Ezai 49 - Bibeli do fee

Woo ce icɛi Aɔ̃ Lafɛ̃ɛ (iri ku kɔ̃ minjisia)

¹ I sotĩ i gbɔ idem ŋa iŋɛ inɛi gũngũm ŋa, do iŋɛ iyi ì wa hee jĩijĩ ŋa. Aɔ̃ Lafɛ̃ɛ í kpem nii hai waati iyi a kù bím wa. Hai waati iyi ǹ wa si inɔi iyem nii í kpem do irim.

² Í jɔ̀ gɛlɛm í yɛi bɛi taakuba ku dɔ̃ anu, nɔ í biim nii do awɔɛ. Í cem nii bɛi afa ku gbe anu, nɔ í singam nii si inɔ tongoɛ.

³ Nɔ í sɔ̃m í ni, Izirɛli, awɔi ì jɛ woo ce icɛm. Awɔi an so n nyisiò inɛ ŋa amboem.

⁴ Amu ǹ ya n maa n nii wo, ǹ gbɛɛji aram nii si ngbɛ. Ǹ ce nfei gbugbãm ŋai si ngbɛ. Amma nsɛi wee ì jɔ̀ ǹ mà kãm kãm iyi asaiyam do ribam, í wai bi awɔ Aɔ̃ Lafɛ̃ɛm.

⁵ Bɛbɛi Aɔ̃ Lafɛ̃ɛi wa fɔ ide, nŋu iyi í cem wa hai waati iyi ǹ wa si inɔi iyem ku ba n jɛ woo ce icɛɛ nɔ n baaò Zakɔbu wa bi titɛɛ ku ba inɛi Izirɛli ŋau fei a tɔtɔɔ wa bi titɛɛ. Aɔ̃ Lafɛ̃ɛ í jɔ̀ ǹ nɛ bɛɛrɛ, domi nŋui í jɛ gbugbãm.

⁶ Í sɔ̃m í ni n jɛ woo ce icɛi nŋu, n jɔ̀ dimii Zakɔbu ŋau a dede, nɔ n baaò inɛi Izirɛli ŋa iyi à gbe si hunde ŋau wa, iyi bɛ kù to. Í ni amui nŋu á jɔ̀ n jɛ inya kumái inɛi ilɛ ŋau ku ba faabaɛu ku bɔ hee kɔɔi andunya.

Kubaai inɛ ŋa iyi à mu à nɛò ŋau

⁷ Aɔ̃ Lafɛ̃ɛ, nŋu iyi í jɛ woo yai inɛɛ ŋa, nŋu iyi í jɛ Inɛ Kumái Izirɛliu, í ni, awɔ iyi inɛ ŋa a kù waa saalu, nɔ a kù bi ideɛ, nɔ ì jɛ aru iyi inɛ ŋa à waa taa gbugbã, waati iyi ilaalu ŋa aa yɛɛ, aa dedei hai si kitãi bomma nŋa. Waati iyi amai ilaalu ŋau aa yɛɛ, aa sɛɛbataɛi. Bɛɛbɛi aa ce a nyisiò iyi Aɔ̃ Lafɛ̃ɛ Inɛ Kumái Izirɛli, nŋu iyi í cicaɛu í jɛ ilu naanɛ.

⁸ Nɔ Aɔ̃ Lafɛ̃ɛ í fɔ má í ni, si waati jiida, ǹ jɛ kukpe iyi ì kpem nɔu. Si ajɔi faabau, ǹ naa ǹ sobiɛ. Ǹ ceɛ wai ku ba hai bi tɛɛ akabuum nɔu ku kɔ̃ si gãmɛi inɛi andunya ŋa. An dede ilɛi Izirɛliu, nɔ n nyi n kpɛ̃a inɛɛ ŋau ilɛ iyi à ce asɔɔɛu má.

⁹ Nɔ an sɔ̃ inɛ ŋa mɔ iyi à jɛ inɛi piisɔ̃ɔ ŋau n ni, i fita i naa si inya kumá ŋa. Inɛ ŋa mɔ iyi à wa si ilu kuku ŋau mɔ, nɔ n sɔ̃ ŋa n ni, i fita gbugbãa ŋa. Inɛ ŋau aa yɛi bɛi mɛɛmu gaa iyi à waa degbe si itĩ kpãa, nɔ aa ba sɔnda si iri kuta ŋa fei.

¹⁰ Ari kaa kpa ŋa má, nɔ agbɛ mɔ kaa kpa ŋa má. Inya gbãai gbaau do ti inunu kaa wahala ŋa má, domi inɛ iyi í nɛ araare nŋau á jɛ woo gbã nŋa, nɔ nŋui á gbã ŋa ku bɔò ŋa bi isɔ̃ ŋa.

¹¹ An jɔ̀ iri kuta ŋau fei a baa a jɛ kpãa jiida. Nɔ an teese kpãa ŋau feii.

¹² Inɛ ŋau wee à waa to wa, à waa baai hai jĩijĩ. Inɛ gɔ ŋa hai awɔ njɛi kpãai inunu, inɛ gɔ ŋa mɔ, hai ikpa nunui alɛ. Inɛ ŋa iyi à gbe ŋau mɔ, hai awɔ cangai kpãai inunu do ikpa Ezibiti.

¹³ Lele, dɔ̃ anu do inɔ didɔ̃. Ilɛ, jɔ̀ i wɛɛ do inɔ didɔ̃. Iŋɛ iri kuta ŋa, i kɔ̃ iri do inɔ didɔ̃ ŋa, domi Aɔ̃ Lafɛ̃ɛ í tũ idɔi inɛɛ ŋa, í nɛ araarei inɛɛ ŋa iyi à jɛ ilu are ŋa.

Amu n kaa n gbɛjɛɛ

¹⁴ Siɔ̃ɔ í ya fɔi wo ku maa ni, Aɔ̃ Lafɛ̃ɛ í fũsim awɔ. Aɔ̃ Lafɛ̃ɛ í gbɛjɛ idem.

¹⁵ Amma Aɔ̃ Lafɛ̃ɛ í jɛaa í ni, inaabo í ya gbɛjɛ idei ama ku mɔmɔɛi? Ci ya nɛ araarei amaɛ iyi í bí? Baa bii í jɛ á ce inaabo ku gbɛjɛɛi, amu n kaa n gbɛjɛɛ pai.

¹⁶ Ǹ kɔ iriɛi si ataawɔm ŋa, nɔ ǹ ya n maa n ye gigii bindiɛ ŋai waati kãma fei.

¹⁷ Zeruzalɛmu, inɛ ŋa iyi aa teese a maɛ ŋa, à waa ce saasa a ba a to wa. Inɛ ŋa iyi à lɛgɛɛ nɔ à ce nfeɛ ŋau, aa fita hai bi tɛɛi a nɛ.

¹⁸ Nɔ Aɔ̃ Lafɛ̃ɛ í ni má, wu iju i cɔ bii fei i kaakoɛ. Amaɛ ŋau fei à tɔtɔɔi à waa baa bi tɛɛ. Amu Aɔ̃ Lafɛ̃ɛ ǹ gbasii do kuwɛɛi amu takam iyi amaɛ ŋau aa yɛɛi bɛi booda iyi amanɛ í ya ce. Aa yɛɛi bɛi booda iyi abo titɔ̃ í ya dĩ si kpakaɛ.

¹⁹ Ntɔ ntɔ si aninii ilu iyi í ce kumbului ì wa, si ilu iyi inɛ ŋa à lɛgɛ nɔ zamaai ilɛɛu í kaye. Amma kaa kpɛ má, ilɛu á baa ku kere na zamaaɛ iyi á nyi wa siɛ, nɔ inɛ ŋa iyi à tako à jɔ̀ zamaau í fitau, aa nɛi hee jĩijĩ.

²⁰ Ama inɛmɔkɔɛ ŋa iyi ì tamaa ì kua ŋau, aa sɔ̃ɛi a maa ni, inyau ihɛ̃ í kere nwa hee í caa. Ce nwa inya bii aa ka ba ka buba.

²¹ Waati bɛɛbɛi aa bee araɛ i maa ni, yooi í muum amu ŋau ihɛ̃ fei. Ntɔ ntɔ, ǹ kua ŋai wo, nɔ n kù wa n cɔ baa kpãai mà an ba mmuɛ ŋa, domi à mu à nɛɛm inya mmui wo, nɔ ǹ yɛ bɛi inaabo iyi à kɔ̀si. Amma inɛ ihɛ̃ ŋa, yooi í bíi ŋa. Waati iyi amu ǹ gbe amu akã wo, iwoi inɛ ihɛ̃ ŋa à wa.

²² Ŋɔi Aɔ̃ Lafɛ̃ɛ í nyi í fɔ má í ni, an cea inɛi ilɛ ŋa nyinda, nɔ n gũa zamaa ŋa tuuta gɔ. Waati bɛɛbɛi aa baaò ama inɛmɔkɔɛ ŋau wa a maa so ŋa si ikpa nŋa, nɔ aa maa so ama inaaboɛ ŋa wa si kɔngɔ nŋa.

²³ Ilaalu ŋai aa jɛ woo bíi amaɛ ŋa, nɔ ama inaabo nŋa ŋa mɔi aa jɛ woo wo nŋa ŋa. Aa ya sɛɛbatai si wajuɛ, nɔ aa ya fá ilului kutɛɛ ŋai. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ, nɔ inɛ ŋa iyi kpãa ku cɔ nŋa í wa sim, a kaa yɛ anyɔ.

²⁴ Woo ja igũ iyi í ba mii iyi í gba wa hai si igũ, aa gba mii nɔu siɛ mái? Inɛ iyi inɛ dee dee í ba í mu, á gbã siɛ má?

²⁵ Bɛi Aɔ̃ Lafɛ̃ɛ í fɔ wee. Í ni, mii iyi woo ja igũ í ba í baaò wau, aa gbaa siɛ. Nɔ inɛ iyi ilu gbugbã í ba í mu wau, á gbã siɛ. Inɛ ŋa iyi à waa baɛ do ija, an ba ŋa ku ja, nɔ n faaba ama inɛmɔkɔɛ ŋa.

²⁶ Inɛ ŋa iyi à waa taɛ gbugbã, an jɔ̀ aŋa taka nŋa a ŋɔ ara nŋa, nɔ a mɔ njɛi ara nŋa hee ku maa kpa ŋa bɛi inɛ iyi í mɔ atɛ̃ vɛ̃ɛ titɔ̃. Do yaase bɛɛbɛ, inɛ fei á mà iyi amui ǹ jɛ Aɔ̃ Lafɛ̃ɛ woo faabaɛ. Inɛ fei á mà iyi amui ǹ jɛ inɛ iyi í yaɛ, amu Ilu gbugbãi Zakɔbu.