Ezai 34 - Bibeli do fee

Kiitii inɛi Edɔmu ŋa

¹ I sɛkɛɛ wa iŋɛ inɛi ilɛ ŋa, ku ba i gbɔ ŋa. Zamaa, i sotĩ i gbɔ ŋa. Ilɛ mɔ hee do mii iyi í wa si fei, ku sotĩ ku gbɔ. Nɔ andunya mɔ hee do mii iyi í wa si fei, ku sotĩ ku gbɔ.

² Ntɔ ntɔ, idɔɔkɔ̃i Aɔ̃ Lafɛ̃ɛ á naai si ilɛ ŋau fei do si sooge ŋau fei. Á dasi ŋa si kpãai nfe ku cei, nɔ ku jɔ̀ a kpa ŋa.

³ Inɛ ŋa iyi à kpa ŋau, aa nyɔ ŋai ilɛ bɛ. Konkombii iku nŋa ŋau á fangaai, nɔ njɛ nŋa á maa cãi si iri kuta ŋa.

⁴ Andi gbugbãi lele ŋau fei, aa cukui. Lelei Aɔ̃ á ká si araɛi bɛi à ya ká tia, nɔ gbugbãi lele ŋau fei, aa cuku wai bɛi wuai rezɛ̃ɛ ŋa do bɛi ti figi ŋa à ya da a cuku.

⁵ Aɔ̃ Lafɛ̃ɛ í ni, ntɔ ntɔ, aa yɛ taakubam lelei Aɔ̃, nɔ á naa si inɛi Edɔmu ŋa. Á naai si zamaa iyi ǹ kiiti nɔ ǹ yɛ taaleɛ n ce nfeɛu.

⁶ Njɛ í bii taakubai Aɔ̃ Lafɛ̃ɛu, nɔ ikpo í biiɛ. Njɛu í biiɛi bɛi njɛi angudã kombo ŋa do ti iwo kombo ŋa, do bɛi ikpoi kpaai angudã kombo ŋau. Á yɛi bɛi Aɔ̃ Lafɛ̃ɛ wa ce kuwee ilɛi Edɔmu si ilui Bɔsura. Waati bɛɛbɛ, nfe ku ce nla nlai á jɛ si ilɛi Edɔmu.

⁷ Ifã ŋa do kɛtɛ ŋa do kɛtɛ kombo ŋa aa cukui ajɔ. Ilɛ á mɔ njɛ, nɔ ikpoi á bii ilɛu.

⁸ Ntɔ ntɔ ajɔ nŋu bɛ, ajɔi gbese ku sãi Aɔ̃ Lafɛ̃ɛi. Si adɔ̃ nŋu bɛi á kɔ̀ò inɛi Siɔ̃ɔ ŋa.

⁹ Inyii idoi Edɔmu ŋa iyi à waa cãu aa kpɔò kɔntaa, nɔ sãaɛ mɔ ku kpɔò fainwita. Ilɛɛu á baa ku yɛi bɛi kɔntaa iyi wa jo.

¹⁰ Dasã do idũ fei, á maa joi, kaa ku. Cuaɛ á maa bɔ lelei waati kãma fei. Nɔ á ce nfe ku maa kooi si tɔku do tɔkuɛ ŋa, nɔ inɛ kãma kaa ya too do ikpa ilɛ nŋau bɛ má.

¹¹ Bi kuwai gbĩgbĩ ŋai á baa ku jɛ, do bi kuwai luulugu ŋa. Tengi bɛi cilo do kungbã ŋa mɔ aa wa. Aɔ̃ Lafɛ̃ɛ á ce nfei ilɛui ku jɔ̀ ku gbe ngbɛ.

¹² Inɛ ngbo ilu bɛɛrɛi ilu ŋau a kaa wa bɛ hee a cica ilaalu gɔ má. Amai ilaalu ŋau, kãma kaa wɛɛ má.

¹³ Agũ ŋai aa fita si kabai bommaɛ ŋau. Kakayɛtɛ do agũ ŋai aa fita si ile ku nɛ gbugbãɛ ŋau. Bi kuwai ajaako ŋai á baa ku jɛ, do bi kuwai taataa ŋa.

¹⁴ Muusui sako ŋa do mbo ŋai aa ya nɛ a ko, nɔ tengi bɛi iwo kombo ŋa aa ya kpe njɛ. Tengi bɛi mɔi zĩii idũ á ya ba ku wɛɛ si laakaiɛ cau, nɔ ku jɛ inya bi kusĩmiɛ.

¹⁵ Tengi bɛi njo á ce bi kuwaɛ, nɔ bɛ mɔi á ye njɛɛ ŋa nɔ ku wɔɔba si ŋa ku kpɛkpɛ amaɛ ŋa jĩjĩɛ bɛ. Tengi bɛi yembeeku ŋa mɔ aa tɔtɔɔ nkpɔ nkpɔ.

¹⁶ Bii ì dɛdɛ tiai Aɔ̃ Lafɛ̃ɛ i cioɛ ŋa, aa gbɔ a ni, baa akã nŋa kù gbe do anyi, nɔ baa akã kù gaizia. Aɔ̃ Lafɛ̃ɛi í na ŋa wooda, nɔ hundeɛi wa tɔtɔɔ ŋa.

¹⁷ Nŋui í ta nŋa kpasa ku ba ku mà iyi á jɛ ti inɛ fei. Nŋui í so ikũɛ í ce nŋaò ikpɛ̃i ilɛu. Aŋai aa nɔɔ hee do ajɔ fei, nɔ bɛi aa maa wa waati kãma fei do tɔku nŋa ŋa.