Ezai 21 - Bibeli do fee

Kucukui Babilɔni

^1-2 Idei ijuukpã iyi à fɔ si gãmɛi gbaa iyi í wa kɔkɔi tenku wee. Ezai í ni, ǹ ce kuyɛ ku nɛ zigiida gɔ. Si kuyɛu, ǹ yɛ mbɛɛ wa naa hai do ikpa gbaa wa hai ilɛ bii à waa ce njoɛu wa. Wa naai do yaase bɛi fufu dabii ŋa à ya dede, nɔ a too do ikpa Negɛbu a lɔò. Ǹ yɛ woo zamba inɛu wa ce zamba, nɔ woo ce nfei inɛu mɔ wa ce icɛɛ. [Nɔ ǹ gbɔ ide ku fɔ gɔ iyi wa ni,] Inɛi Elamu ŋa, i lɔ si ŋa ŋa. Inɛi Mɛɛdi ŋa, i bù ilu nlau koe ŋa. Nɔ Aɔ̃ Lafɛ̃ɛ í ni má, ǹ kpa irii faauɛu feii mbɛ.

³ Na ŋɔi í jɔ̀ ǹ wa n gbɔ ara kuro si bũum ŋa. Ara kurou í mum nii bɛi ara kuroi inaabo iyi wa bi ku bí. Mii iyi ǹ wa n gbɔ, wa mum biti, nɔ mii iyi ǹ wa n yɛ mɔ í jɔ̀ njo wa mum.

⁴ Laakaim í dede, nɔ zigiida í naa sim. Ǹ wa n tamaa bɛi bii alɛ í lɛ fufu á tam nii, amma alɛu í kpaasii í jɛɛm zigiida.

⁵ Ŋɔi à teese à jilɛ taabu, à tɛsi acɔ, nɔ à jɛ à waa mɔ. Ŋɔi à gbɔ anu ku dɔ̃ anu akã à ni, sooge ŋa, i dede, i so jĩnɛi igũ nŋɛ ŋa.

⁶ Aɔ̃ Lafɛ̃ɛ í sɔ̃m wo í ni, koo i jilɛ inɛ gɔ iyi á maa degbe ku maa cɔ, nɔ ku fɔ mii iyi á na ku yɛ.

⁷ Ŋɔi í yɛ sarɛti ku ja igũ ŋa iyi acĩ ŋa à waa fa. Nɔ í yɛ inɛ ŋa si antaii gbankɛlɛ ŋa, do si antaii kpookpo ŋa. Nɔ í cɔ ŋa do laakai, í cɔ ŋai do laakai ntɔ ntɔ.

⁸ Ŋɔi í dɔ̃ anu í ni, lafɛ̃ɛ, si ajɔu fei, ǹ wa n leekĩi si antaii ile kugbokau, nɔ bɛɛbɛ mɔi ǹ leekĩ má tengi bii ǹ wau waatii idũu fei ǹ wa n cɔ ilu.

⁹ Ŋɔi gbakã í yɛ inɛ gɔ wa naa si antaii sarɛti ku ja igũ iyi acĩ ŋa à waa fa. Inɛɛu í dɔ̃ anu wa ni, Babilɔni í cuku, í cuku. Iwɛ̃ɛ ŋau fei, à cuku, à lɛgɛ ŋa fei mam mam.

¹⁰ Iŋɛ inɛm ŋa, iŋɛ iyi à kpokpo bɛi à ya kpokpo amaajɛ ŋa si bantuma bi ku kpokpom nɔu, ide ŋa iyi ǹ gbɔ hai bi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi Izirɛlii ǹ sisi nŋɛ bɛ.

Zaka iwoi idũ í dũ í to

¹¹ Idei ijuukpã iyi à fɔ si gãmɛi Duma wee. Ŋɔi ǹ gbɔ anu ku dɔ̃ gɔ wa hai ikpa Seii wa ni, woo wɔ njoo, zaka iwoi idũ í dũ í to.

¹² Ŋɔi woo wɔ njoou í ni, iju wa má wa, amma ilu í kɔ̀ wa kuku. Nɔ bii ì bi n jɛ nŋɛ má, i nyi wa si waati mmu.

Inɛ ŋa iyi à waa sa hai Dedãa do Kedaa

¹³ Idei ijuukpã iyi à fɔ si gãmɛi ilɛi Arabi. Iŋɛ inɛi Dedãa ŋa iyi ì waa ce isɛɛnɛ ŋau, aa na i koo i maa sũ si inɔ sakoi Arabi ŋau ŋa.

¹⁴ Iŋɛ iyi ì wa Temaa ŋa, i bu inyi i koo i na inɛ ŋa iyi agbɛ wa kpa ŋau ŋa. Nɔ inɛ ŋa iyi à waa sa ŋau mɔ, i koo nŋa mii ku jɛ ŋa.

¹⁵ Inɛ ŋau à waa sai na taakuba, na taakuba iyi nkãma kù waa gɛɛ, na bioo iyi à katee na iri nŋa, na igũ iyi wa gbãa.

¹⁶ Ntɔ ntɔ Aɔ̃ Lafɛ̃ɛ í sɔ̃m í ni, hai ihɛ̃ ku bɔ adɔ̃ akã cau cau, yiikoi Kedaa fei á kpa iri.

¹⁷ Nɔ woo ja igũ ŋa iyi à mà afa ku ta ŋa iyi aa gbea Kedaa a kaa kpɔ má. Ide iyi Aɔ̃ Lafɛ̃ɛi inɛi Izirɛli ŋau í fɔ mbɛ.