Ezai 4 - Bibeli do fee

¹ Ajɔ nŋu bɛ, inaabo mɛɛjei á bɔ bi inɛmɔkɔ akã nɔ a sɔ̃ɔ a ni, awai aa ka baa ara nwa sɔnda iyi aa ka jɛ do jĩnɛ ŋa iyi aa ka dasi, amma mii iyi à waa tɔɔɛ nŋu akãi í jɛ i nya nwa anyɔ. Jɔ̀ ka maa so iriɛ.

Inɛ ŋa iyi à ba à gbe Zeruzalɛmu

² Ajɔ akã, mii iyi Aɔ̃ Lafɛ̃ɛ á jɔ̀ ku fita si ilɛi Izirɛli, inɔ didɔ̃ do amboei á jɛaa inɛ ŋa iyi à ba à gbe si inɔ ilu Zeruzalɛmu. Mii iyi á ce si ilɛu, inɔ didɔ̃ do bɛɛrɛ nla nlai á jɛ nŋa.

³ Inɛ ŋa iyi aa gbe Zeruzalɛmu, aŋa iyi aa ba a fita siu, aŋai aa kpe inɛ kumá ŋa iyi à nya ŋa ikã a jɛ ti Aɔ̃ Lafɛ̃ɛ. Inɛ ŋa iyi Aɔ̃ Lafɛ̃ɛ takaɛ í kɔ iri nŋa a jɛ ilu hunde ŋa mbɛ.

⁴ Waati iyi Aɔ̃ Lafɛ̃ɛ á jɔ̀ fufui dee dee ku jɛ do iyi á jɔ̀ inɛ ku maaju ku naa, waati iyi á jɔ̀ inaaboi Zeruzalɛmu ŋau a maaju hai si riisi nŋa, do si waati iyi á jɔ̀ Siɔ̃ɔ ku maaju na njɛ iyi í dikã bi tɛɛ,

⁵ waati bɛɛbɛi Aɔ̃ Lafɛ̃ɛ á jɔ̀ si iri kutai Siɔ̃ɔ fei tengi bii inɛ ŋa à tɔtɔɔ, bii dasãi, kudũi ijĩ ku ya naa si ŋa. Bii idũ mɔi, aa yɛ cua do inya kumái amɛi inai. Si fei ndɛɛ, Aɔ̃ Lafɛ̃ɛ takaɛ í ya wa bɛi do amboeɛ ku maa degbe ŋa.

⁶ Kuwaɛ si anini nŋa bɛi á ya jɛ nŋa bɛi jĩjĩi jĩi iyi á maa bii ŋa dasã bii inya wa gbãa, nɔ si abɛɛi aa ya ba a manji bii ijĩ wa wɔ do fufu.