Ezai 35 - Bibeli do fee

Kubaa nlau

¹ Waati bɛɛbɛ, gbaa do lɔɔma hai nɛ inyiu, aŋa fei aa wɛɛò inɔ didɔ̃i. Lɔɔma iyi í gbɛu, á wɛɛò inɔ didɔ̃ nɔ á nɛ kokoi fɔfɔ ŋa.

² Koko ŋai aa biiɛ, nɔ á maa kɔ̃ iri ŋa do inɔ didɔ̃ nɔ á maa dɔ̃ anu má do inɔ didɔ̃. Aa na lɔɔmau bɛɛrɛ bɛi ti Libãa. Lɔɔmau á sĩai bɛi iri kutai Kaamɛli do lɔɔmai Sarɔ̃ɔu. Waati bɛɛbɛ, aa yɛ amboei Aɔ̃ Lafɛ̃ɛ si anini nŋa do kusĩai Ilaaɔ̃u.

³ Awɔ ŋa iyi à gbɛɛji ŋau, i mu nŋa gbugbã ŋa. Ilugũ ŋa mɔ iyi à jɔ̀ ì waa koosɛ ŋau, i mu nŋa gbugbã ŋa.

⁴ Inɛ ŋa iyi idɔ nŋa wa jojo ŋau, i sɔ̃ ŋa i ni a jɔ̀ a ba gbugbã, nɔ a maà jɔ̀ njo ku mu ŋa. I sɔ̃ ŋa má i ni Aɔ̃ Lafɛ̃ɛ nŋa í wa bɛ. Nŋui á kɔ̀ò ŋa, nɔ ku sãa mbɛɛ nŋa ŋa laalɔ iyi à ce nŋa. Nŋu takaɛi á naa ku faaba ŋa.

⁵ Waati bɛɛbɛ, fɛɛju ŋa aa yɛ ilu, dekĩ ŋa aa gbɔ ide.

⁶ Woo sukutɛ ŋa aa nɛ dee dee a fo a maa dingaa bɛi kulu, nɔ dekĩ ŋa aa maa dɔ̃ anu do inɔ didɔ̃. Aa maa dɔ̃ anu do inɔ didɔ̃i si na iyi í jɔ̀ hai si gbaa inyi á maa fita wa, nɔ inyi á maa cã wa hai bi lɔɔma iyi í gbɛu.

⁷ Ilɛ iyi wa gbãau á baa ku jɛ ido, nɔ ilɛ bii agbɛ í wau á baa ku jɛ inyai inyi. Tengi bii ajaako ŋa à ya tako a maa sũu, njee ŋai aa fita bɛ.

⁸ Tengi bɛi aa nya kpãa, nɔ kpãau kpãa kumái aa kpoo. Ilu riisi kãma kaa tooɛ. Ti inɛ ŋa iyi à nɛ a tooɛi á jɛ, nɔ nnyɛi ŋa a kaa nyɔ a tooɛ.

⁹ Muusu nla kãma kaa wa bɛ, nɔ mɛɛmui sako kugaabu kãma kaa naa bɛ. A kaa yɛ ŋa bɛ. Inɛ ŋa iyi Aɔ̃ Lafɛ̃ɛ í ya wa ŋaui aa ya too kpãau.

¹⁰ Inɛ ŋa mɔ iyi Aɔ̃ Lafɛ̃ɛ í jɔ̀ à nɛ ara nŋa ŋau, aa baa. Aa sinda a baa Siɔ̃ɔi do anu ku dɔ̃i inɔ didɔ̃. Inɔ didɔ̃ hai nɛ kɔɔu bɛi á jɔ̀ waju nŋa ku maa sĩa. Inɔ didɔ̃ nla nlai aa nɛ. Ara kuro do kukakaa ŋau fei, aa kpa irii.