Ezai 42 - Bibeli do fee

Woo ce icɛi Aɔ̃ Lafɛ̃ɛ (iri ku kɔ̃ sinte)

¹ Ŋɔi Aɔ̃ Lafɛ̃ɛ í ni, inɛ ihɛ̃i í jɛ woo ce icɛm. An maa n muui si awɔ. Nŋui ǹ cica, nɔ nŋui ǹ bi. Nŋui ǹ daa si hundem. Nŋui á jilɛa inɛi ilɛ ŋa asaiya.

² Kaa dɔ̃ anu, nɔ kaa maa la hee lele. Kaa jɔ̀ inɛ ŋa a maa gbɔ imuɛ si bantuma ŋa.

³ Amaawɔi jĩi iyi í ka tã, kaa cɔɔ. Ikũi fitila iyi inaɛ í naa í dɛ, kaa kpaa. Asaiya iyi amu Aɔ̃ Lafɛ̃ɛ ǹ jilɛu, ideɛi á fɔ dee dee.

⁴ Gbugbãɛ kaa kaye nɔ kaa jɔ̀ a kãmiaɛ hee koo jilɛò asaiyau si andunyau fei. Inɛ ŋa iyi à wa si gũngũm ŋau, à waa degbe woodaɛu.

Inya kumá iyi í jɛ ti inɛi ilɛ ŋa

⁵ Aɔ̃ Lafɛ̃ɛ, nŋu iyi í taka lelei Aɔ̃ si bɛi í cĩ í tou bɛ fei, nŋu iyi í taka ilɛ do jĩi ndɛɛ ŋau, nŋu iyi í jɔ̀ inɛɛ ŋa à waa wɛɛ, nŋu iyi í muaa inɛ ŋa iyi à wa si ilɛu fei ami, í sɔ̃ inɛ iyi í cicau í ni,

⁶ amu Aɔ̃ Lafɛ̃ɛ, ǹ kpeɛ wai na dee dee ku jɛi amu takam, nɔ ǹ wa n muɛi si awɔ. Ǹ wa n degbeɛ nɔ ǹ jilɛɛ ku ba i jɛ icui akabuu iyi amu do zamaau aa ka dĩ, nɔ i jɛ inya kumái inɛi ilɛ ŋau.

⁷ Awɔi aa jɔ̀ fɛɛju ŋa a yɛ ilu, nɔ inɛ ŋa iyi à waa mu si ile piisɔ̃ɔ, awɔi aa nya ŋa. Nɔ inɛ ŋa mɔ iyi à waa mu si ilu kuku, awɔi aa nya ŋa wa.

⁸ Amui ǹ jɛ Aɔ̃ Lafɛ̃ɛ, nɔ irim nii mbɛ. N kaa n na inɛ mmu gɔ amboem, nɔ n kaa n na iwɛ̃ ŋa bɛɛrɛm.

⁹ Mii ndii tako ŋa à ce à lɔ tã. Bɛbɛi, idei mii titɔ̃ ŋa iyi á na ku cei ǹ wa n fɔ. Nɔ ǹ wa n sɔ̃ ŋɛi hee ku na ku maa ce.

Aɔ̃ Lafɛ̃ɛ í fita bɛi woo ja igũ

¹⁰ I kɔ̃a Aɔ̃ Lafɛ̃ɛ iri titɔ̃ ŋa. I kɔ̃ iri i cũu ŋa hee ku bɔ kɔɔi andunya, iŋɛ iyi ì waa ce isɛɛnɛ si tenku ŋa do iŋɛ iyi ì wa si inɔɛ fei ŋa, hee ku koo si inɛ ŋa iyi à wa si gũngũm ŋau fei.

¹¹ Inɛ ŋa iyi à wa si ilui gbaa ŋau a dɔ̃ anu do inɔ didɔ̃. Nɔ inɛ ŋa mɔ iyi à wa si ilu keekei Kedaa ŋau fei a kɔ̃ iri do inɔ didɔ̃. Inɛ ŋa iyi à wa Sela ŋau mɔ a dɔ̃ anu do inɔ didɔ̃. A dɔ̃ anui igũ ku jɛ hai si antaii iri kuta ŋau.

¹² Inɛi gũngũm ŋau a kɔ̃ iri a na Aɔ̃ Lafɛ̃ɛ bɛɛrɛ, nɔ a maa cũu hee lele do gbugbã.

¹³ Aɔ̃ Lafɛ̃ɛ í fita wa nɛ wa bɛi sooge iyi í mà igũ ku ja. Kɔdɛɛi igũ ku ceu wa muui bɛi woo ce igũ. Í dɔ̃ anui igũ do gbugbã, wa yaakoò mbɛɛɛ ŋa.

Mii iyi Aɔ̃ Lafɛ̃ɛ í jilɛ ku ce

¹⁴ Ŋɔi Aɔ̃ Lafɛ̃ɛ í ni, hai ku kpɛi ǹ wa n coko, n kù fɔ ide kãma, ǹ wa n mu aram. Amma nsɛi, ǹ wa n kakaa bɛi inaabo iyi wa gbɔ ara kuroi kubí. Ami wa dam nɔ gɛndɛm í wasi ku jojo.

¹⁵ An jɔ̀ iri kuta do geete ŋa a baai bɛi gbaa. An jɔ̀ fɔfɔ tũtũ do jĩi ŋau fei a baa a gbɛi. An jɔ̀ inyii ido nla ŋau a gbɛi a baa a jɛ bɛi gũngũm ŋa, nɔ an jɔ̀ inyii fatama ŋau fei a gbɛi.

¹⁶ An gbã fɛɛju ŋa n tooò ŋa si kpãa gɔ iyi a kù mà wo. An gbã ŋai n jɔ̀ a too si kpãa ŋa iyi a kù mà wo. Si waju nŋa an kpaasi ilu kuku n jɔ̀ ku baa ku jɛ inya kumá, nɔ ilɛ iyi í nɛ bi ku koosɛ ŋau, an jɔ̀ ku baa ku jɛ kpãa ku munga anu. Nɔ dee dee mii iyi an ce mbɛ. N kaa n jɔ̀ɔ iyi n kù coo.

¹⁷ Inɛ ŋa iyi naanɛ nŋa í wa si iwɛ̃ ŋa nɔ à ya maa sɔ̃ iwɛ̃ ŋa iyi à ce do isɔ ŋa iyi à yɔ ŋau a maa ni, iŋɛi ì jɛ lafɛ̃ɛ nwa ŋa, inɛ ŋau aa naa a nyi do anyii nɔ a yɛ anyɔ.

Zamaa iyi í jɛ fɛɛju nɔ í jɛ dekĩ

¹⁸ Ŋɔi Aɔ̃ Lafɛ̃ɛ í ni, iŋɛ dekĩ ŋa i sotĩ i gbɔ ŋa. Iŋɛ fɛɛju ŋa, i cĩ iju i cɔ ŋa.

¹⁹ Yooi í jɛ fɛɛju, bii kù jɛ woo ce icɛm nɔu. Yooi í jɛ dekĩ bɛi inɛ iyi ǹ wa n bɛu. Yooi í jɛ fɛɛju bɛi inɛ iyi í ba laakai ku sũu. Yooi í jɛ fɛɛju bɛi woo ce icɛi amu Aɔ̃ Lafɛ̃ɛu.

²⁰ Mii nkpɔ nkpɔi í yɛ, amma kù ce laakai. À cĩa itĩɛ, amma kù gbɔ ide kãma.

²¹ Aɔ̃ Lafɛ̃ɛ, na saabui dee dee ku jɛɛ, í bi inɛ ŋa a mà bɛi woodai nŋu í la í to nɔ í sĩa.

²² Nɔ wee zamaau ihɛ̃ inɛ ŋa à bata ŋa nɔ à ko mii ndu ŋa ŋa. À jɔ̀ à dasi inɔ lumbu ŋai, nɔ à mu à cĩmbo ŋa si ile piisɔ̃ɔ ŋa. À koo à waa ko mii ndu ŋa ŋa, nɔ inɛ kãma kù faaba ŋa. À ko mii ndu ŋa ŋa, nɔ inɛ kãma kù ni a sindo nŋa mii ŋau.

²³ Yooi si inɔ nŋɛ á ce laakaii iyi bɛ. Yooi á ce laakai ku ba ku maa de itĩ si mii iyi á na ku ce ala.

²⁴ Nɔ yooi í so Izirɛli zamaai Zakɔbu ŋau í daa inɛ ŋa iyi à ko mii ndɛɛ ŋau si awɔ. Kù jɛ Aɔ̃ Lafɛ̃ɛ nŋu iyi à ce dulum bi titɛɛu? A kù bi kpãaɛ ŋau ku too, nɔ à kɔ̀ ku desi idei woodaɛ itĩ.

²⁵ Na ŋɔi í ce Aɔ̃ Lafɛ̃ɛ í jɔ̀ idɔɔkɔ̃ nla nlaɛu í naa si inɛɛ ŋau nɔ í jɔ̀ igũ í naa si ŋa do gbugbã nla nla. Í yɛi bɛi ina í dede si ŋa hai do bii fei, amma a kù gbɔ yaasei nkãma. Inau í jo ŋa, amma a kù lasabu si.