Ezai 45 - Bibeli do fee

Sirusi inɛ iyi Ilaaɔ̃ í nya ikã

¹ Ide iyi Aɔ̃ Lafɛ̃ɛ í sɔ̃ Sirusi nŋu iyi í cica í nyaa ikãu wee. Í ni, ǹ mu awɔ njɛɛi ku ba n kɛkɛ inɛi ilɛ ŋa iyi à wa do wajuɛ ŋau, nɔ n leekĩ gbugbãi ilaalu ŋa, ku ba n cĩɛ gamboi bindii ilu ŋa iyi à sɔkɔ ŋau.

² Amu takam nii an nɛ n maa n cuaɛ do waju ku ba geete ŋau fei a munga anu. An cɛ gamboi isɔ danya ŋau, nɔ n cɛ sɔkɔi isɔ ŋau.

³ An naɛ amani ŋa iyi a kù waa yɛ ŋau do amani ŋa iyi wa singa ŋau fei. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ, nɔ amu takam nii ǹ cicaɛ, amu Aɔ̃ Lafɛ̃ɛi inɛi Izirɛli ŋa.

⁴ Na irii Zakɔbu woo ce icɛm nɔu do na inɛi Izirɛli inɛm ŋa iyi ǹ cicaui ǹ kpeɛ do iriɛ, nɔ ǹ jɔ̀ ì nɛ bɛɛrɛ baa do iyi i kù màm fei.

⁵ Amui ǹ jɛ Aɔ̃ Lafɛ̃ɛ, nɔ inɛ kãma kù jɛ saam. Bii kù jɛ amu, Ilaaɔ̃ kãma kù wɛɛ má. Amui ǹ ceɛ sɔɔlui igũ hai waati iyi i kù màm,

⁶ ku ba hai nunui daakɔ hee ku bɔ nunui alɛ, inɛ ŋa a mà iyi bii í lɔ amu, bɛbɛi inya ngbɛi. Amui ǹ jɛ Aɔ̃ Lafɛ̃ɛ, nɔ inɛ kãma kù jɛ saam.

⁷ Amui ǹ ya n ce inya kumá, nɔ amui ǹ ya n ce ilu kuku. Amui ǹ ya n naaò laakai ku sũ wa, nɔ amui ǹ ya n naaò wahala mɔ wa. Amu Aɔ̃ Lafɛ̃ɛi ǹ ya n ce fei ndɛɛ.

⁸ Ikpã ku naa hai lelei Aɔ̃, kudũi ijĩ ku jɔ̀ dee dee ku jɛ ku naa bɛi ijĩ í ya wɔ, nɔ ilɛ ku cĩ ku ba inɛ ŋa a yɛ isoi faaba, nɔ dee dee ku jɛ mɔ ku fita wa. Amu Aɔ̃ Lafɛ̃ɛi ǹ ce fei ndɛɛ.

Amà do woo ce caka

⁹ Inɔ kufɔi á jɛ ti inɛ iyi wa dɛdɛ ijai inɛ iyi í takaɛ, nŋu iyi à taka í jɛ bɛi cakai amà ŋa mɔ iyi à gbe. Amà kaa yɔkɔ ku bee woo ma caka ku ni mii wa ce. Kaa yɔkɔ ku sɔ̃ɔ ku ni icɛi awɔɛ kù sĩa.

¹⁰ Inɔ kufɔi á jɛ ti inɛ iyi wa bee baa gɔ wa ni, dimii ama yoomai ì bí, walakɔ inɛ iyi wa bee iyei ama gɔ wa ni, dimii mii ì bí si andunya.

¹¹ Aɔ̃ Lafɛ̃ɛ Inɛ Kumái Izirɛli, nŋu iyi í taka ŋau í ni, à waa bi a beem ide si gãmɛi mii iyi á na ku cei? À waa bi a nam wooda ŋa si gãmɛi amam ŋa do si icɛi awɔm ŋai?

¹² Amui ǹ ce ilɛ, nɔ ǹ taka amanɛ ŋa ǹ jɔ̀ à wa si ilɛu. Amui ǹ ce lele, nɔ amui ǹ wa n na leleaɔ̃ ŋa wooda.

¹³ Amui ǹ jɔ̀ Sirusi í dasi kpãa wa na dee dee ku jɛm. Nɔ an saabu si mii iyi á ce fei. Nŋui á teese ku ma Zeruzalɛmu ilum nɔu, nɔ ku jɔ̀ inɛm ŋa iyi à mu wa ŋau a nɛ hai nɛ ngɔgɔ ku sã nɔ ku maà nɛ amua gɔ ŋa ku ce. Aɔ̃ Lafɛ̃ɛi lele do ilɛui í fɔ bɛɛbɛ.

Izirɛli, Ilaaɔ̃ í wa bi titɛɛ

¹⁴ Aɔ̃ Lafɛ̃ɛ í ni, ribai icɛi inɛi Ezibiti ŋa, do aranfãani ŋa iyi inɛi Etiopi ŋa à waa ba, do iyi inɛi Seba ŋau fei à waa ba, aŋa inɛ doogo ŋau, fei ndɛɛ á naai bi titɛɛ, nɔ titɛɛ mɔi á jɛ. Inɛ ŋau bɛ aa maa nɛi do anyiɛ, nɔ aa kpati ŋai do sesee ŋa. Aa naa a sɛɛbatai si wajuɛ nɔ a maa tɔɔɛ. Aa fɔ a maa ni, bi tɛɛi Aɔ̃ Lafɛ̃ɛ í wa, nɔ nŋu akãi í jɛ Ilaaɔ̃.

¹⁵ Awɔ Aɔ̃ Lafɛ̃ɛi Izirɛli, awɔ woo faabau, ntɔ ntɔ awɔ Ilaaɔ̃ iyi wa manjii.

¹⁶ Ŋɔi woo ce mii ŋa iyi à jɔ iwɛ̃ ŋau anyɔ í mu aŋa fei, nɔ bɛɛrɛ nŋa í kaye, nɔ aŋa fei à waa nɛ do anyɔ.

¹⁷ Amma Izirɛli inɛ nŋu, hai bi Aɔ̃ Lafɛ̃ɛi í ba faaba hee do ajɔ fei. Inɛ nŋu kaa dasi anyɔ ajɔ kãma.

Woo taka wa fɔ ide

¹⁸ Aɔ̃ Lafɛ̃ɛi í ce lele, nŋu iyi í jɛ Ilaaɔ̃ iyi í ce ilɛ nɔ í jɔ̀ í nɛ gbugbã. Kù coo ku maa wɛɛ ngbɛ, amma í cooi ku ba amanɛ ku wa si. Bɛi í fɔ wee. Í ni, amui ǹ jɛ Aɔ̃ Lafɛ̃ɛ. Ilaaɔ̃ mmuɛ kãma kù wɛɛ má.

¹⁹ Nɔ Aɔ̃ Lafɛ̃ɛ í ni má, ide iyi ǹ fɔ, n kù manji n kù fɔɔ, kù nɔ kù jɛ si inyai ilu kuku gɔi ǹ fɔɔ si ilɛu ihɛ̃. N kù sɔ̃ tɔkui Zakɔbu ŋa n kù ni a dɛdɛɛm si inya ngbɛ. Amu Aɔ̃ Lafɛ̃ɛ, iyi í jɛ dee dee do iyi í tɛi ǹ ya n fɔ.

Idɔ ku kpaasii dimi mmu ŋa

²⁰ Iŋɛ dimi mmu ŋa iyi ì fita si ŋau, i tɔtɔɔ i naa wa ŋa. Iŋɛ fei i naa wa ŋa. Inɛ ŋa iyi à waa so jĩi ŋa iyi à gbe à jɛ iwɛ̃ nŋa ŋau, nɔ à waa tɔɔ iwɛ̃ ŋa iyi a kaa yɔkɔ a faaba ŋa ŋau, a kù nɛ kumà.

²¹ I fɔ ide, nɔ i nyisi nyinda nŋɛ ŋa wa ŋa. Iŋɛ fei i tɔtɔɔ i busi njɛ ajɔ ŋa. Yooi í jɔ̀ à gbɔ baaui mii iyi wa ce nnyiu ihɛ̃ hai ku kpɛ, nɔ hai waati bɛɛbɛ, yooi í fɔ baauɛ. Kù jɛ amu Aɔ̃ Lafɛ̃ɛ? Bii baam í lɔ, Ilaaɔ̃ mmuɛ gɔ kù wɛɛ má iyi í jɛ dee dee nɔ í jɛ woo faaba. Kù wɛɛ má, í gbe amu akã.

²² Iŋɛ iyi ì wa hee kɔɔi andunyau fei, i sinda wa bi tom nɔ i ba faaba ŋa, domi amui ǹ jɛ Aɔ̃ Lafɛ̃ɛ, nɔ Ilaaɔ̃ mmu gɔ kù wɛɛ má.

²³ Nɔ Aɔ̃ Lafɛ̃ɛ í nyi í ni má, ǹ gbasi do irii amu takam, ide iyi í jɛ dee deei í ya fita hai si gɛlɛm. Nɔ ide iyi í fita wa hai si gɛlɛm kaa kpaasi má. Ilugũ fei á gulɛi si wajum, nɔ gɛlɛ fei á ya ce kugbasii do irim.

²⁴ Aa ya fɔi a maa ni, bi Aɔ̃ Lafɛ̃ɛ nŋu akãi dee dee ku jɛ do gbugbã ku nɛ í wa. Inɛ ŋa iyi à waa muu do idɔɔkɔ̃ ŋau fei, aa naa bi tɛɛi do anyɔ.

²⁵ Do saabui Aɔ̃ Lafɛ̃ɛi tɔkui Izirɛli ŋau fei aa jɛò dee dee, nɔ siɛi inɔ didɔ̃ nŋa fei á wa.