Ezai 50 - Bibeli do fee

Njɛ ku kɔ̀si kù wa si gãmɛi Ilaaɔ̃ do zamaaɛ

¹ Ide iyi Aɔ̃ Lafɛ̃ɛ í fɔ wee. Í ni, iŋɛ inɛi Zudaa ŋa, hee iwoi tiai njɛ ku kɔ̀ iyi wa nyisi iyi ǹ kɔ̀si Zeruzalɛmu iye nŋɛ í wa. Walakɔ mɔ i sɔ̃m ŋa, bi yooi ǹ koo ǹ ta ŋɛ bɛi aru si na iyi í jɔ̀ ǹ wa n mu gbesei lafɛ̃ɛ. Ntɔ ntɔ bii ǹ ta ŋɛ, na irii kurara nŋɛ ŋai, nɔ bii ǹ kɔ̀si iye nŋɛ, na dulum ku ce nŋɛ ŋai.

² Waati iyi ǹ naa, na mii í jɔ̀ n kù yɛ inɛ kãma. Waati iyi ǹ kpe ŋɛ, na mii í jɔ̀ inɛ kãma kù jɛ. Awɔm í kandaa bɛi n kaa n yɔkɔ n faaba ŋɛi? Gbugbã wa gaiziam bɛi n kaa n yɔkɔ n faaba ŋɛ? Bii ǹ la si tenku, í to tenku ku gbɛ, nɔ ido nla ŋau mɔ a baa a kpɔò gbaa. Waati bɛɛbɛ, inyi á gaizia, nɔ cɛ̃ɛ ŋa aa ku do agbɛ, nɔ a sãmi.

³ An yɔkɔ n bii lelei Aɔ̃ n jɔ̀ ku dũ, nɔ an nyi n yɔkɔ n daa si jĩnɛi inɔ kufɔ má.

Woo ce icɛi Aɔ̃ Lafɛ̃ɛ (iri ku kɔ̃ mɛɛtasia)

⁴ Aɔ̃ Lafɛ̃ɛ í kɔm si ide iyi ǹ nɛ ku fɔ ku ba n mà ide ŋa iyi an fɔ n sobiò inɛ iyi í kua gbugbã. Daakɔ fei nŋui í ya jĩim ku ba n de itĩ bɛi mɔcɔ ŋa à ya maa de si lafɛ̃ɛ nŋa itĩ.

⁵ Aɔ̃ Lafɛ̃ɛ í cĩim itĩm ŋa, nɔ n kù kɔ̀ ide, n kù nɔ n kù nyiò anyi.

⁶ Inɛ ŋa iyi à waa cãm ŋa, anyim nii ǹ to nŋa, nɔ inɛ ŋa mɔ iyi à waa tu agbãm, ǹ to nŋa kɛkɛlɛm ŋa. N kù fa wajum hai bi inɛ ŋa iyi à waa tusim antɔ nɔ à waa bum.

⁷ Aɔ̃ Lafɛ̃ɛi í ya naa ku sobim, na ŋɔi í jɔ̀ n kù jɛsi iyi igũ í jɛm. Na nŋu, ǹ lele wajum nii bɛi kuta, nɔ ǹ mà iyi n kaa n dasi anyɔ.

⁸ Aɔ̃ Lafɛ̃ɛ í wa kɔkɔm, nŋui á nam ntɔ. Yooi wa bi ku yɛ taalɛm. Lafɛ̃ɛ ku naa wa awaò fei ka bɔ bi woo kiiti. Yooi wa bi ku kɔ̀m ntɔ. Lafɛ̃ɛ ku naa wa bi tom ihɛ̃.

⁹ Aɔ̃ Lafɛ̃ɛi í ya naa ku sobim. Yooi á yɛ taalem. Aŋa fei aa da a cukui bɛi ibɔ ngbo iyi tũtũ ŋa à jɛ.

I gbɔ bɛi woo ce icɛi Aɔ̃ Lafɛ̃ɛ í fɔ

¹⁰ Bii inɛ gɔ si inɔ nŋɛ í mà bɛɛrɛi Aɔ̃ Lafɛ̃ɛ, ku sotĩ ku gbɔ idei woo ce icɛɛ. Inɛ iyi wa nɛ si ilu kuku nɔ inya kumá wa gaiziaɛ, ku dasi Aɔ̃ Lafɛ̃ɛ naanɛ nɔ ku jɔ̀ gbugbãɛ ku wa si Aɔ̃ Lafɛ̃ɛɛu.

¹¹ Iŋɛ iyi ì ko ina ŋa nɔ ì waa mu ina jugula ŋa, i koo i lɔ si ina nŋɛ ŋa, ina nla nla iyi ì ko ŋau. Mii iyi Aɔ̃ Lafɛ̃ɛ í jilɛ ku ba ŋɛ mbɛ. Aa ku ŋai si wahala.