Ezai 22 - Bibeli do fee

Ide iyi à waa sɔ̃ inɛi Zeruzalɛmu ŋa

¹ Idei ijuukpã iyi á na ku naa si lɔɔma iyi waliiu í ce kuyɛɛ wee. Awɔ Zeruzalɛmu, na mii í jɔ̀ zamaaɛ fei í gũ antaii ile sikifa ŋa.

² Na mii í jɔ̀ à waa gbɔ iba ŋa do wakata nla nla, do anu ku dɔ̃i inɔ didɔ̃ si iluu. Inɛɛ ŋa iyi à ku ŋau, kù jɛ taakubai í kpa ŋa, kù nɔ kù jɛ bi ku ce igũi à kpa ŋa.

³ Inɛ ngboi soogeɛ ŋau fei à sa. Woo ta afa ŋa à mu ŋa, nɔ à mu inɛi iluɛ ŋau fei baa do inɛ ŋa iyi à sa à nɛ hee jĩijĩ fei.

⁴ Na ŋɔi í jɔ̀ ǹ ni, i maa bitandi ara nŋɛ na irim ŋa. I jɔ̀ n kpata ŋa ntɔ ntɔ, nɔ i maà bitandi ara nŋɛ i maa dɛdɛ i lɛlɛɛm ŋa na wahala iyi í ba inɛm ŋau ihɛ̃.

⁵ Ntɔ ntɔ nnyi, Aɔ̃ Lafɛ̃ɛi lele do ilɛ í jɔ̀ inɔ kufɔ do zigiida do tɔtɔ ku fɔ í naa si wa. Si lɔɔma bii kuyɛu wa ce, bindi nla nla gɔ í cuku, nɔ à waa gbɔ anu ku dɔ̃i faaba ku tɔɔ ikpa iri kutau.

⁶ Soogei Elamu ŋau à waa kɔtɔ bioo nŋa do afa nŋa ŋa. Inɛ ŋa à wa si antaii sarɛtii igũ ŋa. Woo gũ acĩ ŋa mɔ à nɛ à waa naa, nɔ soogei Kii ŋau mɔ à waa ce sɔɔlui tɛli nŋa ŋa.

⁷ Zeruzalɛmu, lɔɔma kusĩaɛ ŋau fei à kɔ̃i do sarɛti ku ja igũ ŋa iyi acĩ ŋa à waa fa, nɔ sooge ŋau à naa à leekĩ anu koofaɛ do sɔɔlui igũ.

⁸ Iŋɛ inɛi Zudaa ŋa, i kù nɛ nkãma iyi á jɛ degbe nŋɛ má. Ajɔ nŋu bɛi ì sinda ì cɔ ikpa bi jĩnɛi igũ nŋɛ ŋa iyi à jilɛ si ile iyi à ya kpe ilei agbou.

⁹ Nɔ ì yɛ foo nkpɔ nkpɔ iyi à ce si bindii ilui Davidiu ŋa. Ì jɔ̀ inyi iyi wa cãu wa lɔ si bi ku gɛɛ inyi iyi ì ceu ŋa.

¹⁰ Ì ka kpasɛ̃i Zeruzalɛmu ŋau ŋa, nɔ ì lɛgɛ gɔgɔ ŋa ku ba i teese i mua bindiu gbugbã ŋa.

¹¹ Nɔ ì teese ì ce bi ku gɛɛ inyiu mmuɛ má ŋa si afei idĩ minji ŋau na inyi iyi í wa bi ku gɛɛi takou ku maa lɔ si bɛ. Amma i kù sinda waju nŋɛ wa ŋa ikpa bi Ilaaɔ̃ nŋu iyi í jɛ icui fei ndɛɛ. Wa ce sɔɔluɛi hai ku kpɛ, amma i kù yɔɔ ŋa.

¹² Aɔ̃ Lafɛ̃ɛi lele do ilɛ í kpe ŋɛ ajɔ nŋu í ni i kpata nɔ i maa weewea ŋa. I wa iri nŋɛ ŋa, nɔ i we saaki ŋa i nyisiò inɔ kufɔ nŋɛ.

¹³ Amma iŋɛ, inɔ didɔ̃ nla nlai ì wɛɛò ŋa. Kɛtɛ ŋa do angudã ŋai ì kpa ì waa ŋɔ ŋa. nɔ ì waa mɔ atɛ̃ vɛ̃ɛ ŋa. Ì fɔ ì waa ni ŋa, ka jɛ ka mɔ, domi ala aa ka kui.

¹⁴ Na nŋu, Aɔ̃ Lafɛ̃ɛi lele do ilɛ í sɔ̃m do kugbasi í ni nŋu kaa kpa kurara nŋɛu bɛ hee i koo i kuò ŋa.

Sebuna akawe nlau á kua icɛɛ

¹⁵ Aɔ̃ Lafɛ̃ɛi lele do ilɛ í sɔ̃m í ni, koo i ba Sebuna inɛ ngbo woo ce icɛ si inɔ kabai ilaaluu i beeɛ i ni,

¹⁶ baa yoomai í jɛ titɛɛ si afeu ihɛ̃, mà yooi ì nɛ ihɛ̃ iyi í jɛ nyaanzeɛ ì bɛi ì waa tu balɛ ihɛ̃. Ì waa tuaa araɛ balɛ si antaii kutau. Ì waa tuaa araɛ bi kuwa si kutau.

¹⁷ Aɔ̃ Lafɛ̃ɛ á soɛi ku nyɔɛ do gbugbã, nɔ á dĩɛi dim dim.

¹⁸ Á taleɛi ku jɔ̀ i bimbili bɛi bale si bantuma ku cĩ gɔ. Tengi bɛi aa ku, tengi bɛi sarɛti ku ja igũ kusĩaɛ ŋau aa wa, awɔ iyi ì kpa bɛɛrɛi kpasɛ̃i lafɛ̃ɛɛu.

¹⁹ Aɔ̃ Lafɛ̃ɛ í ni, an nyaɛi hai si inɛ ngbo ku jɛɛ. An nyaɛi hai si icɛɛ.

²⁰ Ajɔ nŋu bɛi an kpe Eliakimu woo ce icɛm amai Hilikiyau wa.

²¹ Nŋui an daa si ibɔ sisɔ iyi ì ya dasi i ceò icɛu, nɔ n dĩaa kungbãɛu si gbankili, nɔ n so gbugbãɛu n naa. Nŋui á jɛ baai inɛi Zeruzalɛmu ŋa do baai inɛi bommai Zudaa ŋa.

²² Nŋui an na kileei kabai bommai Davidi. Bii í cĩ gambou, inɛ kãma kaa cĩmboɛ, nɔ bii í cĩmboɛ, inɛ kãma kaa cũu.

²³ An kpakpaɛi bɛi kɛkɛ si inya iyi í nɛ gbugbã dim dim. Nŋui á jɛ inɛ iyi á jɔ̀ kpasɛ̃i baaɛ ku nɛ bɛɛrɛ.

²⁴ Mii iyi í jɛ asoi kpasɛ̃i baaɛ fei, siɛi aa kɔa ŋa. Aa kɔa ŋai bɛi à ya kɔa jɛɛ ku ce saalu ŋa, do jɛɛ nantaa ŋa, hee ku koo si jɔlɔ ŋa fei.

²⁵ Nɔ Aɔ̃ Lafɛ̃ɛi lele do ilɛ í ni má, ajɔ akã aa nya kɛkɛ iyi à kpakpa si inya ku nɛ gbugbã dim dim nɔu. Aa kɛkɛɛi nɔ ku cɛ, nɔ aso iyi à kɔa siɛu fei ku lɛgɛ. Aɔ̃ Lafɛ̃ɛi í fɔ bɛɛbɛ.