Ezai 38 - Bibeli do fee

Bɔ̃ɔi Ezekiasi do iri ku baɛ

¹ Waati bɛɛbɛ Ezekiasi wa ce bɔ̃ɔ ku kpa inɛ. Ŋɔi walii Ezai amai Amɔɔsuu í naa í sɔ̃ɔ í ni, ide iyi Aɔ̃ Lafɛ̃ɛ í fɔ wee. Aɔ̃ Lafɛ̃ɛ í ni, awɔ Ezekiasi, sɔ̃ inɛi kpasɛ̃ɛ ŋa woodaɛ ŋa iyi ì nɛ ku jɔ̀ nŋa, domi aa kui, i kaa wɛɛ má.

² Ŋɔi Ezekiasi í sinda wajuɛ do ikpa bi idĩ, nɔ í tɔɔ Aɔ̃ Lafɛ̃ɛ.

³ Si kutɔɔɛu wa nii, Aɔ̃ Lafɛ̃ɛ, ǹ wa n tɔɔɛi, ye gigi iyi ǹ ce isɛɛnɛm nii si dee dee ku jɛ si wajuɛ muafiti kù wa si, nɔ ǹ ce mii iyi í dɔ̃ɛ si. Si anyiɛ, nɔ Ezekiasi wa kpata ntɔ ntɔ.

⁴ Waati bɛɛbɛ, Aɔ̃ Lafɛ̃ɛ í ba walii Ezai ide ku fɔ í ni

⁵ ku dede koo ba Ezekiasi ide ku fɔ ku sɔ̃ɔ ku ni nŋu Aɔ̃ Lafɛ̃ɛi balaɛ Davidi í ni, amu Aɔ̃ Lafɛ̃ɛ ǹ gbɔ kutɔɔɛ nɔ ǹ yɛ cikãajuɛ ŋa. Na nŋu, ǹ kɔ̃ɔsi kusɔi kuwɛɛɛ mbɛ má adɔ̃ maatũ.

⁶ An faabaɛ hai si awɔi ilaalui Asiriu awɔ do iluu ihɛ̃ fei, nɔ amui an jɛ woo degbei iluu.

⁷ Nɔ Ezai í sɔ̃ɔ í ni, Aɔ̃ Lafɛ̃ɛ á jɔ̀ i ba nyinda gɔ iyi á jɔ̀ i mà kãm kãm iyi kuwã iyi í ceu, á kɔ̃.

⁸ Geete ŋa iyi Ahazi í jɔ̀ à ma ku ba ku ya gũ [ku lɔò inɔ ileɛu,] à wai wo si inunu. Amma jĩjĩ í tɛkɛɛ si ŋa wa do anyi. To, nsɛi Aɔ̃ Lafɛ̃ɛ á jɔ̀ jĩjĩu ku tɛkɛɛ ku bɔ do waju si geete mɛɛwa ŋau. Nɔ ntɔ ntɔ, jĩjĩu í tɛkɛɛ hai tengi bii í wau, nɔ geete mɛɛwa ŋau à wa si inunu má.

Kutɔɔi Ezekiasi si anyii iri ku baɛ

⁹ Iri iyi Ezekiasi ilaalui Zudaa í kɔ̃ waati iyi kù nɛ baani nɔ í na í ba iri wee.

¹⁰ Ǹ wa n fɔi wo ǹ ni, waati iyi kuwɛɛm í to anini, waati bɛɛbɛi ǹ wa n nɛ bi kuwai iku ŋa. Adɔ̃ ŋa iyi à gbeem nɔu, ǹ kua ŋa mbɛ.

¹¹ Nɔ ǹ nyi ǹ wa n fɔ má ǹ wa n ni, n kaa n yɛ Aɔ̃ Lafɛ̃ɛ si ilɛu ihɛ̃ bii ilu hunde ŋa à wa má. Nɔ n kaa n yɛ amanɛ baa akã si inɔ andunya bii inɛ ŋa à wau ihɛ̃.

¹² Tengi bii ǹ wau, à gbaa nɔ à so à nɛò hee jĩijĩ bɛi ilei acɔi woo degbe mɛɛmu ŋa. À ká kuwɛɛm nii bɛi caacɛ í ya ká ìtɔ́. À da hundem nii bɛi caacɛ í ya da ikũɛ. Hai dasã hee idũ ku maa dũ, á tambɔɔm.

¹³ Hai ihɛ̃ hee iju ku maa má iku á som. Nɔ bɛi muusu nla í ya lɛgɛ kũkũ ŋa, bɛɛbɛi Aɔ̃ Lafɛ̃ɛ í lɛgɛ kũkũm ŋa. Hai dasã hee idũ ku maa dũ, á tambɔɔm.

¹⁴ Ŋɔi ǹ wasi ku dɔ̃ anu kekee kekee bɛi gaagaa iyi wa fo lele, nɔ ǹ wasi ku kakaa bɛi ankasiidi. Do araare, ǹ wu ijum lele, nɔ ǹ ni, Aɔ̃ Lafɛ̃ɛ, ǹ wɛɛò inɔ kufɔ, naa sobim.

¹⁵ Bɛirei an dɔ̃. Nŋui í jɛɛm, domi nŋu takaɛi í ya ce mii ŋa. An maa n nɛi do ara ku kaye si kuwɛɛm fei na inɔ kufɔm.

¹⁶ Aɔ̃ Lafɛ̃ɛ, na jiida ku jɛɛ ŋai amanɛ í ya wɛɛ. Na jiida ku jɛɛ ŋaui ǹ wa n mí hee nsɛi. Ì jɔ̀ ǹ ba iri, nɔ ì jɔ̀ ǹ wɛɛ si hunde.

¹⁷ Inɔ kufɔm nɔu í baa í kpaasi í jɛ laakai ku sũ. Awɔ ì ce araarem hee ì nyam wa hai si inɔ isai nfe ku ce, domi dulum dom ŋau fei, ì nyɔ ŋa do anyiɛ.

¹⁸ Ntɔ ntɔ, tengi bi kuwai iku ŋa, inɛ kãma kù wa bɛ iyi á saabuɛ. Kù nɔ kù jɛ iku ŋai aa yɔkɔ a cĩɛ. Inɛ iyi à dasi inɔ balɛ, kù waa cɔ kpãai dee dee ku jɛɛ má.

¹⁹ Inɛ iyi í wɛɛ si hundei í jɛ inɛ iyi á maa saabuɛ bɛi ǹ wa n ce nnyiu ihɛ̃. Baai í ya jɔ̀ amu ŋa a mà dee dee ku jɛɛ.

²⁰ Aɔ̃ Lafɛ̃ɛ í faabam. Aa ka maa cã jĩnɛi ijo ŋai ajɔ fei si kuwɛɛ si kpasɛ̃i Aɔ̃ Lafɛ̃ɛ.

²¹ Ŋɔi Ezai í ni a naaò kaa iyi à ce do iso ngbɛi jĩi ndii figi wa, nɔ a jɔsi tengi bii bɔ̃ɔu í wa ku ba Ezekiasi ku ba iri.

²² Ŋɔi Ezekiasi í bee í ni, nyinda yoomai á jɔ̀ n mà kãm kãm iyi an yɔkɔ n bɔ kpasɛ̃i Aɔ̃ Lafɛ̃ɛ má.