Ezai 40 - Bibeli do fee

Zamaam ku muaa gbugbã

¹ Aɔ̃ Lafɛ̃ɛ nŋɛ í ni, i tũ idɔi inɛm ŋa ntɔ ntɔ ŋa.

² I fɔ ide i muaò inɛi Zeruzalɛmu ŋa gbugbã ŋa. I dɔ̃ anu i sɔ̃ɔ ŋa i ni, icɛi tilasi ku ceɛu í kpa iri mbɛ, nɔ í sã gbesei kuraraɛ mɔ mbɛ. Ijuukpã iyi í nɛ ku baa na dulum dɛɛ ŋau fei, Aɔ̃ Lafɛ̃ɛ í jɔ̀ í sãa ikɔ minji.

³ Inɛ gɔ wa dɔ̃ anu wa ni, i nyaa Aɔ̃ Lafɛ̃ɛ kpãa si gbaa ŋa. I teesea Aɔ̃ Lafɛ̃ɛ nwa kpãa ku munga anu si lɔɔma bii mandi kù wa.

⁴ I dĩ lɔɔma ŋau fei ŋa, nɔ i gbe iri kuta ŋa do geete ŋau fei ŋa. I jɔ̀ geete ŋau fei a baa ilɛ nɔ iri kuta ŋau a baa a jɛ lɔɔma ŋa iyi à cĩ.

⁵ Waati bɛɛbɛ, amboei Aɔ̃ Lafɛ̃ɛ á naa, nɔ inɛ fei á yɔɔi ajɔ. Aɔ̃ Lafɛ̃ɛi í fɔ bɛɛbɛ.

⁶ Inɛ gɔ í ni, dɔ̃ anu, nɔ inɛ mmu gɔ í jɛ í ni, bɛirei an dɔ̃ anu n ni. Nɔ à jɛaa à ni, aa dɔ̃ anui i ni, amanɛ í yɛi bɛi fɔfɔ tũtũ. Kusĩaɛ fei í yɛi bɛi kokoi jĩi ndii sako.

⁷ Fɔfɔ tũtũ í ya na ku gbɛi, nɔ kokoɛ mɔ ku gbɛ waati iyi fufui amii Aɔ̃ Lafɛ̃ɛ í naa siɛ. Ntɔ ntɔ, zamaau í yɛi bɛi fɔfɔ.

⁸ Fɔfɔ í ya gbɛi, nɔ kokoi jĩi mɔ í ya gbɛi. Amma idei Aɔ̃ Lafɛ̃ɛ nwa á maa wɛɛi hee do ajɔ fei.

Idei laabaau jiida iyi aa sisi

⁹ Siɔ̃ɔ, awɔ iyi ì naaò laabaau jiidau wa, gũ antaii iri kuta kugboka nɔ i dɔ̃ anu hee lele do gbugbã. Zeruzalɛmu, awɔ iyi ì naaò laabaau jiidau wa, dɔ̃ anu hee lele, maà jɔ̀ njo ku muɛ. Sɔ̃ inɛi ilui Zudaa ŋa i ni, i cɔ Aɔ̃ Lafɛ̃ɛ nŋɛ.

¹⁰ Aɔ̃ Lafɛ̃ɛ wa naa do gbugbã. Nɔ gbugbãɛui á jɔ̀ ku jɛ bomma. Á baaò mii iyi í ba wa iyi í jɛ ribai wahalaɛu.

¹¹ Í yɛi bɛi woo degbe iyi wa gbã mɛɛmu gaaɛ, nɔ wa tɔtɔɔ ŋa do awɔɛ iyi í wu si ŋa. Í ya so ama angudã ŋau wai si ikpaɛ, nɔ ku gbã iye ŋau ku naaò ŋa wa ku ba a mɔmɔ.

Kula do bisii Lafɛ̃ɛi lele do ilɛ

¹² Yooi í wã kukpɔi inyii tenku si lontokoi awɔɛ. Yooi í wã kucĩi lelei Aɔ̃ do awɔɛ. Yooi í wã sãai ilɛu ihɛ̃ fei í mà bɛi kuwoɛ í to. Geete ŋa do iri kuta ŋa, yooi í wã ŋa si kiloo í mà kuwo nŋa.

¹³ Yooi í mà lasabui Aɔ̃ Lafɛ̃ɛ. Yooi í ya maa naa ikɔ ŋa.

¹⁴ Yooi aŋaò à busi njɛ í naa ikɔ í bɛi í màò yaasei ngɔgɔ. Yooi í kɔɔ si kpãai mii iyi í jɛ asaiya. Yooi í kɔɔ si kumà. Yooi í kɔɔ si kpãai bisi.

¹⁵ Inɛi ilɛ ŋa à yɛi bi Aɔ̃ Lafɛ̃ɛ bɛi inyi iyi í tontoo wa gbakã akã hai si itĩi soo. À yɛi má bɛi kuta wɛwɛɛ akã iyi í wa si pɛrɛntii kiloo iyi à ya wãò mii ŋa. Inɛi gũngũm ŋau à fɛɛi bɛi ilùlù.

¹⁶ Jĩi ndii agboi Libãau fei kaa to ina ku ko, nɔ mɛɛmuɛ ŋa a kaa to kuwee iyi à ya jo si ina fei sãa sãa ku ce.

¹⁷ Zamaai ilɛu ihɛ̃ fei sãa sãa kù jɛ nkãma si wajuɛ. Bi titɛɛ, bɛɛrɛ nŋa kù re nkãma.

A kaa wã Ilaaɔ̃ do nkãma

¹⁸ Mii aa so i wãò Ilaaɔ̃ ŋa. Mii aa ce ŋa iyi á jɔɔ.

¹⁹ Woo ce icɛi awɔ ŋa à ya yɔ isɔ a ceò mii iyi í jɔ iwɛ̃, nɔ woo ce icɛi wura ŋa mɔ à ya biiɛi do wura nɔ a daa si saba iyi à ce do isɔ fũfũ.

²⁰ Inɛ mɔ iyi í jɛ ilu are hee í caa, iyi kaa yɔkɔ ku ce amuau bɛ, í ya cica jĩi iyi sɔ̀sɔ̀ ŋa a kaa yɔkɔ a jɛi, nɔ ku dɛdɛ inɛ iyi í mà icɛi awɔ jiida ku ba ku ceaa mii iyi í jɔ iwɛ̃ iyi kù nɛ ku yaga.

²¹ I kù màa ŋa? I kù gbɔɔ ŋa? A kù sisi nŋɛ hai sinteɛ? I kù gbɔ yaasei mii ŋa iyi à jɛ icui ilɛ ŋa?

²² Aɔ̃ Lafɛ̃ɛi, nŋu iyi lelei Aɔ̃i í jɛ bi kuwaɛ si antaii ku kaakoi ilɛ iyi í ce bokotou, nɔ wa cɔ inɛ ŋa iyi à wa si ilɛu wa bɛi cɛ̃cɛ̃ɛ ŋa. Í tɛ́ lelei Aɔ̃i bɛi acɔ nla nla gɔ, nɔ í fũui bɛi ilei acɔ ku ba ku coo bi kuwaɛ.

²³ Nŋui í ya jɔ̀ ilaalui andunya ŋau ihɛ̃ a kua gbugbã, nɔ í ya jɔ̀ inɛ ngboi andunya ŋau mɔ a kua gbugbã.

²⁴ À yɛi bɛi jĩi ŋa iyi a kù lɔ ŋa mɔm, nɔ a kù gbɛ̃ ŋa. Icu nŋa kù nɛ icã kãma si ilɛ. Waati iyi fufui amii Aɔ̃ Lafɛ̃ɛ í naa si ŋa gbakã, à ya gbɛi. Nɔ bii fufu dabii í naa si ŋa, í ya so ku nɛò ŋai bɛi fɔfɔi ile.

²⁵ Ŋɔi Aɔ̃ Lafɛ̃ɛ Inɛ Kumáu í fɔ má í ni, yooi aa yɔkɔ i so i wãm do ŋa iyi á jɛ saam.

²⁶ I wu iju nŋɛ i cɔ lelei Aɔ̃ ŋa. Yooi í taka mii ŋa iyi à wa lele ŋau bɛ. Yooi í jɔ̀ aŋa fei à fita gbugbãa à waa yɛ ŋa bɛi sooge ŋa. Í ya kpe aŋa fei mbɛ do iri nŋa ŋa. Do yiikoɛ, do gbugbã nla nlaɛ, baa akã nŋa ci ya gaizia.

Gbugbã titɔ̃ ŋa iyi woo kua gbugbã ŋa aa ba

²⁷ Izirɛli, zamaai Zakɔbu, bɛirei í ce ì fɔ ì waa ni Aɔ̃ Lafɛ̃ɛ kù waa yɛ mii iyi wa baɛ. Baai Aɔ̃ Lafɛ̃ɛ ci ya wa si mii iyi í jɛ asaiyaɛ.

²⁸ I kù màa? I kù gbɔɔ? Aɔ̃ Lafɛ̃ɛi í jɛ Ilaaɔ̃ iyi kuwɛɛɛ kù nɛ kɔɔ. Nŋui í taka ilɛ hai kɔɔ ihɛ̃ hee ku bɔ kɔɔ ihɔ̃. Gbugbãɛ ci ya tã hee má jɛ ku gbɛɛji. Kumàɛ í jĩisa nɔ kù nɛ kɔɔ.

²⁹ Inɛ iyi í kua gbugbã, í ya muaa gbugbãi. Inɛ iyi í gbɛɛji hee kaa yɔkɔ má, í ya muaa gbugbãi.

³⁰ Amu ŋa à ya kua gbugbãi nɔ a gbɛɛji, nɔ baa awaasũ ŋa à ya koosɛ a cuku.

³¹ Amma inɛ ŋa iyi kpãa ku cɔ nŋa í wa si Aɔ̃ Lafɛ̃ɛ, aa maa ba gbugbã titɔ̃ ŋai. Aa ya maa yɔi bɛi kungbã ŋa. Aa ya maa sɛii, nɔ a kaa ya gbɛɛji. Aa ya maa nɛi, nɔ gbugbã nŋa kaa nɛ kɔɔ.