Ezai 31 - Bibeli do fee

Inɛi Ezibiti ŋa, amanɛ ŋai

¹ Inɔ kufɔi á jɛ ti inɛ ŋa iyi aa bɔ Ezibiti ku ba a ba sobi. Acĩ ŋai à waa kaaba, nɔ naanɛ nŋa í wa si sarɛti ku ja igũ ŋa si na iyi í jɔ̀ à kpɔ, do si masa ŋa, domi à nɛ gbugbã ntɔ ntɔ. Amma a kù sinda ikpa bi Aɔ̃ Lafɛ̃ɛ Inɛ Kumái Izirɛliu, nɔ a kù bee lasabuɛ.

² Do nŋu fei, nŋu mɔ í nɔ í jɛ ilu laakai, nɔ á yɔkɔ ku jɔ̀ laalɔ ku naa. Sɔɔlui laalɔ iyi í ce ci ya jɔ̀ɔ. Í ya dedei si gãmɛi kpasɛ̃i ilu inɔ kukã ŋa do si gãmɛi woo ce laalɔ ŋa iyi inɛ ŋau à koo à waa tɔɔ sobi.

³ Inɛi Ezibiti ŋa, amanɛ ŋai. A kù nɛ gbugbã kãma bɛi Ilaaɔ̃. Acĩ nŋa ŋa, mɛɛmu ŋai. A kù nɛ gbugbã bɛi Ilaaɔ̃. Bii Aɔ̃ Lafɛ̃ɛ í wu awɔ, inɛ iyi wa naa faaba á koosɛi, nɔ inɛ iyi wa bi ku faabau ku cuku ilɛ. Tengi bɛi á jɛ iri ku kpai aŋa minji fei.

Aɔ̃ Lafɛ̃ɛi í jɛ inɛ iyi á kɔ̀ò Zeruzalɛmu

⁴ Ide iyi Aɔ̃ Lafɛ̃ɛ í sɔ̃m wee. Í ni, bɛi muusu nla walakɔ ama muusu nla í ya maa dɔ̃ anu na sɔndaɛ na irii woo degbe mɛɛmu ŋa iyi à tɔtɔɔ à waa ce siɛ iba, nɔ do nŋu fei zigiɛ ci ya da na anu ku dɔ̃ nŋau, nɔ zigiɛ ci ya da na zamaau, bɛɛbɛ mɔi á jɛ do amu Aɔ̃ Lafɛ̃ɛi lele do ilɛ waati iyi an na n kita wa si iri kutai Siɔ̃ɔ do si geeteɛ n ce igũ.

⁵ Bɛi yɛi í ya fũ ikpaɛ ŋa waati iyi wa fo, bɛɛbɛ mɔi Aɔ̃ Lafɛ̃ɛi lele do ilɛ á fũ ikpaɛ ku bii Zeruzalɛmu. Nŋui á maa degbeɛ nɔ ku faabaɛ. Nŋui á maa muu nɔ ku nyaa hai si wahala.

⁶ Iŋɛ inɛi Izirɛli ŋa, ì sinda ì toa Aɔ̃ Lafɛ̃ɛ anyi ŋai mam mam, amma i sinda i nyi wa bi tɛɛ ŋa.

⁷ Ajɔ wa naa si bii inɛ akã akã nŋɛ fei á fũsi iwɛ̃ɛ ŋa iyi í ce do isɔ fũfũ do iyi í ce do wura ŋau awɔ. Iwɛ̃ ŋau, awɔ ku ce dulum du ŋɛ ŋaui à ce ŋa.

⁸ Asiri á cukui si taakuba, amma kaa jɛ taakubai amanɛ. Taakuba iyi kù jɛ ti amanɛi á ce nfeɛ. Asiri á maa saa taakubaui, nɔ aa mu awaasũɛ ŋai a dasi ŋa icɛi aru.

⁹ Inɛi Asiri ŋau aa maa yaya do njoi, ilu gbugbã ŋau aa sai. Inɔi inɛ ngbo nŋa ŋau á fɔi, nɔ a sa a nyɔ tuuta nŋau. Amu Aɔ̃ Lafɛ̃ɛi ǹ fɔ bɛɛbɛ, amu iyi amɛi inam wa jo si ilui Siɔ̃ɔ, nɔ ina nla nla wa jo si ilui Zeruzalɛmu.