Ezai 39 - Bibeli do fee

Ezekiasi í ba inɛ njoo ŋa wa hai Babilɔni

¹ Waati bɛɛbɛ, Merodaki-Baladãa amai Baladãa ilaalui Babilɔni í sambaa Ezekiasi tia wa do amua si na iyi í jɔ̀ í tako í gbɔ baaui bɔ̃ɔɛ do iri ku baɛ.

² Ŋɔi Ezekiasi í nɛ inɔ didɔ̃, nɔ í jɔ̀ à gbã inɛ ŋa iyi à bɛ wa ŋau à bɔò ŋa ile bii à jilɛ jĩnɛ ku nɛ bɛɛrɛ ŋau à nyisi inɛ ŋau isɔ fũfũ ŋa, do wura ŋa do tuae ŋa, do ikpo ku dɔ̃ inunu ŋa. Nɔ í nyisi ŋa bi ku jilɛ jĩnɛi igũɛ ŋa má do mii ŋa iyi à wa bi ku jilɛ kosĩaɛ ŋa fei. Kù singa nŋa nkãma si inɔ kabaɛ hee do si bommaɛu fei.

³ Si anyii nŋu, ŋɔi walii Ezai í naa í ba ilaalu Ezekiasi nɔ í beeɛ í ni, bɛirei inɛ ŋau bɛ à ni, nɔ hai iwoi à naa bi titɛɛ. Ŋɔi Ezekiasi í jɛaa í ni, à naai hai ilɛ jĩijĩ. Hai Babilɔnii à naa ku cɔm.

⁴ Nɔ Ezai í nyi í beeɛ má í ni, mii à yɛ si inɔ kpasɛ̃ɛ. Nɔ Ezekiasi í jɛaa í ni, à yɛ mii iyi í wa si inɔ kpasɛ̃m fei. Nkãma kù gbe si amanim ŋa iyi n kù jɔ̀ a kù nyisi ŋa.

⁵ Ŋɔi Ezai í sɔ̃ Ezekiasi í ni, sotĩ i gbɔ ide iyi Aɔ̃ Lafɛ̃ɛi lele do ilɛ í fɔ.

⁶ Í ni, ajɔ wa naa si bii inɛ ŋa aa na a ko mii iyi í wa si inɔ kpasɛ̃ɛ fei a nɛò Babilɔni. Aa ko mii ŋa iyi balaɛ ŋau à tɔtɔɔ à jɔ̀ɛ hee ku baa nnyiu ihɛ̃ fei. Aɔ̃ Lafɛ̃ɛ í ni, nkãma kaa gbe.

⁷ Aa mu ama inɛmɔkɔi awɔ takaɛ ŋa, amu ŋa iyi awɔ takaɛ ì bí, nɔ a koo a jɛ inɛmɔkɔ bantãm ŋa a maa ce icɛi aru si inɔ kabai ilaalui Babilɔni.

⁸ Ŋɔi Ezekiasi í jɛa Ezai í ni, idei Aɔ̃ Lafɛ̃ɛ iyi ì fɔ, í sĩa. Nɔ wa fɔ si idɔɛ wa ni, si kuwɛɛm fei ilɛu á maa wɛɛi sɛ̃ɛ do laakai ku sũ.