Ezai 52 - Bibeli do fee

Zeruzalɛmu, jĩ hai si iri njoo

¹ Zeruzalɛmu, jĩ, jĩ hai si iri njoo. Siɔ̃ɔ, jɔ̀ gbugbãɛ ku teese ku baa. Dasi ibɔ kusĩaɛ ŋa, awɔ Zeruzalɛmu ilu kumáu, domi hai ce bango do inɛ iyi í nɛ riisi kãma kaa lɔ wa bi tɛɛ má.

² Dede nɔ i gbugbã iluluɛ na inɔ kufɔi iku iyi í baɛ Zeruzalɛmu. Dede i leekĩ nɔ i gba agbɛɛ má, Siɔ̃ɔ awɔ iyi à muɛ piisɔ̃ɔu. Fũ ikũ ŋa iyi à ciiò kɔ̃ɔɛ.

³ Ntɔ ntɔ ide iyi Aɔ̃ Lafɛ̃ɛ í sɔ̃ zamaaɛu wee. Í ni, à tako à so ŋɛi wo à daa inɛ ŋa si awɔ ì jɛ aru nŋa ŋa a kù sã nkãma, bɛɛbɛ mɔi aa jɔ̀ i nɛ ara nŋɛ ŋai hai nɛ fia kãma ku sã.

⁴ Nɔ Aɔ̃ Lafɛ̃ɛ í nyi í fɔ má í ni, hai sinte, inɛm ŋau à bɔ Ezibiti à koo à buba bɛ à waa jɛ inɛ njoo. Si anyiɛ nɔ inɛi Asiri ŋa à na à wahala ŋa si ngbɛ ngbɛ.

⁵ Ŋɔi Aɔ̃ Lafɛ̃ɛ í ni, to, nsɛi bɛbɛi si ideu ihɛ̃, bɛirei amu mɔ ǹ nɛ n ce, domi wee à mu inɛm ŋa si ngbɛ ngbɛ. Inɛ ŋa iyi à kãmia ŋa à waa kpã ŋa iju ŋau, à nɛ gbugbã ntɔ ntɔ. Nɔ waati bɛɛbɛ, irim í baa í jɛ yaako waati kãma fei.

⁶ Na nŋu, ajɔ akã inɛm ŋau aa mà inɛ iyi ǹ jɛ. Aa mà bɛɛbɛ, domi amui ǹ ni ǹ wa ihɛ̃.

Kubaai Aɔ̃ Lafɛ̃ɛ wa Zeruzalɛmu

⁷ Inɔ didɔ̃ nla nlai inɛ iyi wa naaò laabaau jiidau wa si antaii iri kuta ŋa, nɔ wa fɔ idei laakai ku sũ. Nŋu iyi wa naaò laabaau jiidai inɔ didɔ̃ nɔ wa fɔ idei faabau, nŋui í sɔ̃ ilui Siɔ̃ɔ í ni, Aɔ̃ Lafɛ̃ɛɛi í jɛ ilaalu.

⁸ Na nŋu, sotĩ i gbɔ imui woo degbe ŋa iyi ì jilɛ lele a maa cɔ iluu. Inɛ ŋau aŋa fei à wasi ku dɔ̃ anui ajɔ ajɔ do inɔ didɔ̃, domi aŋa fei à yɛ Aɔ̃ Lafɛ̃ɛi do iju nŋa wa baa Siɔ̃ɔ.

⁹ Idĩ kukui Zeruzalɛmu ŋa, i dɔ̃ anu do inɔ didɔ̃ ŋa, domi Aɔ̃ Lafɛ̃ɛ á tũ idɔi zamaaɛu nɔ nŋui á ya Zeruzalɛmu.

¹⁰ Aɔ̃ Lafɛ̃ɛ í nyisi gbugbãɛ si ijui inɛi ilɛ ŋau fei. Nɔ hee ku bɔ kɔɔi andunya fei, inɛ ŋa aa yɛ faaba iyi Aɔ̃ Lafɛ̃ɛ nwa í naaò wa.

I fita hai Babilɔni ŋa

¹¹ I nɛ ŋa, i nɛ ŋa, i fita hai bɛ. I maà lu nkãma iyi í nɛ riisi ŋa. I fita hai si inɔ iluu, nɔ i jɔ̀ i maa maaju ŋa iŋɛ iyi ì waa so jĩnɛ ŋa iyi à ya loo waatii Aɔ̃ Lafɛ̃ɛ ku tɔɔu.

¹² Waati iyi ì waa fita ŋa, i maà fita do saasa nɔ i maà ti i maa nɛ bɛi inɛ ŋa iyi à waa sa ŋa. Aɔ̃ Lafɛ̃ɛi á maa cua nŋɛ si isɛɛnɛu, nɔ nŋui á nyi ku maa degbe ŋɛ wa do anyi má.

Woo ce icɛi Aɔ̃ Lafɛ̃ɛ (iri ku kɔ̃ mɛɛsia)

¹³ Aɔ̃ Lafɛ̃ɛ í ni kuwɛɛi woo ce icɛi nŋu á maa bɔ do wajui. Á dedei ku la nɔ ku nɛ bɛɛrɛ nla nla.

¹⁴ Do yaase bɛɛbɛ, inɛ nkpɔ nkpɔ á wɛɛò zigiida waati iyi aa yɔɔ si na iyi í jɔ̀ wajuɛ í kpaasi nɔ araɛ kù yɛ bɛi ti amanɛ ŋa má.

¹⁵ Nɔ bɛɛbɛ mɔi zamaa nkpɔ nkpɔ á biti na iriɛ. Nɔ si wajuɛ, ilaalu ŋa a kaa nɛ ide iyi aa fɔ má, domi aa yɛ mii ŋa iyi a kù tako a kù sɔ̃ ŋa ideɛ wo, nɔ aa gbɔ yaasei mii ŋa iyi a kù tako a kù gbɔ wo.