Ezai 30 - Bibeli do fee

Akabuu iyi Ilaaɔ̃ kù bi

¹ Aɔ̃ Lafɛ̃ɛ í ni inɔ kufɔi í jɛ ti ama woo kɔ̀ ide ŋa. Í ni à ya maa ce lasabui mii ŋa iyi kù waa naa hai bi ti nŋu, nɔ à ya maa dĩ akabuu ŋai iyi kù waa naa hai si lasabui nŋu. Do yaase bɛɛbɛ, à ya maa kɔ̃ɔsi dulum nii si antaii dulum.

² Í ni inɛ ŋau à ya bɔ Ezibitii, amma a ci ya sabuu nŋu ide kãma. À ya koo bɛi a koo a manji si ile ku nɛ gbugbãi ilaalu Faraɔ̃. Ilɛi Ezibitiui í jɛ bi ku bɔ ku manji nŋa.

³ Amma ile ku nɛ gbugbãi Faraɔ̃ bii aa bɔui á sinda ku jɛ anyɔ nŋa. Ezibiti bii aa koo a manjiui á jɔ̀ bɛɛrɛ nŋa ku kaye.

⁴ Inɛ ngbo nŋa ŋau à wa Soãa tã, nɔ woo bɛ nŋa ŋau mɔ à to Hanɛsi.

⁵ Anyɔ á mu aŋa feii na zamaau iyi kaa jɛ nŋa sobi. Kaa yɔkɔ ku faaba ŋa hee má jɛ ku sobi ŋa. Amma anyɔi a jɛ nŋa nɔ bɛɛrɛ nŋa ku kpa iri.

Inɛ ŋa iyi à waa bɔ sobi ku ra wa hai Ezibiti

⁶ Mɛɛmu ku ce icɛ ŋa à so aso à waa nɛò ikpa awɔ cangai kpãai inunu. Do ikpa bii à waa bɔu, inyai inɔ kufɔ do inyai zigiidai. Muusu nla kugaabu ŋai à wa bɛ, nɔ à waa dɔ̃ anu. Njo wukuku ŋa à wa bɛ do akandama ku fo lele ŋa. Amani ŋai à kãa gbankɛlɛ ŋa do kpookpo ŋa à waa kooò bi inɛi ilɛ ŋau, amma inɛ ŋau a kaa sobi ŋa si nkãma.

⁷ Ntɔ ntɔ, sobii Ezibiti kù nɛ aranfãani kãma, nɔ mɔm inya ngbɛi. Na ŋɔi í jɔ̀ ǹ kpoo Rahabu iyi wa sĩmi.

Idei mii iyi á na ku naa

⁸ Ŋɔi Aɔ̃ Lafɛ̃ɛ í sɔ̃ Ezai í ni, kɔ ideu ihɛ̃ si wajui inɛi Zeruzalɛmu ŋa si kuta bii à ya kɔsi gɔ, nɔ i kɔɔ si tia gɔ. Iyi bɛi á jɛ sɛɛda hee do ajɔ fei si waati iyi wa naa do waju.

⁹ Ntɔ ntɔ zamaau í nɛ ide ku kɔ̀. À jɛ ama woo sɔ ibo ŋa, nɔ a ci ya bi ikɔi Aɔ̃ Lafɛ̃ɛ ku gbɔ.

¹⁰ Aŋai à ya sɔ̃ woo ce kuyɛ ŋa a maa ni, i maà yɛ ngɔgɔ ŋa. Nɔ à ya sɔ̃ walii ŋa a maa ni, i maà ce kuyɛ iyi í jɛ dee dee si gãmɛ nwa ŋa. I ya sɔ̃ wa idei mii ŋa iyi á dɔ̃ nwa si, nɔ i ya ce nwa kuyɛ ŋa iyi a kù jɛ ntɔ.

¹¹ À ya sɔ̃ walii ŋai a maa ni a tɛkɛɛ a jĩò kpãa iyi í tɛ, nɔ a jɔ̀ kpãa iyi í jɛ ntɔ iyi à nɛ a maa toou. À ya ni, i maà sɔ̃ wa idei Aɔ̃ Lafɛ̃ɛ Inɛ Kumái Izirɛliu má ŋa.

Kucuku iyi kaa teese

¹² Aɔ̃ Lafɛ̃ɛ Inɛ Kumái Izirɛliu í ni ì kɔ̀si idei nŋu ŋa, nɔ naanɛ nŋɛ í wai si woo taa inɛ ŋa gbugbã ŋa do si woo zamba inɛ ŋa. Inɛ ŋau bɛi ì waa kaaba ŋa.

¹³ Kurara iyi bɛ á yɛi bi tu ŋɛ bɛi bindi kugboka iyi í là nɔ í cuku anu akã.

¹⁴ Á lɛgɛi bɛi boonyi iyi woo ma caka ŋa à ce. À ce buubuui, nɔ baa akãi buubuuɛ ŋau kaa to a ceò adɛ̃ ku bu ina walakɔ mii iyi aa ya buò inyi wa hai si bii gɔ bii à dasi inyi.

I sũ laakai nŋɛ nɔ i dasim naanɛ ŋa

¹⁵ Ŋɔi Aɔ̃ Lafɛ̃ɛ, nŋu iyi í jɛ Inɛ Kumái Izirɛliu í fɔ í ni aa ba faaba ŋai, bii ì sinda ì nyi wa bi ti nŋu, nɔ ì wɛɛ sɛ̃ɛ ŋa. Si sɛ̃ɛ ku ce nŋɛ do si naanɛ ku dasi nŋɛ si nŋu Aɔ̃ Lafɛ̃ɛi aa ba gbugbã ŋa. Amma i kù bi iyi bɛ ŋa.

¹⁶ Ì fɔ ŋai ì waa ni ŋa, aawo, aa ka sai do acĩ. Na ŋɔi í jɔ̀ aa sa ŋa. Ì waa fɔ má ŋa ì waa ni acĩ ŋa iyi à gbãai aa gũ ŋa. Amma inɛ ŋa iyi aa maa lele ŋɛ ŋau mɔ aa gbãa a re ŋɛ.

¹⁷ Mbɛɛ akã í to ku jɔ̀ amanɛ dubu si inɔ nŋɛ ku maa sa. Nɔ bii amanɛ miiu í naa si ŋɛ, iŋɛ fei aa maa sa ŋai hee i koo i gbe ŋa bɛi akpai tuuta iyi í wa si antaii iri kuta walakɔ bɛi nyinda iyi í wa si antaii geete.

Waatii faaba

¹⁸ Na ŋɔi í jɔ̀ Aɔ̃ Lafɛ̃ɛ wa degbe ku ba ku ce nŋɛ didɔ̃. Aɔ̃ Lafɛ̃ɛ á dedei ku ce araare nŋɛ, domi í jɛ dee dee. Ilu inɔ didɔ̃ ŋai inɛ ŋa iyi kpãa ku cɔ nŋa fei í wa siɛ.

¹⁹ Ntɔ ntɔ, iŋɛ inɛi Siɔ̃ɔ ŋa aa wa Zeruzalɛmu má ŋa. I kaa kpata má ŋa. Aɔ̃ Lafɛ̃ɛ á ce nŋɛ didɔ̃ waati iyi aa dɔ̃ siɛ anu ŋa. Waati iyi á gbɔ anu ku dɔ̃u gbakã, á jɛ nŋɛi.

²⁰ Aɔ̃ Lafɛ̃ɛ á mu nŋɛ sɔnda do inyi si waatii wahala. Nŋu iyi í jɛ mɛɛtu nŋɛ kaa fa araɛ ku manji nŋɛ má. Aa yɔɔ do iju nŋɛ.

²¹ Bii ì waa bɔ do ikpa awɔ njɛ ŋa, walakɔ bii ì waa bɔ do ikpa awɔ canga ŋa, hai do anyi nŋɛ wa aa gbɔ do itĩ nŋɛ nŋu takaɛ ku sɔ̃ ŋɛ ku ni, i cɔ kpãa ihɛ̃, i tooɛ ŋa.

²² Isɔ fũfũ iyi ì so ì biiò iwɛ̃ nŋɛ ŋa, do wura ŋa iyi ì bii ŋa do ŋa, aa jilɛ ŋai si mii hai maaju ŋa. Nɔ hee do buubuu nŋa ŋau fei, aa jilɛ ŋai si mii riisi ŋa. Aa nya ŋai i fitaò hai si anini nŋɛ.

²³ Aɔ̃ Lafɛ̃ɛ á jɔ̀ ijĩ ku wɔ si dimi iyi ì gbɛ̃ si ilɛ ŋa, nɔ ilɛu á jɔ̀ amaajɛ nŋɛ ŋa a kpɔ nɔ a jɛ sɔnda jiida. Si waati nŋu bɛ, mɛɛmu nŋɛ ŋa aa ba fɔfɔ a maa jɛ si bantuma kucĩ gɔ.

²⁴ Kɛtɛ ŋa do gbankɛlɛ ŋa iyi à waa fa ilɛu, aa ba fɔfɔ iyi í nɛ imu a jɛ. Mii iyi à ya fɛò bileeui aa fangaa nŋaò fɔfɔu si ilɛ.

²⁵ Si iri kuta kugboka ŋa fei, do si geete ŋa, aa tu inya ŋai bii inyi á maa cã, nɔ inyi á maa wɛɛi si ajɔi igũ waati iyi ile kugboka ŋau aa cuku.

²⁶ Ajɔ iyi Aɔ̃ Lafɛ̃ɛ á jɔsi agbɛ bii í mɛɛ inɛɛ ŋau iwɔ nɔ ku jɔ̀ kumɛɛ ŋau a tã, ajɔ nŋu bɛ inya kumái cukpa á yɛi bɛi ti inunu, nɔ inya kumái inunuu takaɛ á la ku re bɛi í ya tako ku ceu ikɔ mɛɛje bɛi inya kumái ajɔ mɛɛje.

Aɔ̃ Lafɛ̃ɛ í naa ku kpã inɛi Asiri ŋa iju

²⁷ Aɔ̃ Lafɛ̃ɛ wa naai hai jĩijĩ. Idɔɔkɔ̃ɛ í yɛi bɛi ina iyi wa jo, nɔ ijuukpã iyi wa naaò wa í wo ntɔ ntɔ. Ide ŋa iyi wa fita wa hai si gɛlɛɛ fei, do idɔɔkɔ̃i. Nɔ ideɛ í yɛi bɛi ina iyi á ce asɔɔ.

²⁸ Amiɛ í yɛi bɛi inyi iyi wa cã do gbugbã, nɔ í kɔ̃ í to hee si kɔ̃ɔ. Á dasi inɛi ilɛ ŋa si nyangaai ku gbugbã ŋa nɔ ku jɔ̀ ijuukpã ku naa si ŋa, nɔ ku daa zamaau si arezem si gɛlɛ ku gbã ŋa ku bɔò ŋa tengi bii a kù bi.

²⁹ Amma iŋɛ inɛi Zeruzalɛmu ŋa, aa maa kɔ̃ iri ŋai bɛi inɛ ŋa à ya maa kɔ̃ iri idũ bii à waa ce jingau. Inɔ nŋɛ á maa dɔ̃i bɛi inɛ iyi à waa fãa yee waati iyi wa bɔ iri kutai Aɔ̃ Lafɛ̃ɛ, bi Aɔ̃ Lafɛ̃ɛ iyi í jɛ Kutai Izirɛliu.

³⁰ Aɔ̃ Lafɛ̃ɛ á jɔ̀ a gbɔ imui ilaalu ku jɛɛ hee lele. Á jɔ̀ inɛ ŋa a yɛ awɔɛ iyi á naa si ŋa si idɔɔkɔ̃ nla nlaɛ. Á nyisi idɔɔkɔ̃ nlaɛui si amɛi ina iyi í ya ce asɔɔ do si ijĩ iyi wa wɔ do fufu do kutai ijĩ ŋa.

³¹ Waati iyi inɛi Asiri ŋa aa gbɔ imui Aɔ̃ Lafɛ̃ɛ, nɔ goloi Aɔ̃ Lafɛ̃ɛu ku maa naa si ŋa, zigi nŋa á da ntɔ ntɔ.

³² Golo anu bɛi Aɔ̃ Lafɛ̃ɛ í jilɔɔ si nŋu ku cã ŋa, á maa cã ŋai do anu ku dɔ̃i bata do mɔɔlɔ. Á kpã inɛi Asiri ŋa ijui, nɔ ku ce igũ do ŋa.

³³ Hai ku kpɛi à ce sɔɔlui jĩi ŋa à tɔtɔɔɛ. À cooi na irii ilaalu si afe gɔ iyi í cĩ nɔ í jĩisa. Tengi bɛi aa dasi jĩi nkpɔ nkpɔu ina. Fufui kumii Aɔ̃ Lafɛ̃ɛi á dasi inau, nɔ inau á dedei bɛi inai fainwita.