Ezai 32 - Bibeli do fee

Ilaalu iyi wa ce mii jiida

¹ Ilaalu gɔ á jɛ bomma nɔ ku maa ce mii iyi í jɛ dee dee. Amai ilaalu ŋau mɔ, aa maa nɛò ilɛui a maa tooò asaiya.

² Inɛ akã akã nŋa fei, á jɛi bɛi bi kuwa na fufu do bi ku manji na ijĩ nla nla iyi á naa anu akã do gbugbã, do bɛi inya iyi à ce bii inyi á too si ku maa bɔ si ilɛ ngbɛ, do bɛi jĩjĩi kuta nla gɔ si ilɛ ngbɛ.

³ Inɛ ŋa iyi à nɛ a yɛ ilu, nɔ a kù waa yɛ ilu ŋau fei, aa yɛ ilu. Inɛ ŋa mɔ iyi à nɛ a gbɔ ide, nɔ a kù waa gbɔ ide ŋau fei, aa gbɔ.

⁴ Inɛ ŋa iyi idɔ nŋa kù nɛ bisi bɛi aa gbɔò yaasei mii ŋa, aa gbɔ. Woo dabebe ŋa mɔ aa yɔkɔ a fɔ ide ku gbãa nɔ ku maaju sãa sãa.

⁵ Inɛ mɔ iyi í jɛ nnyɛi, a kaa kpoo do irii ilu bɛɛrɛ má. Nɔ inɛ mɔ iyi í nɛ bisi laalɔ ku zamba inɛ, a kaa kpoo do irii inɛ nla gɔ má.

⁶ Ntɔ ntɔ, inɛ iyi í jɛ nnyɛi, idei sũmui í ya maa fɔ, nɔ lasabui laalɔi í ya maa ce si idɔɛ. Ide sãmi ŋai í ya maa fɔ si gãmɛi Aɔ̃ Lafɛ̃ɛ. Inɛ iyi ari wa kpa, í ya jɔ̀ɔi hai nɛ sɔnda, nɔ inɛ mɔ iyi agbɛ wa kpa í ya jɔ̀ɔi do agbɛɛ.

⁷ Woo zamba inɛ, kuceɛ ŋa í ya yɛi bɛi jĩnɛi igũ. Í ya ce sɔɔlui zambaɛ ŋai ku ba do ide iboɛ ŋa ku ce nfei ilu are baa bii í jɛ si ntɔɛi í wa.

⁸ Amma inɛ iyi í jɛ ilu bɛɛrɛ, lasabui mii iyi í nɛ bɛɛrɛi í ya ce, nɔ mii nŋu ŋau bɛi í ya maa ceò icɛ.

Ide iyi waliiu wa sɔ̃ inaaboi Zeruzalɛmu ŋa

⁹ Iŋɛ inaabo ŋa iyi i kù waa ce weeweai nkãma ŋa, i sotĩ i gbɔ idem ŋa. Iŋɛ mudɛ̃ɛ ŋa iyi ì waa naanɛ ara nŋɛ ŋa, i de si idem itĩ ŋa.

¹⁰ Si adɔ̃ akã do ajɔ ŋa iyi á lesi keeke, aa maa yaya ŋa iŋɛ iyi ì waa naanɛ ara nŋɛ ŋau, domi isoi jĩi ŋa ku ka kaa wɛɛ má, nɔ amaajɛ ku da kãma kaa wɛɛ.

¹¹ Debɛi i jɔ̀ i wɛɛò zigiida ŋa, iŋɛ iyi i kù waa ce weeweai nkãmau bɛ. I yaya ŋa, iŋɛ iyi ì waa naanɛ ara nŋɛu. I bɔ ibɔ nŋɛ ŋa, i gbe basĩ ŋa, nɔ i we acɔi inɔ kufɔ si gbankili nŋɛ ŋa.

¹² I cã gɛndɛ i maa kpataò ŋa na mii iyi á na ku ba iko kusĩa nŋɛ ŋau do jĩi ndii rezɛ̃ɛ nŋɛ ŋa iyi à sou.

¹³ Agũ dimi ikã ikã ŋai aa fita a maa la si ilɛi inɛm ŋau hee do si kpasɛ̃ fei bii inɔ didɔ̃ í wa do si ilu bii aa maa gbɔ anu ku dɔ̃i inɔ didɔ̃.

¹⁴ Waati bɛɛbɛ, aa sa a nyɔ kabai ilaaluui, nɔ ilu bii à ya maa gbɔ anu ku dɔ̃i inɔ didɔ̃u, aa sa a nyɔɔi. Cingaa akãi iluu iyi à ya kpe Ofɛli, do ile kugboka ku nɛ gbugbãu, aa baa a gbe ngbɛ. Tengi bɛi sɛnga ŋa aa ya maa wa, nɔ tengi bɛi á jɛ bi kujɛi mɛɛmu gaa ŋa.

Kukpaasi nla nla iyi á ce

¹⁵ Ajɔ wa naa si bii Aɔ̃ Lafɛ̃ɛ á jɔ̀ hundeɛ ku naa si wa wa hai lele. Waati bɛɛbɛ, gbaa á kpaasi ku jɛ ikoi jĩi ŋa, nɔ ikoi jĩi ku baa ku jɛ bɛi agbo.

¹⁶ Waati bɛɛbɛ, asaiya á baai cau cau si gbaau, nɔ dee dee ku jɛ á baa si ikoi jĩi nɔu.

¹⁷ Mii iyi dee dee ku jɛu á naaò wai í jɛ laakai ku sũ. Nɔ dee dee ku jɛui á naaò kusĩmi wa do laakai ku sũ hee do ajɔ fei.

¹⁸ Inɛm ŋau aa maa wai si inyai laakai ku sũ, si inya ŋa bii naanɛ í wa. Zamaam nɔu á maa sĩmii si inyai bi kusĩmiu.

¹⁹ Amma kutai ijĩ ŋai aa naa a cuku si agbou a kɛkɛɛ mam mam, nɔ iluu ku lɛgɛ.

²⁰ Inɔ didɔ̃i á jɛ ti iŋɛ iyi ì gbɛ̃ ì too itĩi inyi ŋau ŋa, do iŋɛ iyi ì jɔ̀ kɛtɛ walakɔ gbankɛlɛ ŋa à waa dabii nŋa bɛi à bi.