Ezai 20 - Bibeli do fee

Ezai wa dabii hai nɛ ibɔ do baata

¹ Si adɔ̃ iyi Saagɔ̃ɔ ilaalui Asiri í bɛ inɛ iyi í jɛ inɛ ngboi sooge ŋa Asidodi koo ce igũ si ŋa nɔ ku gba iluu,

² waati bɛɛbɛi Aɔ̃ Lafɛ̃ɛ í ba Ezai amai Amɔɔsu ide ku fɔ í ni, koo bɔ ibɔ iyi ì dasiu, nɔ i bɔ baataɛ hai si kutɛɛ ŋa. Ŋɔi í ce bɛɛbɛ, nɔ wa nɛ basĩ hai nɛ baata.

³ Ŋɔi Aɔ̃ Lafɛ̃ɛ í ni, adɔ̃ mɛɛta wai ihɛ̃ iyi Ezai woo ce icɛm nɔu wa nɛ basĩ nɔ kù waa dasi baata. Iyi bɛi í jɛ nyinda iyi wa nyisi mii iyi á na ku ce si ilɛi Ezibiti do si ilɛi Etiopi.

⁴ Bɛɛbɛ mɔi ilaalui Asiri á nɛò inɛ ŋa iyi á mu hai ilɛi Ezibiti do hai ilɛi Etiopiu. Á mu awaasũ ŋai do mɔkɔ ngbo ŋa basĩ hai nɛ baata. Nɔ fiti nŋa ku wɛɛ ngbɛ. Nɔ iyi bɛ anyɔ nla nlai á jɛaa inɛi Ezibiti ŋau.

⁵ Nɔ aa wai si zigiida do si anyɔ nla nla na inɛi Etiopi ŋa si bii kpãa ku cɔ nŋa í wau do si Ezibiti iyi à waa kaabau.

⁶ Ajɔ nŋu bɛi inɛ ŋa iyi à wa itĩi tenkuu aa fɔ a maa ni, cɔ mii iyi í ba inɛ ŋa iyi à waa kaaba ŋau, aŋa iyi à waa tamaa bɛi aa jɛ kpãa ku cɔ nwa mbɛ do faaba nwa ku ba ka fita hai si awɔi ilaalui Asiriu. Bɛirei aa ka ce ka ba faaba bɛbɛi.