Ezai 3 - Bibeli do fee

Bommai Zudaa í fɔtɔtɔ

¹ Iŋɛ inɛi Zeruzalɛmu ŋa, do iŋɛ inɛi bommai Zudaa ŋau i sotĩ i gbɔ ŋa. Ilaaɔ̃ nŋu iyi í wa antaii mii baa yooma fei, nŋu iyi í jɛ Aɔ̃ Lafɛ̃ɛi lele do ilɛ, á jɔ̀ kosĩai sɔnda do inyi nŋɛ ŋa fei ku kpa iri. Bɛɛbɛ mɔi á jɔ̀ mii iyi ì waa kaaba ŋa fei ku kpa iri.

² Inɛmɔkɔ ilu gbugbã ŋau do sooge ŋa, woo kiiti ŋa do walii ŋa, woo ce alisi ŋa do woo cua ŋa,

³ inɛ ngboi sooge ciitaa ŋa, do inɛ ngbo ilu bɛɛrɛ ŋau, woo muaa inɛ ŋa ikɔ ŋa, do woo mà icɛi awɔ ŋa ku ce, do woo ce dobu dobu ŋa.

⁴ Aɔ̃ Lafɛ̃ɛ í ni, awaasũ ŋai an jɔ̀ a jɛ ilaalu nŋɛ ŋa, nɔ ama keeke ŋai an jɔ̀ a wa antai nŋɛ.

⁵ Si zamaau inɛ ŋa aa ya maa taa njɛ gbugbãi. Awaasũ ŋa a kaa ya saalu mɔkɔ ngbo ŋa, nɔ inɛ ngbɛ ngbɛ ŋa a kaa saalu ilu bɛɛrɛ ŋa.

⁶ Inɛ á mu inɛɛ iyi aŋaò à jɛ inɛi kpasɛ̃ akã nɔ ku sɔ̃ɔ ku ni, awɔ iyi ì nɛ ibɔ sisɔ iyi aa dasi, awɔi aa jɛ inɛ ngbo nwa. Gba mii ŋa iyi à waa bɛjɛu ihɛ̃ si gbugbãɛ.

⁷ Amma inɛ iyi ihɔ̃u á jɛ ku ni, n kaa n yɔkɔ n ce nŋɛ nkãma. N kù nɛ sɔnda, nɔ n kù nɛ ibɔ sisɔ si inɔ kpasɛ̃m. I maà som inɛ ngbo ŋa.

⁸ Zeruzalɛmu í koosɛ, nɔ Zudaa mɔ í cuku si na iyi í jɔ̀ à dedeò ide ku kɔ̀ si gãmɛi amboei Aɔ̃ Lafɛ̃ɛ, do hai si ide ku fɔ nŋa ŋa do kuce nŋa ŋa si wajuɛ.

⁹ Kucei aŋa tii taka nŋai wa jɛ sɛɛdai laalɔ ku jɛ nŋa. À waa ce dulum nii bɛi inɛi Sodomu ŋa, a kù waa singaɛ mɔm. Inɔ kufɔi á jɛ tu ŋa, domi sɔɔlui inɔ kufɔi à waa cea ara nŋa.

¹⁰ Amma i sɔ̃ inɛ dee dee ŋau ngu ŋa i ni à wa si kpãa jiida nɔ aa jɛ ribai kuce nŋai.

¹¹ Amma inɛ laalɔ ŋa, inɔ kufɔi á jɛ tu ŋa, domi a kù wa si kpãa jiida, nɔ mii iyi à ce, nŋui aa sã nŋa.

¹² Ama keeke ŋai à waa kpã zamaam ŋa iju, nɔ inaabo ŋa à kãmia ŋa. Inɛ ŋa iyi à waa gbã zamaam nɔu fei, à waa nyɔ ŋai. À waa bɛjɛaa kpãa iyi wa tooi.

Ilaaɔ̃ á kiiti woo cua ŋa

¹³ Aɔ̃ Lafɛ̃ɛ í dede ku ba ku ce kiiti. Í tã sɔɔlu ku kiiti inɛɛ ŋa.

¹⁴ Á kiiti woo cua ŋa do inɛ ngboi zamaa ŋau. Aɔ̃ Lafɛ̃ɛ í ni, iŋɛi ì bɛjɛ jĩi ndii rezɛ̃ɛ ŋau, iŋɛi ì gba mii ndii ilu are ŋau fei ì kosi kpasɛ̃ nŋɛ ŋa.

¹⁵ Na mii í ce ì waa tɛɛsɛ zamaam bɛɛbɛ ŋa. Na mii í ce ì waa taa ilu are ŋau gbugbã ŋa. Aɔ̃ Lafɛ̃ɛi lele do ilɛui wa bee ŋɛ bɛɛbɛ.

Ilaaɔ̃ á kiiti abo kusĩai Zeruzalɛmu ŋa

¹⁶ Aɔ̃ Lafɛ̃ɛ í ni, inaaboi ilui Siɔ̃ɔ ŋau à nɛ faau. Cɔ bɛi à so kɔ̃ɔ à waa nɛò, nɔ à nɛ ilu ku cɔ iyi aa faò laakaii inɛ ŋa. Bii à waa nɛ kpɛlɛ kpɛlɛ, isɔ ŋa iyi à dasi ijui isɛ nŋa ŋau à ya maa dɔ̃ anui.

¹⁷ Na nŋu, Aɔ̃ Lafɛ̃ɛ á jɔ̀ ntoi iri nŋa ŋa a wɔi a baa a gbe hai nɛ nto, nɔ ku jɔ̀ ŋa basĩ.

¹⁸ Ajɔ nŋu bɛi Aɔ̃ Lafɛ̃ɛ á jɔ̀ a kua mii iyi í jɛ booda nŋau fei. Hai lɛgɛ ŋa iyi à wa si ijui isɛ nŋa ŋau do mii ŋa iyi à dĩò ntoi iri nŋa ŋau, hee do booda iyi í jɔ cukpa titɔ̃ ŋau fei,

¹⁹ do hanlaga nŋa ŋa, do isɔi awɔ nŋa ŋa do fuugɛsɛ,

²⁰ do mii ŋa iyi à ya dĩ si iri nŋa ŋa, do saba ŋa, do santiiki ŋa iyi à ba, do gui ŋa, do yoomandi ŋa,

²¹ do lɛlɛawɔ ŋa, do lɛlɛawɔ ŋa iyi à ya dasi imɔ,

²² do jĩnɛi jingau ŋa, do dimii ibɔ kumboo gɔ ŋa, do mango ŋa, do bɔgɔ ŋa,

²³ do ibɔ ku nɛ sisima gɔ ŋa, do gɔgɔ ŋa iyi à yɛ fɛɛfɛlɛ, do dimii ibɔ mmu gɔ má, do bɔngɔtɔbɛɛ.

²⁴ Inunui konkombii á gba agbɛi tuae nŋa ŋau, nɔ ikũ alalai á baa ku jɛ santiiki nŋa ŋa. Iri nŋa kaa nɛ nto iyi aa ba a ba má. A kaa nɛ ibɔ jiida ti jingau má, í gbe jĩnɛi akũ iyi aa dĩ si kpaka nŋa. Jĩnɛi anyɔ ŋai aa gba agbɛi booda nŋau.

Inaaboi ŋa Zeruzalɛmu aa gbe jaaɔ̃

²⁵ Awɔ Zeruzalɛmu, aa kpa soogeɛ ŋai si igũ, nɔ woo ja igũ ilu wɔɔkɔɛ ŋau a ku.

²⁶ Ajɔ nŋu bɛ, inɛ ŋa iyi à wa anu koofai iluu, aa kpatai a maa weeweaò bɛi inaabo iyi í kua mii iyi í nɛ fei nɔ wa buba ilɛ.