Ezai 43 - Bibeli do fee

¹ Bɛbɛi awɔ Zakɔbu, awɔ iyi ǹ taka, amu Aɔ̃ Lafɛ̃ɛ amu iyi ǹ ceɛ, awɔ dimii Izirɛli ǹ ni, maà jɔ̀ njo ku muɛ, domi ǹ yaɛ mbɛ, nɔ ǹ kpeɛ do iriɛ. Titom nii ì jɛ.

² Bii ì waa kua inyi, an wɛɛ do awɔ. Nɔ bii ì waa kua ido ŋa, inyi kaa nɛòɛ. Bii ì waa nɛ si ina ì waa kua, kaa joɛ nɔ amɛi inau kaa ceɛ nkãma.

³ Ntɔ ntɔ, amui ǹ jɛ Aɔ̃ Lafɛ̃ɛɛ Inɛ Kumái Izirɛli iyi í jɛ woo faabaɛu. Ezibitii an na ku jɛ mii iyi an sã n jɔ̀ i nɛò araɛ. Etiopi do Seba ŋa mɔi an na si agbɛɛ.

⁴ Si bɛi ì nɛ bɛɛrɛ si wajum, nɔ ntɔ ntɔ ì jɛ inɛ iyi ǹ wa n saalu, nɔ ǹ nɛ kubiɛ, na nŋui í jɔ̀ an na inɛ ŋa si agbɛɛ, nɔ an na dimi gɔ ŋa n yaò kuwɛɛɛ.

⁵ Na nŋu, maà jɔ̀ zigiɛ ku da, domi ǹ wɛɛ do awɔ. Hai do ikpa nunui daakɔ wa, an jɔ̀ tɔkuɛ ŋa a baa, nɔ hai do ikpa nunui alɛ, an tɔtɔɔ inɛɛ ŋau wa.

⁶ An sɔ̃ inɛi awɔ njɛi kpãai inunu ŋa n ni, i sindo ŋa, nɔ n sɔ̃ inɛi awɔ cangai kpãai inunu ŋau mɔ n ni, i maà gɛɛ ŋa. I jɔ̀ ama inɛmɔkɔm ŋau a baa hai jĩijĩ bii à wau, nɔ ama inaabom ŋau mɔ a baa hai kɔɔi ilɛu.

⁷ Inɛ ŋa iyi à waa kpe ŋa do irim nɔu fei, i jɔ̀ a baa wa ŋa. Ǹ taka ŋai nɔ ǹ ce ŋa ku ba a nyisi amboem.

Iŋɛi ì jɛ sɛɛdam ŋa

⁸ A fitaò inɛ ŋa iyi à nɛ iju amma a kù waa yɛ ilu, do inɛ ŋa iyi à nɛ itĩ amma a kù waa gbɔ ide.

⁹ Inɛi ilɛ ŋau fei a tɔtɔɔ wa, nɔ zamaa fei ku tɔtɔɔ wa. Yooi si inɔ nŋa á yɔkɔ ku sɔ̃ wa mii iyi á na ku ce. Mà yooi si inɔ nŋa í tako í sɔ̃ wa mii iyi í ce tã wo. Lafɛ̃ɛ ŋa a naaò inɛ ŋa iyi à jɛ sɛɛda nŋa wa nɔ a nyisi iyi aŋa à nɛ ntɔ. Aa ka desi ŋa itĩ nɔ ka fɔ ka ni, ntɔi.

¹⁰ Ŋɔi Aɔ̃ Lafɛ̃ɛ í fɔ má í ni, iŋɛ inɛm ŋa, iŋɛi ì jɛ sɛɛdam ŋa. Iŋɛi ì jɛ bɛi woo ce icɛm iyi ǹ cica. Mii iyi ǹ wa n lelei í jɛ, i màm ŋa nɔ i dasim naanɛ ŋa nɔ i gbɔ yaasei inɛ iyi ǹ jɛ ŋa. Ilaaɔ̃ kãma kù cuaam wa, nɔ si anyim, inɛ mmu kãma kù wɛɛ má.

¹¹ Amu akãi ǹ jɛ Aɔ̃ Lafɛ̃ɛ. Bii baam í lɔ, woo faaba gɔ kù wɛɛ má.

¹² Amui ǹ jɛ inɛ iyi í naaò faaba wa, amu mɔi ǹ nɔ ǹ fɔ ideɛ, nɔ amui ǹ jɔ̀ inɛ ŋa à waa gbɔɔ. Kù jɛ iwɛ̃ gɔ iyi í wa bi tu ŋɛ. Nɔ Aɔ̃ Lafɛ̃ɛ í ni má, iŋɛ ì jɛ sɛɛda ŋa iyi amui ǹ jɛ Ilaaɔ̃,

¹³ nɔ si Ilaaɔ̃ ku jɛu bɛi an maa n wa. Inɛ kãma kaa tilasim si ngɔgɔ ku ce, nɔ mii iyi ǹ wa n ce, inɛ kãma kaa kpaasiɛ.

Ǹ wa n bɛ nŋɛ inɛ gɔ wa

¹⁴ Aɔ̃ Lafɛ̃ɛ Inɛ Kumái Izirɛli, nŋu iyi í jɛ woo ya nŋɛu, í fɔ í ni, na iri nŋɛi ǹ bɛ inɛ gɔ wa Babilɔni. Nŋui á jɔ̀ gambo ŋau fei a cuku. Bi inɛi Babilɔni ŋau, anu ku dɔ̃i inɔ didɔ̃ ŋau aa baa a kpaasi kukpata ŋai.

¹⁵ Amui ǹ jɛ Aɔ̃ Lafɛ̃ɛ Inɛ Kumá nŋɛ, amui ǹ jɛ woo takai Izirɛli, nɔ amui ǹ jɛ ilaalu nŋɛ.

Kpãa titɔ̃ gɔ iyi í wa si gbaa

¹⁶ Ide iyi Aɔ̃ Lafɛ̃ɛ í fɔ wee, nŋu iyi í tako í nya kpãa wo si tenku, nɔ í ce bi ku kua si inyi iyi í jĩisa.

¹⁷ Tako wo, nŋui í jɔ̀ sarɛti ku ce igũ ŋa do acĩ ŋa à fita à waa nɛ, do sooge ŋa do woo mà igũ ku ce ŋa. Ŋɔi aŋa fei à koo à cuku, nɔ a kù yɔkɔ a kù dede má. Tengi bɛi à sũ hee do ajɔ fei.

¹⁸ Aɔ̃ Lafɛ̃ɛ í ni, i maà ye gigii mii ndii tako ŋa iyi à lɔu má ŋa, nɔ i maà jɔ̀ mii iyi í ce í lɔ do anyi ku maa fa laakai nŋɛ má ŋa.

¹⁹ Mii titɔ̃i ǹ wa n ce bɛbɛi, nɔ hai nsɛi í cɛ̀ ku fita mɔm tã. I kù waa yɔɔ ŋa? Ntɔ ntɔ, an nya kpãa gɔ si gbaa, nɔ an ce ido ŋa si ilɛ ngbɛ bii inyi kù wa.

²⁰ Mɛɛmui sako ŋa aa mà bɛɛrɛm. Hai ajaako ŋa do taataa ŋa aa mà bɛɛrɛm, domi ǹ jɔ̀ inyi wa cã si gbaa nɔ ǹ ce ido ŋa si ilɛ ngbɛ bii inyi kù wau ku ba inɛm ŋa iyi ǹ cicau a ba inyi ku mɔ.

²¹ Zamaa iyi ǹ takau á kɔ̃ irii ku maa saabum.

Aɔ̃ Lafɛ̃ɛ wa kiiti zamaaɛu

²² Aɔ̃ Lafɛ̃ɛ í ni, Zakɔbu, kù jɛ amui ì kpe. zamaai Izirɛli ì gbɛɛji do amui.

²³ I kù ceem kuwee ŋa iyi à ya jo si ina fei sãa sãa do angudã walakɔ do iwo. Kuweeɛ ŋa iyi ì ya ce, kù jɛ na bɛɛrɛm. N kù tilasiɛ i ceem kuweei amaajɛ ŋa, n kù nɔ n kù gbɛɛjiɛ do tuae ŋa iyi à ya jo ku bee.

²⁴ Kù jɛ na irim nii ì ya ra amaawɔi jĩi ku dɔ̃ inunu ŋau do fia nkpɔ nkpɔ. Kù nɔ kù jɛ amui ì ya jɔ̀ n ŋɔ ikpoi iŋai kuweeɛ ŋa n yo. Amma ì kãam dulum dɛɛ ŋa, nɔ ì gbɛɛjim do kuraraɛ ŋau.

²⁵ Amma amu, amu akãi ǹ jɛsi n ceɛ suurui ide kukɔ̀ɛ ŋau, nɔ n maà n ye gigii dulum dɛɛ ŋau má.

²⁶ Yem gigii si afe bii ì waa yɛ taalem, nɔ awaɛ fei ka wũaa ideu bɛ. Kà mii ŋa iyi í ce iyi á naɛ ntɔ wa.

²⁷ Inɛ iyi í jɛ bala sinteɛ í ce dulum, nɔ inɛ ŋa iyi à sisi nŋɛ idem ŋau mɔ, à ce ide kukɔ̀ bi titom.

²⁸ Na ŋɔi í jɔ̀ ǹ dasi ilaalu ŋa iyi ǹ nya ikã ŋau anyɔ nɔ ǹ jɔ̀ zamaai Zakɔbuu í dasi nfe ku ce. Ǹ fũsi Izirɛli awɔ, ǹ jɔ̀ mbɛɛɛ ŋa à wasi ku buu.