Ezai 24 - Bibeli do fee

Ilɛ í ce nfe mam mam

¹ Aɔ̃ Lafɛ̃ɛ á ce nfei ilɛ nɔ ku kaye zamaaɛu. Á fɔtɔtɔɛi nɔ ku fangaa amanɛ ŋa.

² Mii iyi á ba woo wee, nŋui á ba inɛ iyi kù jɛ woo wee. Mii iyi á ba inɛ iyi í nɛ aru, nŋui á ba aruu mɔ. Mii iyi á ba inaabo iyi í nɛ aru, nŋui á ba aru ama inaaboɛ mɔ. Mii iyi á ba woo ta, nŋui á ba woo ra mɔ. Mii iyi á ba inɛ iyi í kãayea inɛ gɔ, nŋui á ba inɛ iyi à kãayeau mɔ. Mii iyi á ba inɛ iyi í wɛ̃a inɛ gɔ, nŋui á ba inɛ iyi à wɛ̃aau mɔ.

³ Aa ce nfei ilɛui fei mam mam, nɔ a ko mii iyi í nɛ fei, domi bɛɛbɛi Aɔ̃ Lafɛ̃ɛ í fɔ.

⁴ Ilɛ í baa í yɛ bɛi í wa si inɔ kufɔ nɔ í gbɛɛji. Andunyau í yɛ bɛi í gbɛɛji nɔ í wũ. Inɛ nla nlai ilɛ ŋau fei, à baa à wũ.

⁵ Inɛ ŋa iyi à wa si ilɛu, à jɔ̀ ilɛu í so riisi, domi a kù jirima woodai Aɔ̃ Lafɛ̃ɛ ŋau, nɔ a kù ceò ikɔɛ ŋa iyi à ba icɛ. Akabuu hai nɛ kɔɔ iyi í wa si gãmɛi aŋaò Aɔ̃ Lafɛ̃ɛ ŋau, à jɔ̀ í leekĩ.

⁶ Na ŋɔi í jɔ̀ ikpe wa ce nfei ilɛu, nɔ inɛ ŋa iyi à wa si ilɛu à waa ba ijuukpãi kurara nŋa. Na ŋɔi í jɔ̀ inɛ ŋa iyi à gbe si ilɛu a kù kpɔ má.

⁷ Ŋɔi vɛ̃ɛ titɔ̃ í dasi inɔ kufɔ, nɔ jĩi ndii rezɛ̃ɛu wa gbɛ. Inɛ ŋa iyi à tako à wɛɛò inɔ didɔ̃ ŋau fei wo, à baa à waa weewea.

⁸ Iba didɔ̃i gãgã ŋau í leekĩ, nɔ anu ku dɔ̃i inɔ didɔ̃ ŋau fei í leekĩ. Imu didɔ̃i mɔɔlɔ ŋau mɔ í leekĩ.

⁹ Inɛ kãma ci ya mɔ vɛ̃ɛ ku maa kɔ̃ò iri má. Nɔ atɛ̃ ku nɛ gbugbã ŋa à baa à ro si gɛlɛi woo mɔ ŋau.

¹⁰ Ilu iyi inɛ ŋa à sa à nyɔu í kpɔò bomma. À cĩmbo kpasɛ̃ ŋau fei, nɔ inɛ kãma ci ya lɔ bɛ má.

¹¹ Inɛ ŋa à waa dɔ̃ anu si kpãa ŋa, si na iyi í jɔ̀ atɛ̃ vɛ̃ɛ í gaizia. Inɔ didɔ̃ fei í leekĩ. Ntɔ ntɔ, inɔ didɔ̃ í kpa irii si ilɛu.

¹² Iluu í baa í kpɔò bomma. Gamboɛ í lɛgɛ.

¹³ Ntɔ ntɔ, si ilɛu do si zamaau, í yɛi bɛi waati iyi à ka isoi jĩi ndii olivi fei sãa sãa hai si jĩi ndɛɛ. Walakɔ bɛi waati iyi à ka isoi rezɛ̃ɛ, si anyiɛ à bɛi à waa dɛdɛ iso ankãanyiɛ ŋa.

Inɔ didɔ̃ iyi í kpa iri anu akã

¹⁴ Inɛ ŋa iyi à wɛɛ si hunde ŋau, à waa dɔ̃ anu hee lele do inɔ didɔ̃. Hai do ikpa nunui alɛ, à waa dɔ̃ anu do inɔ didɔ̃ a naò Aɔ̃ Lafɛ̃ɛ bɛɛrɛ.

¹⁵ Na nŋu, iŋɛ inɛi ilɛi nunui daakɔ ŋau mɔ, i jɔ̀ i mà bɛɛrɛi Aɔ̃ Lafɛ̃ɛ ŋa. Iŋɛ iyi ì wa si gũngũm ŋau, i kɔ̃ iri i cĩ Aɔ̃ Lafɛ̃ɛi Izirɛliu ŋa.

¹⁶ Nɔ à waa gbɔ ibai iri ku kɔ̃ wa hai si andunya gonta mɛɛu wa ni, amboe ku jɛ ti Ilaaɔ̃ inɛ dee deeu. Amma amu ǹ fɔ ǹ wa n ni, ǹ nyɔ mbɛ, ǹ nyɔ mbɛ. Inɔ kufɔi í jɛ titom. Woo zamba ŋau à waa ce zamba. Ntɔ ntɔ, à waa ce zamba.

¹⁷ Iŋɛ inɛi ilɛ ŋa, mii iyi wa degbe ŋɛi í jɛ zigiida do isa do taao.

¹⁸ Inɛ iyi wa sa na ibai zigiidau, á dasi isai. Nɔ inɛ mɔ iyi wa fita wa hai inɔ isau, taaoi á muu, domi á yɛi bɛi à cĩ mii ŋa iyi à waa gɛɛ inyii leleu, nɔ icui ilɛ ŋau fei à waa yaga.

¹⁹ Ilɛ í la, wa yaga nɔ í cuku.

²⁰ Ilɛu í baa wa bibii bɛi woo mɔ atɛ̃, nɔ wa yaga bɛi ile kusu. Laalɔɛi wa wɔ̀ɔ. Á cuku mbɛ nɔ kaa dede má.

Kɔɔi bommai andunya ŋa do kusintii bommai Ilaaɔ̃

²¹ Waati bɛɛbɛ, Aɔ̃ Lafɛ̃ɛ á kpã gbugbãi lele ŋau ijui, nɔ si ilɛ ihɛ̃ mɔ, ku kpã ilaalui ilɛ ŋau iju.

²² Nɔ aa ko ŋai bɛi inɛi piisɔ̃ɔ ŋa a dasi ŋa si inɔ isa akã. Tengi bɛi aa cĩmbo ŋa. Nɔ si anyii ajɔ nkpɔ nkpɔ, aa kiiti ŋai.

²³ Cukpa á bitii, nɔ anyɔ ku mu inunu. Waati bɛɛbɛ, Aɔ̃ Lafɛ̃ɛi lele do ilɛ á jɛ bomma, si antaii iri kutai Siɔ̃ɔ do Zeruzalɛmu. Nɔ amboeɛ á maa daanai si wajui inɛ ngbo ŋau.