Ezai 5 - Bibeli do fee

Jĩi ndii rezɛ̃ɛi Aɔ̃ Lafɛ̃ɛ

¹ I jɔ̀ n kɔ̃a kpaasim iri gɔ wa ŋa. Ǹ wa n kɔ̃a iriui si gãmɛi ikoi rezɛ̃ɛɛ. Kpaasim nɔu í lɔ jĩi ndii rezɛ̃ɛi si lɔɔmai geete ku nɛ taasi gɔ.

² Í logoo ilɛɛi, nɔ í nya kuta ŋa iyi à wa si, í bɛi í lɔ si dimii jĩi ndii rezɛ̃ɛ iyi í bi. Si anyiɛ nɔ í ma ile si aniniɛ bɛ bii woo degbeɛ á ya wa. Nɔ í ce bi ku fɔ̃ inyii isoɛ wa degbeò jĩi ndii rezɛ̃ɛu ku so jiida jiida. Amma kù na kù ba siɛ iso jiida kãma.

³ Ŋɔi kpaasim nɔu í ni, iŋɛ inɛi Zeruzalɛmu do iŋɛ inɛi Zudaa ŋa, i kiiti nwa amu do ikoi rezɛ̃ɛm nɔu bɛ.

⁴ Mii ǹ nɛ n ce si ikou bɛ wo iyi n kù ce. Ǹ wa n degbe n ba siɛ iso ŋa wo. Amma wee n kù ba siɛ iso jiida kãma. Na mii.

⁵ Bɛbɛi, bɛi an cea jĩi ndii rezɛ̃ɛm nɔui ǹ wa n bi n sɔ̃ ŋɛ. An kpa ama jĩi ŋa iyi ǹ kaakoò ilɛui, nɔ mɛɛmu gaa ŋa a lɔ a jɔɔ. An lɛgɛ bindi iyi ǹ mau mɔi nɔ inɛ ŋa a lɔ a nɛ si.

⁶ An jɔ̀ ilɛu ku wɛɛɛ bɛɛbɛi. Inɛ kãma kaa ya teese amaawɔi jĩi ŋau, nɔ inɛ kãma kaa ya logooɛ. Jĩi ku nɛ agũ ŋa do agũ mmu ŋai aa dede a biiɛ. Nɔ n kaa n jɔ̀ ijĩ ku dũ hee ku wɔ si ilɛu.

⁷ Jĩi ndii rezɛ̃ɛi Aɔ̃ Lafɛ̃ɛi lele do ilɛu, dimii inɛi Izirɛli ŋai. Zamaai inɛi Zudaa ŋai à jɛ bɛi jĩi ŋa iyi í bi ntɔ ntɔ. Aɔ̃ Lafɛ̃ɛ í bi a maa too ntɔi wo, amma í ba wee woo kpa inɛ ŋai. Í bi a ya ce kiiti dee deei wo, amma wee anu ku dɔ̃i hai nɛ gbugbã ŋai wa gbɔ bii fei.

Inɛ ŋa iyi à waa dede idɔɔkɔ̃i Aɔ̃ Lafɛ̃ɛ

⁸ Inɔ kufɔi á jɛ ti inɛ ŋa iyi à ya maa kɔ̃ɔsi kpasɛ̃ si kpasɛ̃ nŋa ŋa, nɔ à ya maa kɔ̃ɔsi iko ŋa si iko nŋa ŋa hee ku to tengi bii aŋai aa gba inya nla nla, nɔ à wɛɛ aŋa akã si ilɛu.

⁹ Amma bɛi Aɔ̃ Lafɛ̃ɛi lele do ilɛ í sɔ̃m do kugbasi wee. Í ni, kpasɛ̃ nkpɔ nkpɔ ŋau bɛ fei, aa na a kpɔò bomma mbɛ, nɔ ile nla nla kusĩa ŋau bɛ fei, ngbɛi aa na a maa wɛɛ.

¹⁰ Ikoi jĩi ndii rezɛ̃ɛ etaa mɛɛta, bii a fɔ̃ inyiɛ, kaa ce liiti ciitaa, nɔ inɛ iyi í gbɛ̃ bilee kiloo cĩɔ, kiloo mɛɛwai á mu.

¹¹ Inɔ kufɔi á jɛ ti inɛ ŋa iyi hai iju í má daakɔ gbakã si atɛ̃ ku kpa inɛi à ya jĩ si, nɔ idũ má, do atɛ̃ui à ya gbãaò ara nŋa.

¹² Si jingau nŋɛ ŋa inɛ ŋa à ya cã mɔɔlɔ ŋa do kundigi ŋa do gãgã ŋa, nɔ à ya fã yee ŋa, nɔ à ya mɔ atɛ̃ ŋa hee ku kpa ŋa. Amma a ci ya mà mii iyi Aɔ̃ Lafɛ̃ɛ wa ce, nɔ a ci ya yɛ mii ŋa iyi wa ce.

¹³ Na ŋɔi í jɔ̀ Aɔ̃ Lafɛ̃ɛ í ni, aa mu zamaam nɔu ihɛ̃ a nɛòi, domi a kù mà nkãma. Arii á kpa inɛ ngbo nŋa ŋau, nɔ agbɛ ku kpa zamaau.

¹⁴ Na ŋɔi í jɔ̀ bi kuwai iku ŋa í cĩ gamboɛ, nɔ í cuui nla nla. Ilu bɛɛrɛ ŋa do zamaai iluu fei, bɛi aa dasi si waatii jingau nŋau.

¹⁵ Na ŋɔi í jɔ̀ inɛ fei á gulɛi nɔ ku kaye araɛ. Nɔ ilu faau ŋau fei, aa kɔmba iri ilɛi.

¹⁶ Aɔ̃ Lafɛ̃ɛi lele do ilɛ á nyisi kulaɛ, nɔ ku teese ku jilɛ kpãai dee dee ku jɛ. Nŋu Ilaaɔ̃ inɛ kumá, á nyisi kumáɛi si dee dee ku jɛɛ.

¹⁷ Iluu á kpɔò bomma hee angudã ŋa a ya koo a maa jɛ bɛ nɔ mii ŋa iyi ilu fia nŋa ŋa à nɛ, inɛ njoo ŋa aa kooi.

¹⁸ Inɔ kufɔi á jɛ ti inɛ ŋa iyi ibo í jɛ bɛi ikũ iyi wa dĩ ŋa do dulum, nɔ do nŋui à ya maa faò kurara nŋa wa do anyi nŋa bɛi à ya maa fa sarɛti.

¹⁹ Aŋai à ya maa ni, gbãa gbãai à bi ka yɛ mii iyi Aɔ̃ Lafɛ̃ɛ í nɛ ku ce. Sɔɔlui mii ŋa iyi Inɛ Kumái Izirɛliu í ce í jilɛ, ku coo ńya ńya ku ba ka yɔɔ.

²⁰ Inɔ kufɔi á jɛ ti inɛ ŋa iyi à waa kpe mii laalɔ jiida, nɔ à waa kpe mii jiida mɔ laalɔ. Aŋa iyi à ya kpaasi inya kumá ilu kuku nɔ a kpaasi ilu kuku mɔ inya kumá ŋa. Aŋa iyi à ya kpaasi mii iyi í ro ku baa didɔ̃, iyi í dɔ̃ mɔ à kpaasiɛ ku baa ku ro.

²¹ Inɔ kufɔi á jɛ tu ŋa aŋa iyi à waa lasabu iyi à jɛ ilu laakai do ilu bisi ŋa.

²² Inɔ kufɔ nla nlai bii à sinda à cɔ inɛ ŋa iyi à nya iri si atɛ̃ ku mɔ do inɛ ŋa iyi à mà atɛ̃ didɔ̃ ku nya.

²³ Inɛ iyi í nɛ taale à ya jɔ̀ɔi na amua iyi í ce, nɔ inɛ iyi kù nɛ taale kãmau, à ya kɔ̀ɔ ntɔi.

²⁴ Na nŋu, aa ce nfei bɛi fɔfɔ ngbɛ iyi wa leekĩ si icuɛ walakɔ bɛi tàkà iyi à dasi ina. Icã nŋa ŋa aa sãmii, nɔ koko nŋa ŋa a cuku a fangaa, domi à ce atafii si ikɔi Aɔ̃ Lafɛ̃ɛi lele do ilɛ, a kù saalu ideɛ, nŋu Inɛ Kumái Izirɛliu.

Aɔ̃ Lafɛ̃ɛ á kpã inɛɛ ŋau iju

²⁵ Ŋɔi idɔi Aɔ̃ Lafɛ̃ɛ í kɔ̃ si inɛɛ ŋau hee í caa nɔ í cã ŋa. Iri kuta ŋa à yaya, nɔ inɛ ŋa iyi à ku ŋa à waa sũ itĩ kpãa ŋa bɛi mii riisi ŋa. Nɔ do nŋu fei idɔɔkɔ̃ɛu kù sũ, ijuukpãu í mɔsi wa koo.

²⁶ Aɔ̃ Lafɛ̃ɛ í gũ nyinda gɔ na inɛi ilɛ jĩijĩ ŋa. Nɔ í fã foo ku kpeò inɛi ilɛ ŋau fei wa. Inɛ ŋau à nɔ à waa naa gbãa gbãa.

²⁷ Inɛ kãma kù gbɛɛji si inɔ nŋa, inɛ kãma kù koosɛ, inɛ kãma kù siiko, nɔ inɛ kãma kù sĩ njoo. Santiikii inɛ kãma kù fũ hai si gbankiliɛ, nɔ ikũi baata nŋa ŋa kù da.

²⁸ Inɛ ŋau à gbe anui afa nŋa ŋa, nɔ à katee bioo nŋa ŋa. Kɔwei acĩ nŋa ŋau à lei bɛi kuta, nɔ kutɛi sarɛtii igũ nŋa ŋau mɔ à yɛi bɛi fufu dabii.

²⁹ Bii ì waa gbɔ ibai sooge nŋa ŋau, aa ni anu ku dɔ̃i muusu nla iyei ama, walakɔ ama muusu nla iyi í ba sɔnda wa bɔ ku singaɛ bii inɛ gɔ kaa yɔɔ hee ku gbaai.

³⁰ Ajɔ nŋu bɛ iba nla nla gɔ á naa si ŋa bɛi ibai inyii tenku. Bii ì cɔ ilɛu, i kaa yɛ nkãma, í gbe ilu kuku do anu ku dɔ̃ nla nla. Kudũi ijĩ ŋai aa bii inya kumáu.