi í jɔ̀ woo ce icɛɛ í ba wahalau, si anyiɛ nɔ í jɔ̀ í na kuwɛɛɛ í ceò kuweei ku teese. Woo ce icɛɛu á ba tɔku ŋa, nɔ á nyi ku jɛ kuwɛɛ sisɔ má. Nŋui á jɔ̀ mii iyi Aɔ̃ Lafɛ̃ɛ í dasi idɔ ku ceu ku kɔ̃.

¹¹ Ŋɔi Aɔ̃ Lafɛ̃ɛ í ni, si anyii wahala ŋa iyi woo ce icɛm nɔu á bau, á nyi ku yɛ inya kumái kuwɛɛ má hee ku too. Nɔ na saabui kumà iyi woo ce icɛm nɔu í nɛ, nŋu iyi í jɛ dee deeu, á jɔ̀ inɛ nkpɔ ku jɛ dee dee, nŋu iyi í so kurara nŋa ŋau.

¹² Na ŋɔi í jɔ̀ an dasiɛ si inɔi inɛ nla ŋa. Á ce ikpɛ̃i mii ŋa iyi à ya baaò wa hai si igũi do inɛ ŋa iyi à re do gbugbã ŋa, domi í na araɛ hee í koo í kuò. Í jɔ̀ à dasiɛ si inɔi woo ce laalɔ ŋa, nɔ í faaba ilu dulum nkpɔ nkpɔ.