Ezai 46 - Bibeli do fee

Idei iwɛ̃i inɛi Babilɔni ŋa do Aɔ̃ Lafɛ̃ɛ

¹ Iwɛ̃ iyi à ya kpe Bɛliu í kua gbugbã, nɔ iwɛ̃ mɔ iyi à ya kpe Nebou í gulɛ. Ŋɔi à so iwɛ̃ ŋau à kãa mɛɛmu ŋa iyi à ya ceò icɛ. Aso ŋau, iŋɛi ì waa soo si kɔngɔ ŋa wo. Amma bɛbɛi, à baa à jɛ aso kuwo iyi à kãa mɛɛmu ŋa iyi à gbɛɛji.

² Iwɛ̃ ŋau à kua gbugbã à waa cuku, nɔ wee a kaa yɔkɔ a faaba mii ŋa iyi à jɔ ŋa ŋau. Aa so aŋa taka nŋa a nɛò ŋa ilɛ mmui.

³ Iŋɛ inɛi Izirɛli ŋa, i sotĩ i gbɔ ŋa. Iŋɛ iyi ì gbe si dimii Zakɔbu ŋa, iŋɛ iyi ǹ wa n mu hai waati iyi a kù bí ŋɛ, nɔ ǹ na ǹ wa n mu ŋɛ waati iyi à bí ŋɛ,

⁴ n kaa n kpaasi hee i koo i gboò ŋa. Bɛɛbɛi an maa n mu ŋɛ hee ntoi iri nŋɛ ŋa a koo a fũutaò. Amui ǹ taka ŋɛ, nɔ amui an maa n mu ŋɛ. Ntɔ ntɔ amui an maa n sobi ŋɛ, nɔ amui an faaba ŋɛ.

⁵ Yooi aa yɔkɔ i so i wãm do nɔ i cem saaɛ ŋa. Yooi aa yɔkɔ i so i wãm do, nɔ awaò ka jɔ njɛ.

⁶ Inɛ gɔ ŋa à ya sinda mii ndii bɔgɔ nŋa ŋai, nɔ a wã kuwoi isɔ fũfũ do ti wura nŋa ŋa. Si anyiɛ à ya so woo mà icɛi wura ku cei ku ba ku ce nŋa iwɛ̃ gɔ iyi aa ya sɛɛbata si wajuɛ a maa tɔɔɛ.

⁷ Bii à waa bɔ fei, à ya so iwɛ̃ nŋaui si kɔngɔ a maa nɛò, nɔ a na a baaò wa a jilɔɔ si agbɛɛ má. Ci ya sɛkɛɛ hai tuu bii í wa. Baa bii à waa dɔ̃ siɛ anu à waa tɔɔɛ sobi, ci ya fɔ ide kãma, nɔ ci ya faaba inɛ kãma hai si wahala.

Faaba kù jĩ má

⁸ I ye gigii iyi ihɛ̃, iŋɛ iyi i kù jɛ dee dee ŋa. I teese i mu ara nŋɛ nɔ i lasabu ŋa.

⁹ I ye gigii mii ŋa iyi à tako à ce à lɔ hai ku kpɛ ŋau ŋa. Ntɔ ntɔ amui ǹ jɛ Ilaaɔ̃, nɔ Ilaaɔ̃ mmu gɔ kù wɛɛ má. Amui ǹ jɛ Ilaaɔ̃, nɔ nkãma kù jɔm.

¹⁰ Hai sinte, ǹ fɔ mii iyi á na ku ce. Nɔ mii iyi kù ce titã, ǹ ya n fɔ ideɛ wai ku kpɛ ku bɛi ku ce. Ǹ ni, mii iyi ǹ jilɛ ku ce, an cooi. Mii iyi ǹ bi ku ce fei, an cooi.

¹¹ Hai do ikpa nunui daakɔ ǹ wa n kpe inɛ gɔ wa iyi í nɛ gbugbã bɛi kungbã. Á naai hai ilɛ jĩijĩ gɔ, ku na ku ce mii ŋa iyi ǹ jilɛ n ceu. Mii iyi ǹ fɔ, an cooi. Sɔɔlui mii iyi ǹ jilɛ n ce, an cooi.

¹² I sotĩ i gbɔ idem ŋa, iŋɛ ilu idɔ kulele ŋau, iŋɛ iyi ì jĩò dee dee ku jɛ.

¹³ Ǹ jɔ̀ dee dee ku jɛm wa sɛkɛɛ wa, nɔ kù jĩ má. Nɔ kaa kpɛ má, faabam nɔu mɔ ku to wa. An jɔ̀ faabam nɔu ku naa Siɔ̃ɔ. Ntɔ ntɔ, an jɔ̀ Izirɛli ku nɛ bɛɛrɛ.