Ezai 36 - Bibeli do fee

Ilaalui Asiri wa fɔ idei ijuukpã si gãmɛi Zeruzalɛmu

¹ Si adɔ̃ maatɛ̃ɛsiai bomma ku jɛi Ezekiasi, Senakeribu ilaalui Asiri, í bɔ igũ si ilu ku nɛ gbugbãi Zudaa ŋa fei, nɔ í jɛ ŋa igũ.

² Ŋɔi hai Lakisi, ilaalui Asiriu í bɛ inɛ iyi í jɛ inɛ ngboi soogei Asiri ŋau wa Zeruzalɛmu bi ilaalu Ezekiasi do sooge ku nɛ gbugbã nkpɔ nkpɔ gɔ ŋa. Inɛ iyi í jɛ inɛ ngboi soogei Asiri ŋau í koo í leekĩi kɔkɔi kpãa iyi à ce bii inyi í ya too koo lɔò si bi ku jilɛ inyi gɔ iyi à ce iyi í wa do ikpa lele do ikpa bi kpãai ikoi woo mu icĩu.

³ Ŋɔi Eliakimu amai Hilikiya inɛ ngboi kpasɛ̃i ilaaluu í fita hai inɔ iluu í bɔ ku koo, nɔ Sebuna woo kɔ tiau í suu, nŋu do Yoa amai Asafu woo ce wũai tia ŋa iyi à jilɛu.

⁴ Ŋɔi inɛ iyi í jɛ inɛ ngboi soogei Asiri ŋau í sɔ̃ ŋa í ni, i koo i sɔ̃ Ezekiasi i ni ŋa, ilaalu nlai Asiriu í ni, si mii ì dasi naanɛ wo ya.

⁵ Nɔ í ni má, ì waa tamaa ide ŋa iyi à fɔ si fufuu bɛi á naɛ ikɔ do gbugbã iyi aa ceò igũ? To, nsɛi bɛbɛi, yooi ì dasi naanɛ ì bɛi ì waa ceò ide ku kɔ̀ sim.

⁶ Ǹ mà iyi sobii Ezibitii ì waa kaaba, nŋu iyi í yɛ bɛi akpa iyi á cɛ nɔ ku gũ awɔi inɛ iyi wa lɔkɔsiɛ. Bɛɛbɛi Faraɔ̃ ilaalui Ezibitiu í yɛ si gãmɛi inɛ ŋa iyi à dasiɛ naanɛ fei.

⁷ Á yɔkɔ ku jɛ aa sɔ̃m ŋa i ni, Aɔ̃ Lafɛ̃ɛ nwai à dasi naanɛ. Amma Ezekiasi í jɔ̀ à lɛgɛ bi kuweeɛ ŋa iyi à wa si geete ŋau. Waati bɛɛbɛi í sɔ̃ inɛi Zudaa ŋa do inɛi Zeruzalɛmu ŋau í ni, si wajui bi kuweei iluu ihɛ̃ nŋu akãi aa ya naa i sɛɛbata ŋa.

⁸ Bɛbɛi, ǹ wa n tɔɔɛi, jɔ̀ awɔ do lafɛ̃ɛm ilaalui Asiri i fɔ ide gɔ i jilɔɔ ŋa. Amu an naɛ acĩ dubu minji (2.000) bii í jɛ aa ba masa ŋa iyi aa gũ ŋa.

⁹ Baa inɛ akãi soogei lafɛ̃ɛm iyi kù to kpaasi ŋa, i kaa yɔkɔ i jɔ̀ ku nyi do anyi. Ì dasi Ezibiti naanɛi ku ba i ba sarɛti ku ja igũ ŋa do masa ŋa.

¹⁰ Nɔ mɔm, lafɛ̃ɛm nɔu í naa í ce igũ si ilɛu í ce asɔɔɛ iyi kù jɛ do idɔɔbii Aɔ̃ Lafɛ̃ɛi? Aawo. Aɔ̃ Lafɛ̃ɛ takaɛi í naa wooda.

¹¹ Ŋɔi Eliakimu do Sebuna do Yoa à sɔ̃ inɛ iyi í jɛ inɛ ngboi soogei Asiri ŋau à ni, à waa tɔɔɛi, ba wa ide ku fɔ do feei Arameɛ̃ɛ aa ka gbɔ. Maà ba wa ide ku fɔ do feei inɛi Zudaa ŋau si wajui inɛ ŋa iyi à wa si antaii bindiu ihɛ̃.

¹² Ŋɔi inɛ iyi í jɛ inɛ ngboi soogei Asiri ŋau í jɛ í ni, ì waa tamaa ide iyi lafɛ̃ɛm í sɔ̃m wau, ti lafɛ̃ɛɛ do ti awɔ akãi? Ideu í kã inɛ ŋa mɔ iyi à wa si antaii bindiu fei. Inɛ ŋau, iŋɛò ŋa fei, imi nŋɛ ŋai aa naa i maa i jɛ ŋa, nɔ i maa mɔ itɔ nŋɛ ŋa.

¹³ Ŋɔi inɛ ngboi soogei Asiri ŋau í dede í leekĩ, nɔ í dɔ̃ anu hee lele do feei Ebɛɛ í ni, i sotĩ i gbɔ idei ilaalu nlai Asiriu ŋa.

¹⁴ Bɛi ilaaluu í fɔ wee. Í ni, Ezekiasi ku maà lɛlɛ ŋɛ, domi kaa yɔkɔ ku faaba ŋɛ.

¹⁵ Ezekiasi ku maà jɔ̀ i dasi Aɔ̃ Lafɛ̃ɛ naanɛ i maa ni ŋa, à mà kãm kãm iyi Aɔ̃ Lafɛ̃ɛ á faaba wa, nɔ iluu ihɛ̃ kaa dasi awɔi ilaalui Asiri.

¹⁶ I maà gbɔ idei Ezekiasi ŋa, domi bɛi ilaalui Asiri í fɔ wee. Í ni, i jɔ̀ i dɛdɛ laakai ku sũ do amu nɔ i so ara nŋɛ i daam si awɔ ŋa ku ba inɛ fei ku ba isoi jĩi ndii rezɛ̃ɛɛ do ti figiɛ ku jɛ, nɔ inɛ fei ku ba inyii boonyiɛ ku maa mɔ,

¹⁷ hee n naa n to wa nɔ n so ŋɛ n nɛò ŋɛ si ilɛ iyi í yɛ bɛi ilɛ nŋɛu. Ilɛu í nɛ bilee ku ce pɛ̃ɛ do isoi rezɛ̃ɛ ku ce vɛ̃ɛ.

¹⁸ Ezekiasi ku maà lɛlɛ ŋɛ ku ni Aɔ̃ Lafɛ̃ɛi á faaba ŋɛ. Iwɛ̃i ilɛ ŋa à yɔkɔ à faaba inɛi ilɛ nŋa ŋa hai si awɔi ilaalui Asiri?

¹⁹ Hee iwoi iwɛ̃i Amati do ti Aapadi ŋau à wa. Hee iwoi iwɛ̃i Sefaavaimu ŋau à wa. À yɔkɔ à nya inɛi Samari ŋa hai si awɔm?

²⁰ Si inɔi iwɛ̃i ilɛ ŋau bɛ fei, yooma nŋai í yɔkɔ í faaba ilɛɛ hai si awɔm, Aɔ̃ Lafɛ̃ɛ mɔ ku bɛi ku yɔkɔ ku faaba Zeruzalɛmu hai si awɔm.

²¹ Ŋɔi aŋa fei à coko, a kù jɛaa ide kãma, domi ilaaluu í tako í na wooda wo í ni, i maà jɛaa ide kãma ŋa.

²² Ŋɔi Eliakimu amai Hilikiya iyi wa jɛ inɛ ngboi kpasɛ̃u, do Sebuna woo kɔ tiau, do Yoa amai Asafu woo ce wũai tia ŋa iyi à jilɛu, à naa à ba Ezekiasi do ibɔ ku ga ŋa, nɔ à sɔ̃ɔ ide ŋa iyi inɛ ngboi soogei Asiri ŋau í fɔ.