Ezai 28 - Bibeli do fee

Fufu nla gɔ iyi á ce asɔɔi Samari

¹ Inɔ kufɔi í jɛ ti Samari ilu iyi í yɛ bɛi fulai ilaalu nɔ wa jɛ faaui woo mɔ atɛ̃ ŋa si dimii Efaraimu ŋa. Ilu iyi wa jɛ boodaɛ nɔ í wa si antaii iri kuta iyi wa cɔ lɔɔma ku nɛ taasiu wa do ikpa ilɛ, í yɛi bɛi kokoi jĩi iyi í gbɛ si irii inɛ ŋa iyi atɛ̃ vɛ̃ɛ wa kpa ŋau.

² Inɛ gɔ wee wa naa hai bi Aɔ̃ Lafɛ̃ɛ. Inɛɛu í nɛ gbugbã nɔ í nɛ wɔɔkɔ. Í yɛi bɛi kutai ijĩ iyi í wɔ wa do fufu nla nla ku ce asɔɔ, do bɛi ijĩ nla nla iyi í ya jɔ̀ inyi ku maa cã bii fei. Í jɔ̀ iluu í cuku hee ilɛ do gbugbã nla nla.

³ Ilu iyi í yɛ bɛi fulai ilaaluu à lɛgɛɛ mam mam. Ilu iyi í jɔ̀ inɛi Efaraimu ŋa à wɛɛò faau, hee à ya mɔ atɛ̃ vɛ̃ɛ ku maa kpa ŋau, aa jojo sii a tɛɛsɛɛ ilɛ.

⁴ Nɔ kokoi jĩi iyi í gbɛ iyi í jɛ boodaɛ nɔ í wa si antaii iri kuta iyi wa cɔ lɔɔma ku nɛ taasiu wa do ikpa ilɛ, á yɛi bɛi isoi jĩi ndii figi iyi í tako í jĩa hai waati iyi ku kaɛ kù to. Inɛ iyi í hɔ̃nnɛɛ fei, á ya kaai ku dasi gɛlɛ anu akã.

⁵ Waati wa naa si bii Aɔ̃ Lafɛ̃ɛi lele do ilɛu takaɛi á jɛ bɛi fula ku daanai ilaalu do booda kusĩa gɔ iyi á jɛ ti zamaaɛ iyi í gbeu.

⁶ Inɛ ŋa iyi à jɛ woo kiiti ŋa, hundeɛui á jɔ̀ a ya ce kiiti iyi í tɛ, nɔ nŋui á muaa inɛ ŋa iyi à waa lele mbɛɛ ŋa gbugbã a ya tale ŋa a bɔò ŋa hee andɛ koofa nŋa.

Woo mɔ atɛ̃ ŋa iyi à waa yaako walii

⁷ Inɛ ŋa iyi à mɔ atɛ̃ vɛ̃ɛ, à ya maa koosɛi, nɔ atɛ̃ ku nɛ gbugbã ŋa, à ya jɔ̀ inɛ ŋa a nyɔi. Woo wee do walii ŋa à waa koosɛi na atɛ̃ ku nɛ gbugbã ŋau. Atɛ̃ vɛ̃ɛu í la si ŋai ntɔ ntɔ, nɔ atɛ̃ ku nɛ gbugbã ŋaui í jɔ̀ à waa nyɔ. À ya nyɔ mɔm nii si kuyɛ nŋau, nɔ a ci ya leekĩ si ide akã.

⁸ Itu nŋa ŋa do mii sãmi ŋai à ya maa kɔ̃ si antaii taabu nŋa ŋa. Inya ngbɛ kãma ci ya wɛɛ.

⁹ [Aŋai à ya fɔ si gãmɛi Ezai a maa ni,] yoo ŋai Ezai wa bi ku cea cio ku na ŋa ikɔ ya. Yoo ŋai wa bi a gbɔ yaasei ikɔɛu ya. Kú jɛ amu ŋa iyi à kpoto nsɛi iyi amɔ ku jɔ̀ nŋa kù kpɛ?

¹⁰ I gbɔ bɛi wa dɔ̃ ŋa. Wooda do wooda. Asaiya do asaiya. Keeke ihɛ̃, keeke ihɔ̃.

¹¹ To, bɛbɛi Aɔ̃ Lafɛ̃ɛ á ba ŋa ide ku fɔi do fee iyi a kù waa gbɔ, do feei inɛ njoo ŋa.

¹² Aɔ̃ Lafɛ̃ɛ í bɛi í tako í sɔ̃ ŋa wo í ni, ihɛ̃ bɛbɛi, kusĩmii. Inɛ iyi í gbɛɛji, i jɔ̀ ku sĩmi ŋa. Tengi ihɛ̃, inya sɛ̃ɛi. Amma a kù bi ku gbɔ.

¹³ Bi tu ŋa, idei Aɔ̃ Lafɛ̃ɛ á jɛi, wooda do wooda. Asaiya do asaiya. Keeke ihɛ̃, keeke ihɔ̃. Iri ku kpaɛ, aa cuku kaiyai nɔ bũu nŋa ŋa a cɛ. Aa mu ŋai do taa a nɛò ŋa.

Kutai gontau

¹⁴ Na nŋu, iŋɛ woo yaako inɛ ŋau, iŋɛ iyi ì waa jɛ inɛ ngboi zamaau Zeruzalɛmu bɛ, i sotĩ i gbɔ idei Aɔ̃ Lafɛ̃ɛ ŋa.

¹⁵ Ì fɔ ì ni iŋɛ ì dĩ akabuu do iku ŋa. Ì dĩ akabuu do bi kuwai iku ŋa. Ì fɔ ì ni ŋa waati iyi wahala á na ku naa, kaa ba ŋɛ. Ì ni má ŋa iboi á jɛ bi kuwa nŋɛ, nɔ mii iyi kù jɛ ntɔi á jɛ bi ku manji nŋɛ.

¹⁶ Na ŋɔi í jɔ̀ Aɔ̃ Lafɛ̃ɛ í fɔ í ni, an jilɛ kutai icui ile Siɔ̃ɔ. Kutai iyi an jilɛò icui ileu kuta ku nɛ bɛɛrɛ gɔi iyi í nɛ gbugbã ntɔ ntɔ. Do nŋui an cɔò laakai nŋɛ. Inɛ iyi í dasim naanɛ, bɛɛbɛi nŋu mɔ á nɛ gbugbã dim dim.

¹⁷ Ntɔi á jɛ ikũ ku wã ileu nɔ dee dee ku jɛi á jɛ ikũ ku munga anu. Amma kutai ijĩi á gbangaa bi kuwa ibo nŋɛu ku nɛò, nɔ inyi mɔi á ko bi ku manji nŋɛu ku nɛò.

¹⁸ Waati bɛɛbɛ, akabuu nŋɛ iyi ì dĩ do ikuu ŋa á leekĩ, nɔ akabuu iyi í wa si gãmɛ nŋɛ do bi kuwai iku ŋau, kaa kɔ̃ má. Waati iyi wahala ku ce asɔɔu á to wa, á kɛkɛ ŋɛ ilɛi mam mam.

¹⁹ Waati iyi á na ku maa lɔ fei, á mu ŋɛi. Nɔ á ya lɔi daakɔ fei do dasã do idũ. Nɔ ibaɛ nŋu akã, á jɔ̀ njo ku mu ŋɛ.

²⁰ Nɔ waati bɛɛbɛ, daayi á baa ku kandaai hee bɛi inɛ kaa yɔkɔ ku sũ ku tɛ, nɔ acɔ ku bii mɔ ku kere bɛi inɛ kaa yɔkɔ ku biiò araɛ.

²¹ Aɔ̃ Lafɛ̃ɛ á dedei bɛi í ce si iri kutai Perasimu. Idɔɛ á kɔ̃i bɛi í ce si lɔɔmai Gabaɔ̃ɔ ku ba ku ce icɛɛ. Icɛu, icɛ titɔ̃i. Icɛɛu, icɛ gɔi iyi inɛ ŋa a kù nɛ dɔ̃ɔnɛɛ.

²² Na nŋu, nsɛi, i jɔ̀ inɛ ku yaako nŋɛ ŋau, ku ba a maà ti a famma kudĩ nŋɛ ŋau, domi ǹ gbɔ iyi Aɔ̃ Lafɛ̃ɛi lele do ilɛ í dasi idɔ nŋu ku ce nfei ilɛu fei.

Bisii woo logoo, bisii Ilaaɔ̃

²³ I sotĩ i gbɔ ide iyi ǹ wa n fɔ ŋa. I ce laakai nɔ i sotĩ i gbɔ idem ŋa.

²⁴ Inɛ iyi wa fa ilɛ ku ba ku gbɛ̃, í ya maa fa ilɛ hai maa tãi? Á so mii ku nyangaa fɔfɔ ku maa nyangaaò fɔfɔ hai maa tãi?

²⁵ Aawo. Í ya jɔ̀ ilɛɛ ku munga anui, nɔ ku fã dimi ŋa iyi à ya kpe nizɛli do kumɛ do bilee do iya do ɔɔzu. À ya dasi fei ndɛɛi tengi bii í jɔ, do bilee kulele si itĩ ŋau.

²⁶ Yaase bɛi Aɔ̃ Lafɛ̃ɛɛ í nyisiɛ ku too si do bɛi í kɔɔ si mbɛ.

²⁷ A ci ya nya yɔyɔi nizɛliu do isɔ ku gbe anu iyi kɛtɛ ŋa à ya maa fa ku maa bibiiu, nɔ a ci ya jɔ̀ kutɛi sarɛti ŋa mɔ a nɛ si antaii kumɛ a nyaò yɔyɔɛ. Amma nizɛli, do goloi à ya kpokpoɛò. Kumɛ mɔ do golo iyi kù lai à ya kpokpoɛò.

²⁸ A ci ya kpokpo bilee hee ku caa. À ya dĩaa kɛtɛ ŋa sarɛtii nɔ a jɔ̀ a nɛ si zaka bɛi kaa lɛgɛ.

²⁹ Kuce dimi bɛɛbɛ mɔ wa naai hai bi Aɔ̃ Lafɛ̃ɛi lele do ilɛ. Lasabui mii ŋa iyi í ce í jilɛ í ya mu inɛ biti. Lasabui mii ŋa ku mà ku ceɛ í la hee í caa.