Ezai 26 - Bibeli do fee

Ilu ku nɛ gbugbã iyi kulɔɛ í gaabu

¹ Waati bɛɛbɛ, si ilɛi Zudaa inɛ ŋa aa kɔ̃ irii a maa ni, à nɛ ilu iyi í nɛ gbugbã. Í jɔ̀ à ba faaba na idĩɛ ŋa do bindiɛ.

² I cĩ gambo ŋau ŋa, nɔ i jɔ̀ zamaa iyi í jɛ dee dee nɔ wa ceò dee dee ku jɛɛu icɛ ku lɔ wa.

³ Inɛ iyi wa leekĩ dim dim si lasabuɛ ŋa, awɔ Aɔ̃ Lafɛ̃ɛi ì ya jɔ̀ ku nɛ laakai ku sũ si na iyi í jɔ̀ awɔi í dasi naanɛ.

⁴ I dasi Aɔ̃ Lafɛ̃ɛ naanɛ hee do ajɔ fei ŋa, domi Aɔ̃ Lafɛ̃ɛi í jɛ kuta. Ntɔ ntɔ Aɔ̃ Lafɛ̃ɛi í jɛ kuta iyi í wɛɛ hee do ajɔ fei.

⁵ Nŋui í kita inɛ ŋa iyi à wa hee lele ŋa wa. Ilu iyi í wa hee leleu, nŋui í kitaɛ wa. Í kitaɛ wai hee ilɛ í jɔ̀ í naa í wa si sãa.

⁶ Nɔ à baa à waa tɛɛsɛɛ. Ilu are do hai nɛ gbugbã ŋai à waa tɛɛsɛɛ.

Kutɔɔi waatii ankãanyi ŋa

⁷ Kpãai inɛ dee dee í ya tɛi. Aɔ̃ Lafɛ̃ɛ, awɔ iyi ì tɛ, awɔi ì ya jɔ̀ kpãai inɛ dee dee ku munga anu.

⁸ Aɔ̃ Lafɛ̃ɛ, si kpãa iyi ì ni ka too fei, siɛi kpãa ku cɔ nwa í wa. Iyi à bi si idɔ nwai í jɛ ka maa tɔɔɛ.

⁹ Idũ, ǹ ya n bi i wɛɛi do amu. Ǹ ya n maa n dɛdɛɛi hee si lɛlɛi idɔm. Nɔ ijuukpã iyi ì fɔ ideɛu, bii ì jɔ̀ í naa si amanɛ ŋa, inɛi andunya ŋa à ya mà isɛɛnɛ ku cei si bɛi í jɔ.

¹⁰ Amma baa bii ì waa ce araarei ilu inɔ kukã ŋa, a ci ya dɛdɛ a mà iyi í jɛ dee dee. Baa si ilɛ bii inɛ ŋa à waa ce mii iyi í jɛ dee dee, laalɔi à ya maa ce. A ci ya yɛ kulai Aɔ̃ Lafɛ̃ɛ mɔm.

¹¹ Aɔ̃ Lafɛ̃ɛ, ì wu awɔɛ hee lele si ŋa, amma a kù waa yɔɔ mɔm. Aa yɛ kubi nla iyi ì nɛ na zamaaɛ, nɔ anyɔ ku mu ŋa. Do yaase bɛɛbɛ, inai á ce nfei mbɛɛɛ ŋau.

¹² Aɔ̃ Lafɛ̃ɛ, awɔi ì jɔ̀ laakai ku sũ wa naa si wa, domi mii iyi à waa ce fei, awɔi ì jɔ̀ wa kɔ̃ na iri nwa.

¹³ Aɔ̃ Lafɛ̃ɛ nwa, baai awɔ baasi, lafɛ̃ɛ mmu gɔ ŋa à kãmia wai. Amma awɔ akãi à bi ka maa tɔɔ.

¹⁴ Inɛ ŋau à ku, a kaa jĩ má, nɔ a kaa dede má. Ntɔ ntɔ awɔi ì naa ì na ì kpa iri nŋa. Nɔ mii iyi á jɔ̀ a ye gigi nŋa fei, ì kpa iriɛ.

¹⁵ Aɔ̃ Lafɛ̃ɛ, awɔi ì jɔ̀ zamaa nwa í la í kɔ̃ɔsi. Awɔi ì kɔ̃ɔsi zamaa nwa nɔ ì ba bɛɛrɛ. Awɔi ì tale kɔɔi ilɛ nwa ŋau fei.

¹⁶ Aɔ̃ Lafɛ̃ɛ, si inɔ kufɔ, awɔi inɛ ŋa à tɔɔ do imu lɛlɛ. Waati iyi ijuukpãɛ í naa si ŋa awɔi à tɔɔ.

¹⁷ Yaase bɛi waati iyi inaabo bãasĩ iyi wa bi ku bí, í ya wahala nɔ ku maa dɔ̃ anu do ara kuro ŋa, bɛɛbɛi awa mɔ à yɛ si wajuɛ wo Aɔ̃ Lafɛ̃ɛ.

¹⁸ Awa mɔ à yɛi bɛi inɛ ŋa iyi à nɛ asĩ nɔ à wahala. Amma waati iyi à na à waa bí, fufui à bí. A kù ce nkãma iyi á jɛɛa inɛi ilɛ ŋa faaba. Nɔ inɛi andunya ŋa a kù naa si kuwɛɛ.

Kujĩi iku ŋa do ijuukpãi laalɔ ŋa ku ce

¹⁹ Iŋɛ zamaam ŋa, inɛ nŋɛ ŋa iyi à ku ŋau aa nyi wa si kuwɛɛ má. Ikui inɛm ŋau, aa jĩ má. Na nŋu, iŋɛ iyi ì wa si sãau, aa dede nɔ aa dɔ̃ anu do inɔ didɔ̃ ŋa. Ntɔ ntɔ, Aɔ̃ Lafɛ̃ɛ á jɔ̀ ikpã nŋɛ ku yɛ bɛi inya kumá, nɔ ilɛ á jɔ̀ inɛ ŋa iyi à ku ŋau a ba kuwɛɛ má.

²⁰ Iŋɛ inɛm ŋa, i fa ara nŋɛ i koo i lɔ inɔ ile nŋɛ ŋa, nɔ i cĩmbo si ara nŋɛ gambo nŋɛ ŋau. I manji bɛ keeke titã ŋa hee idɔɔkɔ̃u ku lɔ,

²¹ domi Aɔ̃ Lafɛ̃ɛ í fita hai bi kuwaɛ ku ba ku kpã inɛi andunya ŋau iju na kurara nŋa. Ilɛ á jɔ̀ inɛ ŋa a yɛ njɛ iyi í ya tako ku maa bii wou, nɔ kaa singa inɛ ŋa iyi à tako à kpau má.