Ezai 33 - Bibeli do fee

Inɔ kufɔi í jɛ ti woo ce asɔɔ

¹ Inɔ kufɔi á jɛ ti awɔ iyi ì waa ce asɔɔ, nɔ a kù ce asɔɔi awɔ mɔ, do awɔ iyi ì waa zamba kpaasi ŋa, nɔ a kù zamba awɔ mɔ. Waati iyi aa ce asɔɔu i tã, waati bɛɛbɛi aa ce asɔɔi awɔ mɔ. Nɔ waati iyi aa ce zambaɛ ŋau i tã, waati bɛɛbɛi aa zamba awɔ mɔ.

² Aɔ̃ Lafɛ̃ɛ, ce araare nwa. Siɛi kpãa ku cɔ nwa í wa. Jɔ̀ i jɛ gbugbã nwa daakɔ fei, nɔ i jɛ woo faaba nwa si waatii inɔ kufɔ.

³ Inɛi ilɛ ŋa à ya maa sai bii à gbɔ imuɛ, nɔ waati iyi ì dede, à ya fangaai.

⁴ Inɛ ŋa aa bii si mii ndu ŋɛ ŋai a koo bɛi kɛtɛngbo ŋa à ya ce. Inɛ ŋa aa bii si ŋai bɛi kɛtɛngbo ŋa à ya bii si mii ŋa.

⁵ Aɔ̃ Lafɛ̃ɛi í wa antaii mii fei, lelei í jɛ bi kuwaɛ. Nŋui í jɔ̀ asaiya do dee dee ku jɛ í wa bii fei si ilui Siɔ̃ɔ.

⁶ Awɔ inɛi Aɔ̃ Lafɛ̃ɛ, aa jɛ kuwɛɛi do laakai ku sũ. Inɛ ku jɛ ilu laakai nɔ ku nɛ kumài Aɔ̃ Lafɛ̃ɛi á jɔ̀ ku ba faaba, nɔ í yɛ bɛi lafɛ̃ɛ í jɛ ilu amani mbɛ. Bɛɛrɛi Aɔ̃ Lafɛ̃ɛ ku mài í jɛ amaniɛ.

Mii iyi Aɔ̃ Lafɛ̃ɛ á ce

⁷ Woo ja igũ ŋau à waa dɔ̃ anu ikpa waduude, nɔ woo bɛ ŋa iyi à bɔ idei laakai ku sũ ku fɔ ŋau à waa kpata ntɔ ntɔ.

⁸ Kpãa ŋau à baa à gbe ngbɛ. Inɛ kãma kù waa too ŋa má. Ilaalu ilu inɔ kukãu í fũ akabuu iyi aŋaò ŋa à dĩu, nɔ kù saalu ilu nla ŋau. Kù waa jirima inɛ kãma.

⁹ Inɔ kufɔ nla nla í wa si ilɛu, nɔ ilɛu í baa í gbɛ. Libãa í baa í wa si anyɔ, nɔ wuaɛ ŋa à waa gbɛ. Lɔɔmai iri kutau í baa í yɛ bɛi gbaa. Kaamɛli do Basãa a kù nɛ jĩi ŋa má.

¹⁰ Ŋɔi Aɔ̃ Lafɛ̃ɛ í ni, to, bɛbɛi an dasi baa, bɛbɛi an dede n tɛ, nɔ bɛbɛii an nyisi gbugbãm.

¹¹ Lasabu iyi ì ce ì jilɛ ŋa, í yɛ bɛi sɔndai mɛɛmu ŋa, nɔ bii waatii kuceɛ í to, fɔfɔ nŋu akãi á jɛ. Nɔ amii iŋɛ taka nŋɛi á na ku kpa ŋɛ bɛi ina.

¹² Zamaa iyi ihɔ̃ ŋau aa joi a ce ilúlu. Aa joi bɛi agũ ŋa iyi à da à dasi ina.

¹³ Iŋɛ iyi ì wa hee jĩijĩ, i gbɔ mii iyi ǹ ce ŋa. Nɔ iŋɛ mɔ iyi ì wa kɔkɔm, i jɔ̀ i mà gbugbãm ŋa.

¹⁴ Ilu dulum ŋa iyi à wa Siɔ̃ɔ, zigi nŋa í da. Nɔ inɛ laalɔ ŋa à wasi ku yaya. Yoo nwai á yɔkɔ ku leekĩ kɔkɔi ina iyi wa ce nfei mii ŋa bɛɛbɛ. Yoo nwai á yɔkɔ ku leekĩ kɔkɔi ina nyɛnyɛ hai nɛ kɔɔu bɛ.

¹⁵ Inɛ iyi wa ce isɛɛnɛɛ si dee dee ku jɛ, nɔ í jɛ inɛ iyi í ya fɔ ntɔ, nɔ ci ya bi mii ndii inɛ gɔ ku gba do gbugbã, nɔ ci ya jɛ inɛ ŋa a raa do amua ŋa, nɔ í ya dĩ itĩɛ ku ba ku maà gbɔ idei inɛ ku kpa ŋa iyi inɛ ŋa à waa fɔ, nɔ í ya bii ijuɛ ku ba ku maà yɛ mii laalɔ,

¹⁶ inɛ dimi bɛɛbɛ, si geete ŋai á wa. Kuta ku nɛ gbugbã ŋai aa jɛ bi ku manjiɛ. Aa muaa pɛ̃ɛ, nɔ aa naa inyi ku mɔ.

Aa faaba Zeruzalɛmu

¹⁷ Waati bɛɛbɛ, aa cɔ ilaalu nɔ aa yɔɔ do kusĩaɛ fei. Nɔ aa yɛ kucĩi ilɛu fei.

¹⁸ Aa maa lasabui si mii ŋa iyi à ya tako a maa da zigiɛ ŋau. Nɔ aa maa bee araɛi i maa ni, hee iwoi woo kɔ tiau í wa. Hee iwoi woo gba fiai lɛmpoou í wa. Hee iwoi inɛ iyi í ya maa cɔ ile kugboka ku nɛ gbugbã ŋau í wa.

¹⁹ I kaa yɛ zamaa ilu faauu má, zamaa iyi ide ku fɔɛ ci ya maajuu. Idei zamaau ci ya too kpãa, nɔ inɛ ci ya gbɔ yaaseɛ.

²⁰ Cɔ Siɔ̃ɔ, ilu bi ku ko ku ce jingau nwa ŋau. Aa yɛ Zeruzalɛmu í jɛ inyai laakai ku sũ. A kaa giima ilei acɔɛu má. Kɛkɛɛ ŋa iyi à kpakpau, a kaa wuu má pai. Nɔ ikũ ŋa iyi à dũu dou, a kaa fũ ŋa má.

²¹ Tengi bɛi Aɔ̃ Lafɛ̃ɛ á nyisi kulai nŋu takaɛ ntɔ ntɔ. Nɔ ido ku mungau ŋa do ido ŋa iyi à cĩ aa wa bɛ. Si ido iyi bɛ ŋa, akɔi inyi ku ja igũ ŋa do iyi à jɛ ti ku ce sĩa ŋa a kaa tooɛ.

²² Ntɔ ntɔ Aɔ̃ Lafɛ̃ɛi í jɛ woo gbã nwa. Nŋui í jɛ inɛ ngbo nwa. Aɔ̃ Lafɛ̃ɛi í jɛ ilaalu nwa. Nɔ nŋui í jɛ woo faaba nwa.

²³ Ikũɛ ŋau à cɔngɔlɔ, a kù waa dĩ si jĩi ndii tuutau má. Nɔ a ci ya jɔ̀ tuuta iyi í jɛ nyindau ku bɔ lele má. Ŋɔi à kpɛ̃ mii nkpɔ nkpɔ iyi à ba wa hai si igũu. Baa woo sukutɛ ŋa aa nɛ baa si mii ŋa ku ko wau.

²⁴ Inɛi ilui Zeruzalɛmu kãma kaa ya ni nŋu kù waa nɛ baani má. Aɔ̃ Lafɛ̃ɛ á cea inɛ ŋa iyi à wa si iluu suurui dulum du ŋa.