Ezai 47 - Bibeli do fee

Kukayei Babilɔni

¹ Ŋɔi Aɔ̃ Lafɛ̃ɛ í sɔ̃ Babilɔni í ni, Babilɔni, awɔ iyi ì yɛ bɛi ama inaabo kusĩa, kita wa hai si kitãi bommaɛ, nɔ i buba si sãa. Buba ilɛ, domi i kù jɛ abonlu má. Bɛɛrɛ ŋa iyi iriɛ í nɛu fei, ì kuaɛ mbɛ. Inɛ kãma kaa kpeɛ Kusĩa walakɔ Abo Kpaàsì má.

² So amaalɔ nɔ i lɔlɔ iyafũ. Nya fuugɛsɛ iyi wa bii wajuɛu, nɔ i ka itĩi ibɔ sisɔɛu. Jɔ̀ tãngaɛ ŋau a fita gbugbãa ku ba i kua ido.

³ Basĩɛ á fita gbugbãa inɛ ŋa a yɔɔ hee anyɔ ku muɛ. Do yaase bɛɛbɛi an sãò gbese nɔ inɛ kãma kaa ganji.

⁴ Woo ya nwa, nŋui à ya kpe Aɔ̃ Lafɛ̃ɛi lele do ilɛ. Nŋui í jɛ Inɛ Kumái Izirɛliu.

⁵ Buba, maà fɔ ide kãma nɔ i koo i manji si ilu kuku, domi ì kua bɛɛrɛi abonlu ku jɛɛ si gãmɛi bomma ŋa.

⁶ Idɔm í kɔ̃i wo si inɛm ŋau, nɔ ǹ jɔ̀ anyɔ í mu ŋa. Ǹ so ŋai wo ǹ daaɛ si awɔɛ ŋa. Amma i kù ce araare nŋa baa keeke. Ì jɔ̀ aso kuwo í tɛ mɔkɔ ngbo ntɔ ntɔ.

⁷ Ì ya maa tamaa bɛi awɔi aa jɛ abonlui andunyau hee do ajɔ fei. Amma i kù lasabu si mii iyi wa ce. I ci ya lasabu si mii iyi á na ku naa.

⁸ Na nŋu, sotĩ i gbɔ bɛbɛi, awɔ kpaasii woo bi faayi ŋa. Ì bubai wo si laakai, nɔ ì fɔ ì waa ni, amu n kù nɛ saa. Ajɔ kãma, n kaa n jɛ jaaɔ̃, nɔ n kaa n kua amam ŋa mɔ.

⁹ To, inɔ kufɔ minji ŋau bɛ fei, anu akãi á na ku boeɛ, nɔ ajɔ akãi á jɛ. Aa na i kua amaɛ ŋai anu akã, nɔ aa baa i jɛ jaaɔ̃. Nɔ iyi bɛ á baɛi baa do sɔɔlu ŋa iyi ilu iwɔɛ ŋa do woo ce dobu dobuɛ ŋau à ce à waa degbeò mii ŋau.

¹⁰ Ì dasi naanɛɛ feii si gbugbãi ilu kukuɛ ŋa. Nɔ ì ya fɔ si idɔɛ i maa ni, inɛ kãma kù waa yɛm. Si lasabuɛ, ì waa tamaa bɛi ì mà ku ce nɔ ì waa tamaa iyi ì nɛ bisi. Mii nŋu ŋau bɛi à jɔ̀ iriɛ í sinda nɔ à jɔ̀ ì waa ni, n kù nɛ saa. Baai amu baasi, inɛ gɔ kù wɛɛ má.

¹¹ Ntɔ ntɔ inɔ kufɔ á na ku naa siɛ, nɔ i kaa yɔkɔ i sindaɛ. Wahala á na ku biiɛ, nɔ i kaa yɔkɔ i nya araɛ. Fufu nla nla gɔ iyi i kù waa ce baa lasabuɛi á naa siɛ anu akã.

¹² Hanya si dobu dobu ku ceɛ ŋa do iwɔ nkpɔ nkpɔ ku ceɛ ŋa. Mii nŋu ŋaui ì wasi ku ce wa hai waatii awaasũɛ hee ì gbɛɛji araɛ si. Á yɔkɔ ku jɛ aa ba si ngɔgɔ, walakɔ ku jɛ aa yɔkɔ i naaò zigiida wa.

¹³ Ì gbɛɛji araɛ do ikɔ ŋa ku bee. Bi inɛ ŋa iyi ì waa bee ikɔ ŋau, jɔ̀ a dede a faabaɛ, aŋa iyi à mà yaasei lelei Aɔ̃ nɔ à waa cɔ leleaɔ̃ ŋa, nɔ à ya fɔ laabaaui mii iyi á baɛ si kufitai cukpa titɔ̃ ŋa.

¹⁴ Aa yɛi bɛi fɔfɔ. Ina gɔi á na ku jo ŋa, nɔ a kaa ba a saa amɛi inau. Nɔ kaa jɛ bɛi ina nyɛnyɛ keeke ŋa si bii inɛ á yɔkɔ ku sɔ̃ pɛ̃ɛ. Walakɔ bɛi inai icu alulu tengi bii inɛ í ya koo nyia.

¹⁵ Mii iyi á na ku ba inɛ ŋa iyi ì waa gbɛɛji araɛ na iri nŋa hai waatii awaasũɛu mbɛ. Aŋa iyi ì ya maa bɔ alisi ku ce bi tu ŋau, aa na a maa dabii bii fei. Kãma nŋa kaa yɔkɔ ku faabaɛ.