Ezai 41 - Bibeli do fee

Inɛ iyi Aɔ̃ Lafɛ̃ɛ í jɔ̀ í dasi kpãa

¹ Aɔ̃ Lafɛ̃ɛ í ni, iŋɛ inɛi gũngũm ŋau, i coko cau ŋa ku ba i gbɔ bɛi ǹ wa n fɔ ŋa. Zamaau ku dasi wɔɔkɔ ku koo nɔ ku fɔ ide. Ka koo bi ku ce kiitiu ajɔ.

² Yooi í jɔ̀ inɛ iyi í ya jɛ igũ bii fei í dasi kpãa wa ce isɛɛnɛɛ wa hai do ikpa nunui daakɔ ihɔ̃. Yooi í daa inɛi ilɛ ŋau si awɔ, nɔ yooi í kaye ilaalu ŋau. Taakubaɛ í jɔ̀ inɛ ŋau à kpɔò sãa. Biooɛ í jɔ̀ inɛ ŋau à yɛ bɛi fɔfɔi ile iyi fufu í nya í nɛò.

³ Í lele ŋa, nɔ wa nɛɛ do laakai ku sũ si kpãa bii kù too ajɔ kãma.

⁴ Yooi í jɛ icui mii ŋa iyi wa ceu bɛ. Inɛ iyi hai waati iyi ngɔgɔ kù ce titã, í ya fɔ mii iyi á na ku ce. Amu Aɔ̃ Lafɛ̃ɛi. Amui ǹ wa hai bi kusinti nɔ amui an nyi n wa tengi bii mii ŋa aa ce do ankãanyi má.

⁵ Inɛ ŋa iyi à wa si gũngũm ŋa à yɔɔ nɔ njo í mu ŋa. Inɛ ŋa iyi à wa si kɔɔ ŋa si ilɛu, à waa yaya. Aŋa fei à tɛkɛɛ à waa naa.

⁶ À waa sobi njɛi nɔ inɛ fei í ya sɔ̃ kpaasiɛi ku maa ni, dasi wɔɔkɔ.

⁷ Woo ce icɛi awɔ í ya maa mua woo yɔ isɔ gbugbãi. Inɛ iyi wa yɔrɔ isɔ do mataaka, í ya maa muaa inɛ iyi wa cãa si kuta iyi wa jilɛ ilɛu gbugbãi. Í ya fɔi ku ni yaase bɛi à mɔ isɔu í sĩa. Nɔ í ya jɔ̀ iwɛ̃ ku maa leekĩi do saabui pɔ̃ɔti ŋa iyi à kpakpa siu ku ba ku maà yaga má.

Bɛbɛi, maà jɔ̀ njo ku muɛ

⁸ Awɔ Izirɛli woo ce icɛm, sotĩ i gbɔ. Awɔ zamaai Zakɔbu iyi ǹ cica, awɔ dimii Aburahamu kpaasim nii.

⁹ Awɔ, ǹ koo ǹ dɛdɛɛ wai hai hee kɔɔi andunya. Ǹ kpeɛ wai hai hee ilɛ jĩijĩ ŋa nɔ ǹ sɔ̃ɛ ǹ ni, awɔ woo ce icɛm nii. Ǹ cicaɛi, nɔ n kaa n kɔ̀siɛ má.

¹⁰ Maà jɔ̀ njo ku muɛ domi ǹ wɛɛ do awɔ. Maà ti i maa cɔ ilu do zigiida domi amui ǹ jɛ Aɔ̃ Lafɛ̃ɛɛ. An jɔ̀ i nɛ gbugbã, nɔ an naa n faabaɛ. An maa n muɛi do gbugbãm iyi í ya jɔ̀ n jɛ igũ.

¹¹ Inɛ ŋa iyi à wɛɛò idɔɔkɔ̃ do awɔ fei, anyɔ do bitii á jɛ tu ŋa. Inɛ ŋa iyi à waa dɛdɛ ijaɛ ŋau, a kaa naa a jɛ nkãma, nɔ aa ce nfe mɔm nii.

¹² Aa na i maa dɛdɛ mbɛɛɛ ŋau, nɔ i kaa yɛ ŋa má. Inɛ ŋa iyi à waa naa siɛ igũ ŋau, a kaa na a jɛ nkãma. Aa ce nfei.

¹³ Ntɔ ntɔ, amui ǹ jɛ Aɔ̃ Lafɛ̃ɛɛ. Amui ǹ jɛ inɛ iyi í mu awɔ njɛɛ nɔ í sɔ̃ɛ í ni, maà ce njo, ǹ wa n naa ku faabaɛ mbɛ.

Ǹ wa n naa ku faabaɛ

¹⁴ Zakɔbu, awɔ iyi à waa cea bɛi kokoo, maà jɔ̀ njo ku muɛ. Izirɛli, awɔ iyi ì jɛ bɛi kokoo, ǹ wa n naa ku faabaɛ. Amu Aɔ̃ Lafɛ̃ɛ Inɛ Kumái Izirɛli, amu woo yaɛ, amui ǹ fɔ bɛɛbɛ.

¹⁵ Amui ǹ ceɛ bɛi isɔ ku gbe anu titɔ̃ ku nɛ pɔ̃ɔti ŋa iyi à ya nyaò yɔyɔi bilee. Aa lɛgɛ iri kuta ŋai i nya fufu nŋa. Aa cea geete ŋa mɔi bɛi à ya cea fɔfɔ.

¹⁶ Aa fɛ ŋai fufu ku so ku nɛò ŋa, nɔ fufu nla nla gɔ ku fangaa ŋa. Amma awɔ, aa nɛ inɔ didɔ̃i si amu Aɔ̃ Lafɛ̃ɛ. Aa maa saabu araɛi na amu Inɛ Kumái Izirɛliu.

Gbaa í kpaasi í ce mandi

¹⁷ Ilu are ŋa do hai nɛ gbugbã ŋa à ya maa dɛdɛ inyi, amma a ci ya ba. Agbɛ í ya jɔ̀ amɛ nŋa ku gbɛi. Amu Aɔ̃ Lafɛ̃ɛ an jɛ nŋa. Amu Aɔ̃ Lafɛ̃ɛi Izirɛli, n kaa n fũsi ŋa awɔ.

¹⁸ An jɔ̀ inyi ku maa cã wa hai si antaii iri kuta iyi kù nɛ nkãma, nɔ n jɔ̀ inyi ku maa sɔ̃ wa hai si lɛlɛi lɔɔma ŋau. An jɔ̀ gbaa ku baa ku jɛ ido, nɔ ilɛ iyi í gbɛ wo ku baa ku jɛ inya bii isɔ̃ ŋa à wa.

¹⁹ Si gbaa bɛi an lɔ jĩi ndii sɛɛdi, do ti akasia, do ti miitu do jĩi ndii olivi ŋa. Nɔ si inya bii í jɛ ilɛ ngbɛu, an lɔ jĩi ndii sipɛrɛɛsi bɛ, do ti ɔɔmu do ti bui aŋa fei ajɔ.

²⁰ Do yaase bɛɛbɛ, inɛ fei á yɛ iyi Aɔ̃ Lafɛ̃ɛi í ce fei ndɛɛ. Nŋu Inɛ Kumái Izirɛliui í taka ŋa. Nɔ inɛ fei á mà. Inɛ fei á ce laakai nɔ ku gbɔ yaaseɛ.

Iwɛ̃ ŋa a kù jɛ nkãma

²¹ Ŋɔi Aɔ̃ Lafɛ̃ɛ í ni, iŋɛ iwɛ̃ ŋa, i naa i nyisi wa iyi ì jɛ ntɔ ŋa. I nyisi wa do nyinda ŋa ka yɔɔ ŋa. Aɔ̃ Lafɛ̃ɛ ilaalui tɔkui Zakɔbu ŋaui í fɔ bɛɛbɛ.

²² I nyisi wa iyi ì jɛ ntɔ ŋa nɔ i sɔ̃ wa mii ŋa iyi á na ku ce ŋa. I sɔ̃ wa bɛi mii ndii tako ŋau à ce ŋa, nɔ ka ce si lasabu ku ba ka mà iyi á na ku naa. Walakɔ mii ŋa iyi á na ku ce ŋau, i jɔ̀ ka gbɔ iba nŋa ŋa.

²³ Ntɔ ntɔ, i sɔ̃ wa mii ŋa iyi á na ku ce ŋa nɔ ka mà iyi ì jɛ saai amu Ilaaɔ̃ ŋai do ntɔ. I ce ngɔgɔ nŋu akã ŋa iyi í jɛ jiida walakɔ iyi í jɛ laalɔ ku ba ka cĩ iju nwa nɔ awa fei ka yɔɔ ajɔ ajɔ.

²⁴ Iŋɛ i kù jɛ nkãma ŋa. Nɔ mii iyi ì waa ce ŋa, inɛ ŋa a kù màa kù to baa bɛi à mà inya ngbɛ. Nɔ ntɔ ntɔ, inɛ iyi í cica ŋɛ, inɛ laalɔi.

²⁵ Do ikpa awɔ njɛi kpãai inunu ihɔ̃, ǹ dasi inɛ gɔ kpãa wa bɛ, nɔ nŋu wee wa naa. Nɔ do ikpa ihɔ̃, hai do bii inunu í ya la wau bɛ, wa kpe irim. Nɔ wa jojo si inɛ ngbo ŋau bɛi à ya jojo si pɔkɔdɔ, nɔ wa ce nŋa bɛi woo ma caka í ya jojo si amà.

²⁶ Yooi í fɔ ideɛ hai sinte ku ba ka wɛɛò kumàsiɛ. Yooi í tako í fɔ ideɛ hai ku kpɛ hee ka ni í nɛ ntɔ, domi bɛi í fɔu, bɛɛbɛi í ce dee dee. Inɛ kãma kù fɔ baauɛ nɔ inɛ kãma kù fɔ ideɛ a kù gbɔ. Inɛ kãma mɔ kù gbɔ ide nŋɛ gɔ.

²⁷ Inɛ sinte iyi í to iri kutai Siɔ̃ɔ í ni, à wa bɛ. Amu Aɔ̃ Lafɛ̃ɛi ǹ bɔɔ bi inɛi Zeruzalɛmu ŋa koo fɔ laabaau jiidau.

²⁸ Ŋɔi ǹ sinda ǹ cɔ, nɔ n kù yɛ inɛ kãma. Inɛ gɔ kù wa si inɔ nŋa iyi á yɔkɔ ku na ikɔ. Bii ǹ yɛ inɛ gɔ wo, an beeɛ ide nɔ ku jɛɛm.

²⁹ Aŋa fei, kãma nŋa kù jɛ ngɔgɔ. Icɛ nŋa fei ngbɛi. Iwɛ̃ nŋa ŋau, fufui nɔ inya ngbɛi.