Ezai 2 - Bibeli do fee

¹ Laabaau iyi Ezai amai Amɔɔsu í ba wa hai bi Aɔ̃ Lafɛ̃ɛ si gãmɛi bommai Zudaa do ilui Zeruzalɛmu wee.

Zamaai andunyau fei á naa Zeruzalɛmu

² Awaati wa naa iyi iri kuta si bii kpasɛ̃i Aɔ̃ Lafɛ̃ɛ í wau, á na ku gboka ku re iri kuta ŋa fei. Á wai hee antaii geete ŋa fei, nɔ inɛ ŋa aa ya naa bɛ mái nkpɔ nkpɔ.

³ Ntɔ ntɔ dimi nkpɔ nkpɔi á maa koo bɛ nɔ aa sɔ̃ njɛi a maa ni, i naa wa ŋa ka gũ iri kutai Aɔ̃ Lafɛ̃ɛ, kpasɛ̃i Aɔ̃ Lafɛ̃ɛi tɔkui Zakɔbu ŋau. Tengi bɛi á kɔ wa si kpãaɛ ŋa, do bɛi aa ka tooɛ, domi hai Siɔ̃ɔi woodaɛ á fita wa, nɔ hai Zeruzalɛmui ideɛ wa naa.

⁴ Nŋui á jɛ woo kiitii ilɛu fei, nɔ nŋui á kiiti zamaau fei. Taakuba nŋa ŋai aa so a ceò sɔɔku ŋa, nɔ kaka nŋa ŋa mɔi aa so a ceò kɔɔma ŋa. Ilɛ gɔ kaa bɔ igũ si ilɛ mmu gɔ má, nɔ inɛ kãma kaa maa kɔkɔ igũ ku ce má.

⁵ Iŋɛ tɔkui Zakɔbu ŋa, i naa wa ŋa ka nɛ si inya kumái Aɔ̃ Lafɛ̃ɛ.

Ajɔi Aɔ̃ Lafɛ̃ɛ, ajɔi kiiti

⁶ Aɔ̃ Lafɛ̃ɛ, ì fũsi inɛɛ ŋa awɔ aŋa iyi à jɛ tɔkui Zakɔbu ŋau, domi woo ce alisi ŋa iyi à naa hai nunui daakɔ ŋau à waa kɔ̃i bi tu ŋa. Woo ce dobu dobu ŋa à waa kɔ̃ bɛi bi inɛi Filisi ŋa. Nɔ à dĩ akabuu do dimi mmu ŋa.

⁷ Wura do isɔ fũfũ do amani iyi a kaa yɔkɔ a ka, wa kɔ̃ si ilɛɛ. Acĩ ŋa do sarɛti ku ja igũ ŋa mɔ à waa kɔ̃i a kaa yɔkɔ a ka ŋa.

⁸ Bɛɛbɛ mɔi iwɛ̃ ŋa à waa kɔ̃ si ilɛu, nɔ inɛ ŋa à ya maa gulɛ nŋa. Mii ŋa iyi aŋa taka nŋa à ce do awɔ nŋai à ya maa gulɛa.

⁹ Na ŋɔi í jɔ̀ inɛ fei á gulɛ, nɔ ku kaye araɛ, amma Aɔ̃ Lafɛ̃ɛ, maà ce nŋa suuru.

¹⁰ I koo i manji inɔ isa ŋa do si isai kuta ŋa ku ba i saa idɔɔkɔ̃i Aɔ̃ Lafɛ̃ɛ ŋa, do kulai amboeɛ iyi í re fei.

¹¹ Waati bɛɛbɛ, inɛ iyi wa cɔ araɛ hee lele, á baaò ijuɛ wa ilɛi. Ilu faau mɔ í nɛ ku gulɛi, domi ajɔ nŋu bɛ, inɛ fei á jɛsi iyi Aɔ̃ Lafɛ̃ɛ nŋu akãi í jɛ inɛ nla.

¹² Aɔ̃ Lafɛ̃ɛi lele do ilɛ fei í nɛ ajɔ iyi í jilɛ si bii á kiiti inɛ ŋa iyi à waa tamaa aŋa à la à re inɛ fei ku ba ku kaye ŋa.

¹³ Ajɔ nŋu, á kaye hee do jĩi ndii sɛɛdii Libãa ŋa iyi à gboka ntɔ ntɔui, do jĩi ndii sɛnii Basãa ŋa mɔ.

¹⁴ Hai iri kuta ŋa iyi à gboka ntɔ ntɔ ŋau, hee do geete ŋa iyi à re kpaasi ŋa iyi à gbe ŋau fei,

¹⁵ hai ile kugboka ntɔ ntɔ ŋau, do bindi ku nɛ gbugbã ŋa iyi aa gaabu ku lɔ ŋau fei,

¹⁶ hai akɔi inyi nlai ilui Taasi ŋau do akɔi inyi kusĩa ŋau fei.

¹⁷ Inɛ ŋa iyi à waa cɔ ara nŋa hee lele ŋau fei, á baaò ŋa wai hee ilɛ, nɔ ilu faau ŋau mɔ fei, á jɔ̀ a gulɛi, domi ajɔ nŋu bɛ, inɛ fei á jɛsi iyi Aɔ̃ Lafɛ̃ɛ nŋu akãi í jɛ inɛ nla.

¹⁸ Nɔ waati bɛɛbɛ, iwɛ̃ ŋau fei aa kpa irii mam mam.

¹⁹ Inɛ ŋa aa sai a koo a maa dɛ bi ku manji si inɔ isa ŋa do si isai kuta ŋa na idɔɔkɔ̃i Aɔ̃ Lafɛ̃ɛ do kulai amboeɛ iyi í wa si antaii mii fei waati iyi á na ku dede nɔ ku naaò zigiida wa si ilɛ.

²⁰ Ajɔ nŋu bɛ, iwɛ̃ ŋa iyi inɛ ŋa à ce do isɔ fũfũ, do iyi à ce do wura ŋa, nɔ à ya maa sɛɛbata nŋau, fei ndɛɛ aa dikãa boli ŋa do adã ŋai.

²¹ Aa sai a maa lɔ inɔ isa ŋa do si isai kuta ŋa na idɔɔkɔ̃i Aɔ̃ Lafɛ̃ɛ do kulai amboeɛ iyi í wa si antaii mii fei waati iyi á na ku dede nɔ ku naaò zigiida wa si ilɛ.

²² Na nŋu, i fɛò amanɛ ku dasi naanɛ ŋa. Bɛɛrɛ yoomai amanɛ í nɛ. Kuwɛɛi amanɛ fufui.