Ezai 48 - Bibeli do fee

Aɔ̃ Lafɛ̃ɛ wa fɔ baaui kuce titɔ̃ ŋa

¹ I sotĩ i gbɔ ŋa iŋɛ inɛi kpasɛ̃i Zakɔbu ŋa, iŋɛ iyi à waa kpe Izirɛli, nɔ ì fita wa hai si dimii Zudaa ŋa, iŋɛ iyi ì ya ce kugbasi do irii Aɔ̃ Lafɛ̃ɛ nɔ ì ya maa kpe irii Ilaaɔ̃ Lafɛ̃ɛi Izirɛli ŋa, amma i kù waa coo do jirima ŋa hee má jɛ do dee dee ku jɛ.

² Iŋɛ iyi ì ya nɛ inɔ didɔ̃ ŋa bii à waa kpe ŋɛ do irii ilu kumáu. Iŋɛ iyi gbugbã nŋɛ si Aɔ̃ Lafɛ̃ɛi Izirɛliui í wa, nŋu iyi iriɛi í jɛ Aɔ̃ Lafɛ̃ɛi lele do ilɛ, i sotĩ i gbɔ iyi ihɛ̃ ŋa.

³ Mii ŋa iyi à ce hai sinteu amui ǹ sɔ̃ ŋɛ ideɛ hai ku kpɛ, nɔ ǹ jɔ̀ ì gbɔɔ ŋa. Anu akã iyi ǹ dede, nɔ mii ŋau à ce.

⁴ Amma ǹ mà iyi iŋɛ ilu idɔ kulele ŋai, ǹ mà iyi i kù bi ide kãma ku gbɔ ŋa, nɔ itĩ nŋɛ í yika.

⁵ Na ŋɔi í jɔ̀ ǹ sɔ̃ ŋɛ baaui mii ŋau bɛ hai ku kpɛ, nɔ ǹ jɔ̀ ì gbɔɔ ŋai hee a maa ce, ku ba i maà na i fɔ i ni ŋa, iwɛ̃ nwai í coo. Nɔ i maà na i maa ni ŋa, mii iyi à ce bɛi iwɛ̃ nwau, walakɔ isɔ iyi à yɔ à ceò mii iyi í jɔɔui í jɔ̀ í ce.

⁶ Ì gbɔ ide iyi ǹ tako ǹ fɔ tã ŋa, nɔ ì yɔɔ ŋa iyi fei ndɛɛ í ce. I kaa jɛsi ŋa? To bɛbɛi, hai nnyi, laabaaui kuce titɔ̃ ŋa iyi wa singa iyi i kù mà titã ŋai ǹ wa n fɔ.

⁷ Kù jɛ mii ŋa iyi à ce hai ku kpɛ, nsɛiu ihɛ̃i an coo. I kù tako i kù gbɔ baauɛ ŋa wo, í gbe nnyiu ihɛ̃. Do yaase bɛɛbɛ, i kaa ba i koo i fɔ i ni iŋɛ ì màa tã ŋa.

⁸ Iyi í re mɔm, i kù bi ku gbɔ ŋa, nɔ i kù bi nkãma ku mà ŋa. I kù ce laakai ajɔ kãma ŋa mɔm. Ǹ mà iyi iŋɛ woo zamba ŋai nɔ hai waati iyi à bí ŋɛ wa, woo kɔ̀ ide ŋai à ya kpe ŋɛ.

⁹ Amma si na iyi í jɔ̀ ǹ jɛ Aɔ̃ Lafɛ̃ɛ, an gɛɛ idɔɔkɔ̃m nɔui. Na bɛɛrɛi irim nɔu, an temua do iŋɛi, n kaa n ce nfe nŋɛ.

¹⁰ Ǹ cɔ laakai nŋɛi, amma kù jɛ si ina bɛi à ya cea isɔ fũfũ. Ǹ cɔ laakai nŋɛi si wahala.

¹¹ Bii ǹ ce bɛɛbɛ, ǹ cooi na irii amu takam. Ntɔ ntɔ na irii amu takam nii ǹ coo, domi n kaa n yɔkɔ n jɔ̀ bɛɛrɛm ku bɛjɛ, n kaa n nɔ n jɔ̀a inɛ mmu gɔ ŋa bɛɛrɛ iyi í nɛ ku jɛ titom.

Inɛ iyi á ce mii iyi Aɔ̃ Lafɛ̃ɛ í jilɛ ku kɔ̃ɔ

¹² Ŋɔi Aɔ̃ Lafɛ̃ɛ í ni má, sotĩ i gbɔ idem ŋa Zakɔbu, awɔ Izirɛli iyi ǹ kpeu. Amui ǹ jɛ sinte nɔ amui ǹ nyi ǹ jɛ iri ku kpa má.

¹³ Do awɔm ŋai ǹ jilɛò icui ilɛ, nɔ do awɔm ŋai ǹ tɛò lele. Bii ǹ kpe mii ndii lele ŋau do iri nŋa, aŋa fei à ya fita wai.

¹⁴ Iŋɛ fei i tɔtɔɔ wa nɔ i de itĩ i gbɔ ŋa. Aɔ̃ Lafɛ̃ɛ í ni, ǹ nɛ kubii inɛ gɔ, lafɛ̃ɛi á ce mii iyi ǹ bi ku ce si gãmɛi inɛi Babilɔni ŋa. Nɔ á jɔ̀ gbugbãm ku naa si inɛi Kaladee ŋa. Si inɔ nŋɛ, laabaauu bɛ, yoo nŋɛi í sɔ̃ inɛ ŋau.

¹⁵ Amma amu ǹ fɔɔ, nɔ iyi í re mɔm, amui ǹ kpe inɛɛu ihɛ̃ ǹ jɔ̀ í naa. Nɔ icɛɛ iyi í dasi idɔ ku ceu, á cei.

¹⁶ I sɛkɛɛ wa bi titom ihɛ̃ nɔ i gbɔ ŋa. Hai sintei mii ŋau fei, n kù fɔ ide n kù singaɛ. Nɔ hai sintei mii fei, ǹ wa bɛ. Nɔ nsɛi má, Aɔ̃ Lafɛ̃ɛ í bɛm wa nɔ hundeɛ í wa sim.

Bii í jɛ ì desim itĩ wo

¹⁷ Aɔ̃ Lafɛ̃ɛ woo yaɛ Inɛ Kumái Izirɛliu í ni, amui ǹ jɛ Aɔ̃ Lafɛ̃ɛɛ. Ǹ wa n kɔɛi na aranfãanii awɔ takaɛ. Amui ǹ wa n gbãɛ si kpãa bii ì waa nɛ.

¹⁸ Ntɔ ntɔ, bii ì de itĩ do laakai ì gbɔ woodam ŋa wo, kuwee nkpɔ nkpɔi á naa siɛ bɛi inyii ido nla iyi wa cã, nɔ dee dee ku jɛɛ á yɛi bɛi kutãngãm dii inyii tenku.

¹⁹ Amaɛ ŋa do tɔkuɛ ŋa aa kpɔi bɛi saai itĩi tenku, nɔ a kaa kpa iri nŋa si wajum.

I nɛ hai Babilɔni ŋa

²⁰ I fita hai Babilɔni ńya ńya nɔ i sa hai bi inɛi Kaladee ŋau ŋa. I fɔ laabaauu ihɛ̃ hee kɔɔi andunya do anu ku dɔ̃i inɔ didɔ̃ ŋa. I sisi laabaauu ŋa. I fangaaɛ bii fei ŋa i ni, Aɔ̃ Lafɛ̃ɛ í ya dimii Zakɔbu woo ce icɛɛ.

²¹ Nŋui á maa gbã inɛɛ ŋau si gbaa, nɔ a kaa wahala do agbɛ. Á jɔ̀ inyi ku fita hai si kuta. Á jɔ̀ kutau ku lai nɔ inyi ku sɔ̃ wa hee ku maa cã.

²² Amma Aɔ̃ Lafɛ̃ɛ í ni, kuwee ŋau bɛ kaa jɛ ti inɛ laalɔ ŋa.