Ezai 23 - Bibeli do fee

Nfe ku cei Fenisi

¹ Idei ijuukpã iyi à fɔ si gãmɛi Tii wee. I dɔ̃ anu i weewea ŋa iŋɛ iyi ì wa si akɔi inyii Taasi ŋau, domi à lɛgɛ ilui Tii. Ile ŋa a kù wɛɛ má nɔ bi ku lɔ mɔ kù wɛɛ má. Hai gũngũm dii Kitimui à sɔ̃ ŋa laabaauu wa.

² I jɔ̀ i kpɔò dekĩ ŋa na zigiida, iŋɛ iyi ì wa itĩi tenkuu, iŋɛ woo nya sĩai Sidɔ̃ɔ ŋau, iŋɛ iyi ì ba amani do saabui inɛ ŋa iyi ì ya bɛ a ce isɛɛnɛ si tenkuu ŋa.

³ À ya naaò amaajɛi ilɛi Siɔ̃ɔ ŋa wai do akɔi inyi ŋa. Nɔ mii ŋa iyi à da hai si itĩi idoi Niliu, Sidɔ̃ɔi í ya jɛ aranfãaniɛ. Nŋui í jɛ ilɛ bii inɛ ŋa à ya naa aja ku nya.

⁴ Sidɔ̃ɔ, awɔ iyi ì jɛ inya ku nɛ gbugbãi tenku, jɔ̀ i wɛɛò anyɔ, domi tenku í fɔ í ni, n kù gbɔ ara kuro, n kù bí, n kù nɔ n kù bíi ama inɛmɔkɔ ŋa iyi à dede à ce awaasũ ŋa. Nɔ n kù bíi ama inaabo ŋa iyi à dede à ce mudɛ̃ɛ ŋa.

⁵ Waati iyi laabaauu á to si inɛi Ezibiti ŋau, aa maa yayai do njo bɛi waati iyi à gbɔ mii iyi í ba inɛi Tii ŋau.

⁶ I kua tenkuu i bɔ hee Taasi ŋa, nɔ i dɔ̃ anu i maa weewea ŋa iŋɛ inɛi gũngũm ŋau.

⁷ Ilu nŋɛ bii zamaa í ya maa ce ibau, nŋui ihɛ̃ bɛ? Iluu í wɛɛi wo hai ku kpɛ. Inɛi ilu ŋau à ya ce isɛɛnɛi wo a bɔ hee jĩijĩ a koo a buba bɛ.

⁸ Ilui Tiii í ya tako ku maa kpɛ̃a inɛ ŋa fulai amanlu ŋa wo. Amai ilaalu ŋai à jɛ woo ta iwoɛ ŋa do nkpɔ, nɔ woo nya sĩaɛ ŋa à wa si inɔi inɛ ŋa iyi andunya í mà bɛɛrɛ nŋa. Yooi í jilɛ idei nfe ku ceɛ.

⁹ Aɔ̃ Lafɛ̃ɛi lele do ilɛi í jilɛ ideu bɛ, ku ba ku kɛkɛ faaui inɛ ŋa iyi à bi mii iyi wa daana fei, nɔ ku kaye bɛɛrɛi inɛ ŋa iyi à nɛ bɛɛrɛ si andunyau ihɛ̃.

¹⁰ Tii, bɛbɛi logooi aa ya maa ce, domi icɛi bi ku leekĩi akɔi inyi ŋau kù wɛɛ má.

¹¹ Aɔ̃ Lafɛ̃ɛ í to awɔɛ wa si tenku, nɔ í jɔ̀ bomma ŋa à yaya. Í na wooda í jɔ̀ inya ku nɛ gbugbãi Kanaã ŋa à lɛgɛ.

¹² Nɔ í ni, i kaa maa mɔsi do jingauɛ ŋau má, Sidɔ̃ɔ, awɔ iyi ì yɛ bɛi ama inaabo iyi à bata do gbugbã. Dede i nɛ ikpa gũngũm dii Kitimu. Nɔ baa bɛ mɔ, i kaa nɛ kusĩmi.

¹³ Cɔ ilɛi inɛi Kaladee ŋau ihɛ̃, zamaaɛ kù wɛɛ má. Inɛi Asiri ŋa à fangaa ŋa à jɔ̀ ilɛ nŋa í baa í jɛ bi kuwai mɛɛmui gbaa ŋa. Inɛi Asiri ŋau à ma ile kugboka ŋa bii à ya gũ a maa cɔò ilu, nɔ à lɛgɛ kpasɛ̃ kusĩai Tii ŋau à jɔ̀ à baa à kpɔò bomma.

¹⁴ Na nŋu, i dɔ̃ anu i maa weewea ŋa, iŋɛ akɔi inyii Taasi ŋau, domi inya ku nɛ gbugbã nŋɛu í lɛgɛ.

¹⁵ Nɔ hai ajɔ nŋu bɛ, aa gbɛjɛ idei Tiii adɔ̃ kitaò fɛɛwa, zaka bɛi kuwɛɛi ilaalu í ya kpɛ ku to. Si kɔɔi adɔ̃ kitaò fɛɛwau, Tii á yɛi bɛi abo à ce sakara gɔ iyi à waa fɔ ideɛ si iri ku kɔ̃ gɔ iyi wa ni,

¹⁶ so mɔɔlɔɛ nɔ i nɛ si iluu i kaakoɛ awɔ abo à ce sakara iyi à gbɛjɛ ideɛ. Cãa ku ce ncɛɛ, nɔ i kɔ̃ iri nkpɔ nkpɔ ku ba a maa ye gigiɛ.

¹⁷ Si kɔɔi adɔ̃ kitaò fɛɛwau, Aɔ̃ Lafɛ̃ɛ á naa si ilui Tii. Waati bɛɛbɛ, á nyi ku ba kusãɛ má, nɔ ku maa mɔsi do sakaraɛu ku ce do bomma ŋa iyi à wa si andunyau fei.

¹⁸ Amma mii iyi á da do iyi aa sãau fei, ti Aɔ̃ Lafɛ̃ɛi á jɛ. A kaa koo a tɔtɔɔɛ, a kaa nɔ a ce kosĩaɛ, domi mii iyi á dau, ti inɛ ŋa iyi à wa si wajui Aɔ̃ Lafɛ̃ɛi á jɛ, ku ba ku jɛ sɔnda iyi á yo ŋa do ibɔ kusĩa ŋa.