Ezai 29 - Bibeli do fee

Zeruzalɛmu á maai ku ce nfe, amma anu akã aa yaa

¹ Ariɛli, Ariɛli, inɔ kufɔi í jɛ titɛɛ awɔ ilu bii Davidi í ce asɔ ku ba ku lɔ siɛu. Baa bii adɔ̃ í kɔ̃ɔsi si adɔ̃, nɔ à jɔ̀ jingau ŋa à waa ce si agbɛ nŋa,

² amu Aɔ̃ Lafɛ̃ɛ ǹ ni, an ce nfeɛi nɔ inɔ kufɔ do kuweeweai á naa siɛ, nɔ bi tom iluu á baa ku jɛi bɛi bi ku ce kuwee.

³ An ce asɔi n kaakoɛ, nɔ an jɔ̀ sooge ŋa a kaakoɛi. Nɔ an ma idĩ kugboka ŋa hai bii an ba n lɔ siɛò wa.

⁴ Aa cukui hee ilɛ, nɔ imuɛ á jɔ bɛi imu iyi wa naai hai hee lɛlɛi ilɛ. Hai si ilului aa maa gbɔ ide ku fɔɛ wa, nɔ kaa fita jiida mɔm. Bii inɛ wa gbɔɔ, á ni bɛi imui zĩi gɔi iyi kù waa fita wa sãa sãa hai lɛlɛ.

⁵ Akpɔi mbɛɛɛ ŋau á yɛi bɛi sãa. Zamaai ilu inɔ kukã ŋau aa yɛi bɛi fɔfɔ wɛwɛɛ ŋa iyi à fo lele. Nɔ anu akã, tengi bɛ gbakã,

⁶ Aɔ̃ Lafɛ̃ɛi lele do ilɛ á naa siɛ wai si kulai ijĩ nla gɔ, do si kuyayai ilɛ do iba nla nla gɔ, do si fufui ijĩ nla nla gɔ, do amɛi ina iyi á ce asɔɔi mii fei.

⁷ Zamaai ilɛ ŋa iyi aa naa siɛ igũ nɔ a bu iluɛ koeu aa nɛi bɛi ala do kuyɛi idũ iyi ci ya kpɛ.

⁸ Nɔ yaase bɛi inɛ iyi bii ari wa kpaa, í ya laala ku yɔɔ iyi nŋu wa jɛ, waati iyi í jĩ nɔ ku ba wee inɔi nŋu í wɛɛ ngbɛ, do bɛi inɛ iyi bii agbɛ wa kpaa, í ya laala ku yɔɔ iyi nŋu wa mɔ inyi, waati iyi í jĩ nɔ ku ba wee gbangɔlɔi nŋu í wɛɛ ngbɛ, bɛɛbɛ mɔi á jɛ do zamaai ilɛ ŋa iyi à naa si iri kutai Siɔ̃ɔ igũ ku ce.

Inɛi Izirɛli ŋa à yɛ bɛi fɛɛju ŋa do bɛi inɛ ŋa iyi atɛ̃ wa kpa

⁹ I jɔ̀ i wɛɛò biti ŋa nɔ i maà fɔ ide ŋa. I bii iju ŋa, nɔ i baa i jɛ fɛɛju ŋa. À waa ce bɛi atɛ̃ wa kpa ŋa, amma kù jɛ atɛ̃. À koosɛ à waa ce takaa takaa, amma kù jɛ atɛ̃i wa dasi ŋa.

¹⁰ Ntɔ ntɔ, Aɔ̃ Lafɛ̃ɛ í da nŋɛ si sĩsĩ njoo si idɔ, í bii iju nŋɛ iŋɛ walii ŋa, nɔ í bii wajui woo yɛ nŋɛ ŋau mɔ.

¹¹ Kuyɛ iyi ihɛ̃ fei, í yɛi bi tu ŋɛ bɛi ide ŋa iyi à wa si tia, nɔ à ce si akpaawɔ à bɛi à soo à na inɛ gɔ iyi í mà ku cio, à ni, à waa tɔɔɛi, cio ideu ihɛ̃ wa. Nɔ lafɛ̃ɛ í jɛ í ni, n kaa n yɔkɔ, domi à ce si akpaawɔi.

¹² Walakɔ bɛi tia mmu iyi à na inɛ gɔ iyi kù mà ku cio à bɛi à sɔ̃ɔ à ni, à waa tɔɔɛi, cioɛ wa. Nɔ í jɛ í ni, n kù mà ku cio.

Idei biti ŋau a kù tã

¹³ Ŋɔi Aɔ̃ Lafɛ̃ɛ í ni, inɛ ŋau ihɛ̃ à ya naa kɔkɔm nii a maa jirimam do gɛlɛ nŋu akã. Amma idɔ nŋa í jĩim. Bɛɛrɛm iyi à waa ni aŋa à mà, iboi. Woodai amanɛ ŋa do cio nŋa nŋu akãi à waa too si.

¹⁴ Na nŋu, an maa n mɔsii n jɔ̀ inɛ ŋau a ya maa biti do maamaake nkpɔ nkpɔ ŋa iyi an maa n ce. Laakai iyi ilu laakai ŋau à nɛ, á ya koo kpa irii. Nɔ bisii ilu bisi ŋau á tãi.

Si afe iwoi ì waa jilɛ Aɔ̃ Lafɛ̃ɛ ŋa

¹⁵ Inɔ kufɔi í jɛ ti inɛ ŋa iyi à sa à waa manjia Aɔ̃ Lafɛ̃ɛ ku ba a singaa mii ŋa iyi à dasi idɔ aŋa a ce. Inɛ ŋau à ya maa ce kookoosu laalɔ nŋa ŋai si ilu kuku ŋa, nɔ à ya fɔi a maa ni, yooi wa yɛ wa. Yooi í mà wa.

¹⁶ Dimii ku bɛjɛ yoomai í wa si ŋɛ bɛɛbɛ ŋa. Woo ma caka kù jɛ bɛi amà. Icɛi awɔɛ kaa yɔkɔ ku fɔ ku ni, kù jɛ nŋui í cem. Caka kaa yɔkɔ ku fɔ si gãmɛi inɛ iyi í coo ku ni, kù nɛ bisi.

Kukpaasi nla nla si mii fei

¹⁷ Ntɔ ntɔ waati iyi í gbe kù sɔ má Libãa ku baa ku kpɔò bɛi ikoi jĩi, nɔ ikoi jĩi nɔu ku baa ku yɛ bɛi agbo.

¹⁸ Waati bɛɛbɛ, dekĩ ŋa aa gbɔ ide iyi à fɔ si tiau, nɔ fɛɛju ŋa mɔ aa fita hai si ilu kuku bii à wau a maa yɛ ilu.

¹⁹ Hai nɛ gbugbã ŋa aa ba inɔ didɔ̃ nla nla si Aɔ̃ Lafɛ̃ɛ, nɔ inɛ ŋa iyi à jɛ ilu are à re inɛ fei, aa nɛ inɔ didɔ̃ nla nla na Inɛ Kumái Izirɛliu,

²⁰ domi woo taa inɛ ŋa gbugbã kaa wɛɛ má, woo yaako amanɛu mɔ kaa wɛɛ má. Nɔ inɛ ŋa mɔ iyi à ya leekĩ a maa wɔ njoo na laalɔ ku ce ŋau mɔ fei, aa nya ŋai.

²¹ Inɛ ŋau, aŋai à ya maa yɛ taalei inɛ ŋa, nɔ à ya maa lea inɛ iyi í ya maa kiiti inɛ ŋa anu koofai iluu cɛkũm ŋa, nɔ a maa na ilu ntɔ ŋa taale.

²² Na nŋu, ide iyi Aɔ̃ Lafɛ̃ɛ nŋu iyi í faaba Aburahamu í fɔ si kpasɛ̃i Zakɔbu wee. Í ni, bɛbɛi inɛi Zakɔbu ŋa a kaa wɛɛò inɔ kufɔ má, nɔ anyɔ kaa mu ŋa má.

²³ Waati iyi amaɛ ŋa aa na a yɛ icɛi awɔm ŋa si anini nŋa, aa mà bɛɛrɛm. Nɔ aa mà iyi amui ǹ jɛ Inɛ Kumái Zakɔbu. Waati bɛɛbɛ, aa maa yayai si wajui amu Aɔ̃ Lafɛ̃ɛi Izirɛli.

²⁴ Nɔ inɛ ŋa iyi a kù nɛ lasabu jiida wo, aa cɛ ku gbɔ yaasei mii ŋa. Nɔ inɛ ŋa mɔ iyi à ya maa kɔ̀ ide wo, aa jɛsi a kɔ ŋa.