Ezai 44 - Bibeli do fee

¹ To, nsɛi, awɔ dimii Zakɔbu woo ce icɛm, awɔ zamaai Izirɛli iyi ǹ cicau, sotĩ i gbɔ.

² Amu Aɔ̃ Lafɛ̃ɛ, amu iyi ǹ ceɛ nɔ ǹ rɔɛ hai si inɔi iyeɛ hee a maa bíɛ wa, amu iyi ǹ jɛ sobiɛ, ide iyi ǹ wa n sɔ̃ɛ wee. Maà jɔ̀ njo ku muɛ, awɔ dimii Zakɔbu woo ce icɛm, awɔ Yesurunu iyi ǹ cicau.

³ Ntɔ ntɔ, ilɛ hai nɛ mandiu, an fãsi inyi, nɔ n jɔ̀ inyiu ku maa cã si ilɛ ngbɛu. An jɔ̀ hundem ku naa si amaɛ ŋa nɔ kuweem ku naa si tɔkuɛ ŋa.

⁴ Aa fitai nɔ a maa la bɛi jĩi ŋa iyi à wa itĩi ido.

⁵ Nɔ inɛ ihɛ̃ á ni, ti Aɔ̃ Lafɛ̃ɛi ǹ jɛ. Inɛ mmu gɔ mɔ á bi a maa kpe nŋu do irii Zakɔbu. Inɛ mmu gɔ mɔ á kɔ si awɔɛ ku ni, ti Aɔ̃ Lafɛ̃ɛ, nɔ irii Izirɛlii aa naa.

Ilaaɔ̃ mmuɛ gɔ kù wɛɛ má

⁶ Aɔ̃ Lafɛ̃ɛ, nŋu iyi í jɛ ilaalui inɛi Izirɛli ŋa nɔ í jɛ woo ya nŋa, nŋu iyi í jɛ Aɔ̃ Lafɛ̃ɛi lele do ilɛ í ni, amui ǹ jɛ sinte nɔ amui ǹ jɛ iri ku kpa. Baai amu baasi, Ilaaɔ̃ mmuɛ gɔ kù wɛɛ má.

⁷ Yooi í yɛ bɛi amu má. Lafɛ̃ɛ ku fɔ ide hee lele. Ku sisiim fei ndɛɛ nɔ ku nyisim wa hai waati iyi ǹ taka amanɛ sinte ŋau, nɔ ku sisia inɛ ŋa mii ŋa iyi á na ku ce iyi kù to wa titã.

⁸ Iŋɛ zamaam ŋa, i maa jɔ̀ zigi nŋɛ ku da, nɔ i maa jɔ̀ njo ku mu ŋɛ. Hai ku kpɛ tã, ǹ sɔ̃ ŋɛ wo, nɔ iŋɛi ì jɛ sɛɛdam ŋa. Baai amu baasi, Ilaaɔ̃ mmuɛ gɔ í wɛɛ má? Aawo, kuta bi ku manji mmuɛ kãma kù wɛɛ má. N kù mà kuwɛɛi baa akã.

Woo ce mii ŋa iyi à jɔ iwɛ̃ ŋa

⁹ Woo ce mii ŋa iyi à jɔ iwɛ̃ ŋau fei, inya ngbɛ ŋai. Icɛ kusĩa nŋa iyi à waa ce fei, ngbɛi. Iwɛ̃ ŋaui aa jɛ sɛɛda nŋa, iwɛ̃ ŋa iyi a kù waa yɛ nkãma, nɔ a kù mà nkãma. Iwɛ̃ ŋau aa na a jɔ̀ anyɔ ku bii ŋai.

¹⁰ Inɛ iyi wa rɔ iwɛ̃, walakɔ í so ngɔgɔ í yɔɔ si bii gɔ í ceò iwɛ̃ iyi kaa yɔkɔ ku ce nkãma, mii hai nɛ yaasei.

¹¹ Inɛ ŋa iyi à nɛ baa si iwɛ̃ ŋau ku ce fei, aa yɛ anyɔi. Woo ce icɛi awɔ ŋa iyi à ya maa coo ŋau, aŋa taka nŋa amanɛ ŋai. Aŋa fei a tɔtɔɔ wa nɔ aŋa fei a naa. Njo á mu ŋa, nɔ aŋa fei aa yɛ anyɔi.

¹² Bii gbɛdɛ wa bi ku ce dagba, í ya ce icɛi do ina nyɛnyɛ, nɔ ku cã isɔu do mataaka ku bɛi ku ce dagbau bɛi í bi. Í ya ce icɛ gbugbãi do awɔɛ, amma bii ari wa kpaa, gbugbãɛ í ya tãi. Nɔ bii agbɛ wa kpaa, gbugbãɛ í ya tãi.

¹³ Woo gbe jĩi í ya wãai do ikũ, si anyiɛ nɔ ku ce mii gɔ iyi í jɔ amanɛ iyi wa bi ku ce do gaawu, si anyiɛ ku bɛi ku ce si icɛ do amaanya. Bii í ce bɛɛbɛ í tã, nɔ ku yɔrɔɛ do jĩnɛi icɛ gɔ iyi à ya kpe raboo. Í ya cooi ku jɔ̀ ku yɛ bɛi amanɛ, nɔ ku cea wajui amanɛ kusĩa, ku bɛi ku jɔ̀ ku maa wa si inɔ ile.

¹⁴ Í ya bu jĩi ndii sɛɛdi ŋai, do jĩi ndii sɛni ŋa iyi í jɔ̀ à la si jĩi ndii inɔ agbo ŋau. Í ya lɔ dimii jĩi ŋa iyi à ya kpe pɛ̃ɛui, nɔ ijĩ ku jɔ̀ a maa la.

¹⁵ Jĩi nɔui inɛ ŋa à ya so a koò ina nɔ do nŋui à ya koò ina iyi aa nyiaò. Jĩi nɔui à ya so a koò ina a tɛkɛò sɔnda, nɔ nŋui à ya nyi a so a ceò iwɛ̃ má nɔ a maa gulɛaa. À ya ce iwɛ̃ui nɔ a gulɛ a maa tɔɔɛ.

¹⁶ Yaase bɛi à ya ce mbɛ do jĩi akãu. Bubui jĩi nɔui à ya so má a koò ina a bandaò iŋa nŋa nɔ a ŋɔ hee a yo. Nŋui à ya so a koò ina má nɔ a maa ni, aa, aa, ǹ wa n nyia, nɔ ǹ wa n yɛ amɛi inau.

¹⁷ Nɔ do jĩi bubu iyi í gbeui à ya ceò mii iyi í jɔ iwɛ̃ nɔ a gulɛ si wajuɛ a maa tɔɔɛ a maa ni, awɔi ì jɛ iwɛ̃m, faabam.

¹⁸ Inɛ ŋau a kù nɛ kumà, nɔ a kù nɛ bisi. Iju nŋa wa bii hee í jɔ̀ a kù waa yɛ ilu. Bɛɛbɛi idɔ nŋa mɔ í yɛ hee í jɔ̀ a kù nɛ yaase jiida kãma.

¹⁹ Inɛ kãma ci ya lasabu, nɔ inɛ kãma kù nɛ yaase jiida walakɔ bisi hee ku fɔ ku ni, bubui jĩi nɔu ihɛ̃i ǹ so ǹ koò ina, nɔ do nyɛnyɛui ǹ tɛkɛò sɔnda. Do nŋui ǹ bandaò iŋa ǹ ŋɔ. Nɔ bubu iyi í gbeui ǹ ceò mii laalɔ. Si wajui sɔmbɔ kusii iyi í gbeui ǹ ya n naa n maa n gulɛ.

²⁰ Ntɔ ntɔ lasabu nŋa fei, si ilúlu iyi kù re nkãmau bɛi í wa. Lasabu nŋa í yaa, nŋui í jɔ̀ à nyɔ. Iwɛ̃ nŋau kaa yɔkɔ ku faaba ŋa, nɔ aŋa taka nŋa a ci ya fɔ a ni iboi aŋa à waa mu si awɔ.

Awɔ woo ce icɛm nii, maà gbɛjɛ

²¹ Zakɔbu, awɔ dimii Izirɛli, ye gigii iyi ihɛ̃, awɔ woo ce icɛm nii. Ǹ ceɛi ku ba i jɛ woo ce icɛm. Izirɛli, n kaa n gbɛjɛ ideɛ pai.

²² Ǹ nya kuraraɛ ŋai bɛi kudũi ijĩ í ya nya, nɔ do yaase bɛɛbɛ mɔi ǹ nyaò dulum dɛɛ ŋa mɔ. Na nŋu, sinda i nyi wa bi titom, domi amui ǹ yaɛ.

²³ Ntɔ ntɔ, Aɔ̃ Lafɛ̃ɛi í ce iyi bɛ. Na nŋu, lele, dɔ̃ anu do inɔ didɔ̃. Lɛlɛi ilɛ, dakpɛa. Iŋɛ iri kuta ŋa, i dɔ̃ anu do inɔ didɔ̃ ŋa. Nɔ iŋɛ mɔ jĩi ŋa do agbo ŋa, i ce bɛɛbɛ ŋa, domi Aɔ̃ Lafɛ̃ɛ í ya Zakɔbui, nɔ í nyisi bɛi amboeɛ í to si faabai Izirɛli.

Woo takai andunyaui í jɛ lafɛ̃ɛi mii iyi wa ce fei

²⁴ Izirɛli, Aɔ̃ Lafɛ̃ɛ woo faabaɛ, nŋu iyi í rɔɛ hai waati iyi a kù bíɛ wa wa sɔ̃ɛ í ni, amui ǹ jɛ icui mii iyi í wɛɛ fei. Amu akãi ǹ tɛ lele do ilɛ, kù jɛ do sobii inɛ kãma.

²⁵ Nyindai mii ŋa iyi ilu faau ŋa à fɔ ideɛ, amui ǹ ya n ganji ku ce, nɔ amui ǹ ya n fɔtɔtɔi lasabui woo ce alisi ŋa, nɔ amui ǹ ya n jɔ̀ ilu laakai ŋa a nyi do anyi, nɔ ǹ ya n jɔ̀ kumà nŋa ku baa ku jɛi bɛi idei sũmu.

²⁶ Amui ǹ ya n jɔ̀ idei woo ce icɛm ku ce, nɔ mii ŋa iyi woo bɛm ŋa à fɔ à jilɛ, ǹ ya n jɔ̀ ku cei dee dee. Amui ǹ fɔ si gãmɛi Zeruzalɛmu ǹ ni, zamaa nkpɔ nkpɔi á nyi wa ku naa ku buba bi titɛɛ, nɔ bɛɛbɛ mɔi á jɛ do ilui Zudaa ŋau mɔ. Aa teese a ma ŋai, nɔ a dede idĩ nŋa ŋau.

²⁷ Amui ǹ ya n sɔ̃ inyii boa n ni ku gbɛ hee do inyii ido nla ŋa fei.

²⁸ Amui ǹ fɔ si gãmɛi Sirusi ǹ ni, woo degbe iyi ǹ cicai. Nŋui á jɔ̀ mii ŋa iyi ǹ bi fei ku ce. Nŋui á na wooda, ku jɔ̀ a teese a ma ilui Zeruzalɛmu, nɔ a teese a ma kpasɛ̃i Aɔ̃ Lafɛ̃ɛu.