Ezai 37 - Bibeli do fee

Ezekiasi í bɔ ku ce kubee bi walii Ezai

¹ Waati iyi ilaalu Ezekiasi í gbɔ baaui ideu bɛɛbɛ, ŋɔi í ga ibɔɛ ŋa, nɔ í so jĩnɛi inɔ kufɔ í dasi í bɛi í bɔ kpasɛ̃i Aɔ̃ Lafɛ̃ɛ.

² Ŋɔi í bɛ inɛ ŋa bi walii Ezai amai Amɔɔsuu. Inɛ ŋa iyi í bɛ ŋau wee. Eliakimu inɛ ngboi woo ce icɛi kpasɛ̃ɛu, do Sebuna woo kɔ tiaɛu, do inɛ ŋa iyi à ce inɛ ngbo à re si inɔi woo wee ŋau. Inɛ ŋau mɔ, jĩnɛi inɔ kufɔ ŋai à dasi à bɛi à bɔò bi walii Ezaiu.

³ Iyi à to bi tɛɛ, ŋɔi à sɔ̃ɔ à ni, ilaalu Ezekiasi í ni ka sɔ̃ɛ iyi ajɔi nnyiu ihɛ̃, ajɔi inɔ kufɔi, do ajɔi ijuukpã do ajɔi anyɔ. Í yɛi bɛi à ya fɔ a ni, amu ŋa à tã sɔɔlu a fita wa hai inɔi iye nŋa ŋa, amma gbugbã kù wɛɛ iyi aa bí ŋaò wa si andunya.

⁴ Á yɔkɔ ku jɛ Aɔ̃ Lafɛ̃ɛɛ á gbɔ ide ŋa iyi inɛ ngboi soogei Asiri ŋau wa fɔ, nŋu iyi ilaalui Asiri lafɛ̃ɛɛ í bɛ wa ku naa ku bu Aɔ̃ Lafɛ̃ɛ iyi í wɛɛu. Á yɔkɔ ku jɛ Aɔ̃ Lafɛ̃ɛɛ á kpãa iju na ide ŋa iyi í fɔ nɔ í gbɔu. Na nŋu, ce kutɔɔ na zamaa iyi í gbeu.

⁵ Waati iyi woo bɛi ilaalu Ezekiasi ŋau à sɔ̃ Ezai ideu à tã,

⁶ ŋɔi Ezai í sɔ̃ ŋa í ni, i koo i sɔ̃ lafɛ̃ɛ nŋɛ i ni ŋa, Aɔ̃ Lafɛ̃ɛ í ni ku maà jɔ̀ zigiɛ ku da na arabu ŋa iyi í gbɔ woo ce icɛi ilaalui Asiri ŋau à bu nŋu.

⁷ Ilaalui Asiriu á gbɔ laabaau gɔ, nɔ Aɔ̃ Lafɛ̃ɛ á jɔ̀ ku dasi idɔ ku sinda ku maa nyi ilɛɛ, nɔ á jɔ̀ a kpaa si ilɛɛ bɛ.

Ilaalui Asirii wa fɔ idei ijuukpã má

⁸ Ŋɔi inɛ iyi í jɛ inɛ ngboi soogei ilaalui Asiriu í sinda wa, nɔ í ba wee ilaaluu wa ce igũ do inɛi Libuna ŋa. Wee í ko í tako í gbɔ tã wo iyi ilaaluu í dede hai Lakisi í tekĩ.

⁹ Ilaalui Asiriu í tako í gbɔ baau wo si gãmɛi Tiiraka ilaalui Etiopi, à ni wa naa igũ ku ce si nŋu. Iyi í gbɔ bɛɛbɛ gbakã, ŋɔi í bɛ inɛ ŋa bi Ezekiasi í ni a koo a baa ide ku fɔ.

¹⁰ Í ni, i koo i sɔ̃ Ezekiasi ilaalui Zudaau ŋa i ni ku maà jɔ̀ Aɔ̃ Lafɛ̃ɛɛ iyi í dasi naanɛu ku lɛlɛɛ ku ni, Zeruzalɛmu kaa cuku si awɔi ilaalui Asiri.

¹¹ N jɔ awɔ takaɛ ì gbɔ bɛi ilaalui Asiri ŋau à cea ilɛ ŋau fei ya. À ce nfe nŋai mam mam. Mà awɔ ì nɔ ì waa tamaa bɛi aa ba i fita si?

¹² Iwɛ̃i inɛi ilɛ ŋa iyi balam ŋa à ce nfe nŋa ŋau, à yɔkɔ à faaba inɛi Gozãa ŋa do inɛi Harãa ŋa do inɛi Retisɛfu ŋa ba. Nɔ baa amai Edɛni ŋa iyi à wa Telasaa, à yɔkɔ à faaba ŋa ba.

¹³ Ilaalui Amati do ilaalui Aapadi do ilaalui ilui Sefaavaimu do ti Henaa do ti Ivaa ŋau, hee iwoi à wa.

Kutɔɔi Ezekiasi

¹⁴ Ŋɔi Ezekiasi í gba tiau hai si awɔi inɛi Asiri ŋa iyi à bɛ wa ŋau í cioɛ. Waati iyi í cioɛ í tã, nɔ í soo í bɔò kpasɛ̃i Aɔ̃ Lafɛ̃ɛ í koo í fũu bɛ.

¹⁵ Si anyii nŋu, ŋɔi Ezekiasi í tɔɔ Aɔ̃ Lafɛ̃ɛ í ni,

¹⁶ Aɔ̃ Lafɛ̃ɛi lele do ilɛ, Aɔ̃ Lafɛ̃ɛi inɛi Izirɛli ŋa, awɔ iyi ì waa buba si antaii serubɛ̃ɛ ŋa, awɔ akãi ì jɛ Aɔ̃ Lafɛ̃ɛi bomma ŋa fei si ilɛu ihɛ̃. Awɔi ì taka lele do ilɛ.

¹⁷ Aɔ̃ Lafɛ̃ɛ, sotĩ nɔ i gbɔ. Cĩ ijuɛ nɔ i cɔ. Gbɔ idei arabu ŋa iyi Senakeribu í bɛò inɛ ŋa wa a naa a fɔ si gãmɛi awɔ Aɔ̃ Lafɛ̃ɛ iyi ì wɛɛ.

¹⁸ Ntɔ ntɔ Aɔ̃ Lafɛ̃ɛ, ilaalui Asiri ŋa à ce nfei dimi mmu ŋa fei hee do ilɛ nŋa ŋa.

¹⁹ À ko iwɛ̃ nŋa ŋa à kosi ina. Iwɛ̃ nŋa ŋau, a kù jɛ Ilaaɔ̃, amma icɛi awɔi amanɛ ŋai. À ce ŋai do jĩi ŋa, do kuta ŋa, nɔ à ce nfe nŋa mam mam.

²⁰ Nsɛi bɛbɛi Aɔ̃ Lafɛ̃ɛ, awɔ iyi ì jɛ Aɔ̃ Lafɛ̃ɛ nwa, faaba wa hai si awɔi Senakeribu ku ba bomma ŋa iyi à wa si andunya fei a mà iyi awɔ akãi ì jɛ Aɔ̃ Lafɛ̃ɛ.

Ezai wa fɔ ide iyi Aɔ̃ Lafɛ̃ɛ í jɛ wa

²¹ Ŋɔi Ezai amai Amɔɔsuu í ni a koo a sɔ̃ Ezekiasi a ni, Aɔ̃ Lafɛ̃ɛ, nŋu iyi í jɛ Lafɛ̃ɛi inɛi Izirɛli ŋau, nŋu iyi ì tɔɔ si gãmɛi Senakeribu ilaalui Asiriu,

²² ide iyi í fɔ si gãmɛi Senakeribuu wee. Í ni, awɔ Senakeribu, Siɔ̃ɔ nŋu iyi í yɛ bɛi abo kusĩau, wa buɛi nɔ wa yaakoɛ. Siɔ̃ɔ, waatɔ Zeruzalɛmu ilu kusĩau, wa nyaanyiɛi wa gbugbãò iri.

²³ Yooi ì donda, nɔ yooi ì waa bu. Yooi ì waa lasi. Amu Aɔ̃ Lafɛ̃ɛ Inɛ Kumái Izirɛliui ì wu iju lele ì waa cɔ.

²⁴ Ì donda amu Aɔ̃ Lafɛ̃ɛi hai si ide ku fɔi amaacɛɛ ŋa, nɔ ì waa ni, amu Senakeribu, do sarɛti ku ce igũ nkpɔ nkpɔm ŋaui ǹ gũò hee antaii iri kuta ŋa iyi à wa hee do lelei Libãa. Nɔ ǹ bu jĩi ndii sɛɛdi kusĩaɛ ŋau do jĩi ndii sipɛrɛɛsi kugbokaɛ ŋau. An bɔi hee kɔɔi kugbokai iri kutaɛ ŋa do hee si kɔɔi agbo ku kukuɛ ŋau fei.

²⁵ Amu Senakeribu ǹ tu lɔgɔ ŋai ǹ bɛi ǹ ba inyi ǹ mɔ. Idoi Ezibiti iyi à ya kpe Niliu, do kutɛm ŋai ǹ jɔ̀ amaawɔɛ ŋau à gbɛ.

²⁶ Senakeribu, i kù gbɔ iyi ǹ ce sɔɔlui mii ŋau bɛ hai ku kpɛ? Ǹ ce sɔɔlui mii ŋau bɛi hai si waati ŋa iyi à lɔ. Bɛbɛii ǹ wa n naaò ŋa wa, nɔ mii iyi awɔ ì nɛ ku cei í jɛ i jɔ̀ ilu ku nɛ gbugbã ŋau a ce bomma.

²⁷ Inɛi ilu ŋau à kua gbugbã. Nɔ zigiida do anyɔ í wɛɛ nŋa. À yɛi bɛi fɔfɔ tũtũ do bɛi wua tũtũ ŋa. À yɛi má bɛi fɔfɔ tũtũ kusĩa ŋa iyi à wa si antaii ile sikifa ŋa do ti iko ŋa hee a maa yɔ a ce akpa ŋa.

²⁸ Ǹ mà mii fei si gãmɛɛ. Bii ì waa dede walakɔ bii ì waa buba, bii ì waa fita walakɔ bii ì waa lɔ wa, do bii ì waa ce idɔɔkɔ̃ do amu.

²⁹ Ntɔ ntɔ, ì waa ce idɔɔkɔ̃ do amu, nɔ inɛ ku dondaɛ í to wa hee si itĩm ŋa. Na nŋu, an daaɛ si isɔ bɛi lɛlɛawɔ si imɔɛi, nɔ n daaɛ si arezem si gɛlɛɛ. Si anyiɛ, an jɔ̀ i sinda i too kpãa iyi ì naaò wai i nɛò.

³⁰ Nɔ awɔ Ezekiasi, iyi á jɛɛ nyinda wee. Adɔ̃ɔyiu ihɛ̃, ngboi amaajɛ iyi í cuku nɔ í fita do araɛ nŋu akãi aa jɛ ŋa. Si adɔ̃ minjisiaɛ má, bɛɛbɛi aa ce ŋa. Amma si adɔ̃ mɛɛtasiaɛ, i gbɛ̃ nɔ i da ŋa. I teese ikoi jĩi ndii rezɛ̃ɛ nŋɛ nɔ i jɛ isoɛ ŋa.

³¹ Inɛi Zudaa ŋa iyi aa ba a fita si ŋau, aa yɛi bɛi jĩi iyi icãɛ ŋa à mi ilɛ, nɔ amaawɔɛ ŋa à nɛ iso ŋa nkpɔ nkpɔ.

³² Hai Zeruzalɛmu si iri kutai Siɔ̃ɔi inɛ ŋa iyi à gbe ŋau aa fita wa. Mii iyi Aɔ̃ Lafɛ̃ɛi lele do ilɛ á ce mbɛ si kubi nla nlaɛ.

³³ Na nŋu, ide iyi Aɔ̃ Lafɛ̃ɛ í fɔ si gãmɛi ilaalui Asiri wee. Í ni kaa lɔ si iluu bɛ. Kaa taa afa, nɔ kaa naa siɛ igũ ku ce do tɛli. Nɔ kaa tɔtɔɔ sãa ku jɛ bɛi geete hai bii á lɔò inɔ iluu.

³⁴ Á sinda ku too kpãa iyi í naaò wai ku nɛò. Aɔ̃ Lafɛ̃ɛ í ni kaa lɔ si inɔ iluu.

³⁵ Aɔ̃ Lafɛ̃ɛ í ni nŋu á bii si iluu awɔi nŋu ku faabaɛ, si na iyi í jɔ̀ nŋu í jɛ Ilaaɔ̃ do na irii Davidi amaacɛi nŋu.

Kunɛi inɛi Asiri ŋa do ikui Senakeribu

³⁶ Ŋɔi amalekai Aɔ̃ Lafɛ̃ɛ í fita nɔ í koo í kpa inɛmɔkɔ dubu cĩɔ do cinɛ do miiu (185.000) si asɔi inɛi Asiri ŋa. Iyi iju í má daadaakɔ, ŋɔi à ba wee iku ŋa mbɛ fei.

³⁷ Ŋɔi Senakeribu ilaalui Asiri í sinda í nɛ í koo í buba Ninivu.

³⁸ Ajɔ nŋu gɔ, í koo wa ce kutɔɔ inɔ ilei iwɛ̃ɛ iyi à ya kpe Nisirɔku. Ŋɔi ama inɛmɔkɔ minjiɛ gɔ ŋa iyi à ya kpe Adaramelɛki do Saresɛɛ à koo à kpaa. Waati iyi à kpaa à tã, à bɛi à sa à nɛ ilɛi Ararati. Ŋɔi inɛ akãi ama inɛmɔkɔɛ mmuɛ gɔ iyi à ya kpe Asaradɔ̃ɔ í sãsi agbɛɛ.