Ezai 25 - Bibeli do fee

Bi Aɔ̃ Lafɛ̃ɛi inɛ dee dee ŋau aa manji

¹ Aɔ̃ Lafɛ̃ɛ, awɔi ì jɛ Aɔ̃ Lafɛ̃ɛm. Awɔi an saabu n maa n fɔ jiida ku jɛɛ, nɔ an kɔ̃ iri n cĩɛ, domi ì ce mii jiida nla nla ŋa iyi ì dasi idɔ i ce hai ku kpɛ ŋau, nɔ à wɛɛi si agbɛ nŋa dim dim.

² Ntɔ ntɔ, ì jɔ̀ ilu nlau í baa í yɛ bɛi kuta ŋa iyi à tɔtɔɔ inya akã. Ilu ku nɛ gbugbãu í baa í kpɔò bomma. Bi kuwa ku nɛ gbugbãi ilu faau ŋau í lɛgɛ. Inɛ kãma kù wa bɛ má, a kaa nɔ a teese a maa má.

³ Na ŋɔi í jɔ̀ dimi iyi í jɛ ilu gbugbã wa saabuɛ. Nɔ ilui dimi ŋa iyi à waa taa inɛ ŋa gbugbãu à mà gbugbãɛ nɔ à waa jirimaɛ.

⁴ Ntɔ ntɔ, awɔi ì jɛ bi ku manjii hai nɛ gbugbã, nɔ ì jɛ bi ku manjii inɛ iyi í wa si inɔ kufɔ. Awɔi ì jɛ bi ku manji waati iyi ijĩ nla nla wa wɔ. Awɔi ì jɛ jĩjĩ si waatii inya gbãa. Ntɔ ntɔ, fufui amii inɛ laalɔ ŋa í yɛi bɛi ijĩ nla iyi wa fɛ si idĩ.

⁵ Do yaase bɛi ì ya leekĩ inya gbãai inunu si ilɛ bii nkãma ci ya fita, bɛɛbɛ mɔi ì leekĩ wakatai ilu faau ŋa. Nɔ do yaase bɛi kudũi ijĩ í ya bii inunu, bɛɛbɛ mɔi ì ya leekĩ iri ku kɔ̃i igũ ku jɛi ilu inɔ kukã ŋau.

Jingau iyi í jɛ ti zamaau fei

⁶ Aɔ̃ Lafɛ̃ɛi lele do ilɛ á cea zamaau fei jingau do sɔnda didɔ̃ ŋa si iri kutau ihɛ̃. Á ce jingaui do atɛ̃ vɛ̃ɛ ncɛɛ, do sɔnda didɔ̃ ŋa, do iŋa ku nɛ lompi, do atɛ̃ vɛ̃ɛ jiida iyi wa maaju ntɔ ntɔ.

⁷ Tengi bɛi á nya fuugɛsɛi inɔ kufɔ iyi wa bii zamaau, fuugɛsɛ iyi wa bii inɛi andunya fei.

⁸ Á leekĩ iku mɔi hee do ajɔ fei. Ilaaɔ̃ Lafɛ̃ɛ á gbã cikãajui waju ŋa fei. Á jɔ̀ anyɔ ku fita hai si inɛɛ ŋai si andunyau fei. Aɔ̃ Lafɛ̃ɛi í fɔ bɛɛbɛ.

Inɔ didɔ̃i Izirɛli do inɔ kufɔi Moabu

⁹ Waati bɛɛbɛ inɛ ŋa aa maa nii, nŋui í jɛ Lafɛ̃ɛ nwa. Siɛi kpãa ku cɔ nwa í wa, nɔ nŋui í faaba wa. Nŋui í jɛ Aɔ̃ Lafɛ̃ɛ, nŋu iyi à waa cɔ kpãaɛ. Ka wɛɛò inɔ didɔ̃, ka wɛɛò inɔ didɔ̃i faaba iyi í ce nwa.

¹⁰ Ntɔ ntɔ, awɔi Aɔ̃ Lafɛ̃ɛ í wa si iri kutau ihɛ̃, amma Moabu, aa tɛɛsɛɛi bɛi à ya jojo si fɔfɔ si inɔ isa a jɔ̀ ku ce taasi.

¹¹ Nɔ tengi bɛ, á maa fĩ ikpaɛ ŋai bɛi inɛ iyi wa cã awa. Amma Aɔ̃ Lafɛ̃ɛ í kaye faauɛu baa do kookaai ŋa iyi wa ce ŋau fei.

¹² Nɔ inya ku nɛ gbugbã iyi kulɔɛ í gaabu na idĩ kugbokaɛ ŋau, í lɛgɛɛ í bɔ ilɛ. Í kɛkɛɛi hee ilɛ í baa í ce sãa.