Ezai 19 - Bibeli do fee

Inɔ kufɔ nla nla iyi í ba inɛi Ezibiti ŋa

¹ Idei ijuukpã iyi à fɔ ideɛ si gãmɛi inɛi Ezibiti ŋa wee. Aɔ̃ Lafɛ̃ɛ í gũ antaii kudũi ijĩ gɔ iyi í nɛ wa gbãa. Ezibitii wa naa. Ŋɔi iwɛ̃i inɛi Ezibiti ŋau à waa yaya do njo si wajuɛ. Idɔi inɛi Ezibiti ŋa í dede nɔ à kua gbugbã.

² Aɔ̃ Lafɛ̃ɛ í ni nŋu á kosi inɛi Ezibiti ŋaui aŋa duusɔ̃ɔ. Ifɔ do igbã ŋai aa ya maa ja do njɛ. Kpaasi mɔ do kpaasi. Nɔ ilu do ilu aa ya maa ja do njɛi. Bomma mɔ do bomma.

³ Í ni inɛi Ezibiti ŋau aa kua gbugbã, nɔ nŋu á fɔtɔtɔi lasabu nŋa ŋai. Waati bɛɛbɛ, aa koo a maa ce kubeei bi iwɛ̃ nŋa ŋa do bi woo ce alisi ŋa iyi à ya bee iku ŋa ide, walakɔ bi inɛi inɔɔko ŋa.

⁴ Aɔ̃ Lafɛ̃ɛi lele do ilɛ í ni nŋu á so Ezibitii nŋu ku dasiɛ si awɔ gbugbãi lafɛ̃ɛ kugaabu ŋa. Ilaalu ilu inɔ kukã gɔi á kãmiaɛ.

⁵ Inyii tenku á gbɛi, nɔ ti ido nlau mɔ á gbɛi mam mam.

⁶ Inyii ido nla ŋau fei aa bɛjɛi. Inyii amaawɔi idoi Nili ŋau aa kayei nɔ a gbɛ a maa baa. Jĩi wɛwɛɛ ŋa iyi à wa bɛu do njee ŋau fei aa na a gbɛi.

⁷ Fɔfɔi Nili ŋa iyi à wa si itĩɛ ŋau, do mii ŋa iyi à gbɛ̃ si itĩi idoi Niliu fei, aa na a gbɛi, aŋa fei fufu à so ŋai ku nɛò ŋa.

⁸ Sɔɔkɔ ŋa aa maa weeweai, inɔ kufɔ nla nlai á jɛ ti woo le kootia si inɔ Nili ŋau fei. Nɔ inɛ ŋa mɔ iyi à waa le taao si inyi ŋau aa nɛ inɔ kufɔ.

⁹ Nɔ inɛ ŋa mɔ iyi à ya ce icɛ do dimii ikũ ku nɛ gbugbã ŋau aa wɛɛò inɔ kufɔ. Inaabo ŋa mɔ iyi à waa ce icɛi ikũu, do inɛmɔkɔ ŋa iyi à waa ceò acɔ ŋau fei aa wɛɛò inɔ kufɔ.

¹⁰ Inɛ ŋa iyi à jɛ gbugbãi ilɛu, aa kua gbugbã, nɔ inɛ ŋa mɔ iyi à waa ba kusã nŋa hai si bɛ ŋau fei, aa wɛɛò inɔ kufɔi.

¹¹ Ilaalui Soãa ŋau, nnyɛi ŋai. Inɛ ŋa mɔ iyi à jɛ ilu laakai woo kɔi ilaalu Faraɔ̃u, igbɛi nnyɛi ŋai. Bɛirei í ce ì jɛ ì waa sɔ̃ Faraɔ̃ ì waa ni ŋa iŋɛ amai ilu laakai ŋai, amai ilaalui tako ŋai.

¹² To, hee iwoi ilu laakaiɛ ŋau à wa. Jɔ̀ a sɔ̃ɛ mɛɛ nɔ i mà mii iyi Aɔ̃ Lafɛ̃ɛi lele do ilɛ í dasi idɔ nŋu ku cea Ezibiti.

¹³ Ilaalui Soãa ŋau sũmu ŋai, nɔ ti Nɔfu ŋau mɔ, lasabu nŋa í fɔtɔtɔ. Aŋa iyi à jɛ inɛ ngboi dimii ŋau bɛi à waa dasi Ezibiti ku nyɔu bɛ.

¹⁴ Aɔ̃ Lafɛ̃ɛ í jɔ̀ hundei iju ku cĩ í naa si anini nŋa ku ba inɛi Ezibiti ŋau a nyɔ si kuce nŋa ŋau fei. Aa yɛi bɛi inɛ iyi atɛ̃ wa kpa, nɔ í tu nɔ í sinda í yɔɔgɔ si ituɛu.

¹⁵ Hai lele hee ku baa ilɛ si zamaau, inɛ kãma kù wɛɛ iyi á ce ngɔgɔ iyi í jɛ jiida si ilɛi Ezibiti.

Kuwɛɛi alai Ezibiti

¹⁶ Ajɔ nŋu bɛ, inɛi Ezibiti ŋa aa yɛi bɛi inaabo ŋa. Aa maa yayai do njo waati iyi aa yɛ Aɔ̃ Lafɛ̃ɛi lele do ilɛ í wu awɔɛ wa si ŋa.

¹⁷ Ilɛi Zudaa á baa ku jɛaa Ezibiti mii ndii zigiidai. Waati iyi à na à kpe iriɛ bi tu ŋa fei, njo á ya mu ŋai na lasabu iyi Aɔ̃ Lafɛ̃ɛi lele do ilɛ í ce na iri nŋa.

¹⁸ Waati wa naa iyi ilu miiui á wa si ilɛi Ezibiti iyi aa maa fɔ feei Kanaã, nɔ aa ce kugbasii a ni Aɔ̃ Lafɛ̃ɛi lele do ilɛi í jɛ Lafɛ̃ɛi aŋa. Akãi ilu ŋau aa kpooi ilui inunu.

¹⁹ Waati bɛɛbɛ, aa cea Aɔ̃ Lafɛ̃ɛ bi kuweei si aninii ilɛi Ezibiti, nɔ aa gũaa kuta gɔi kɔkɔi kɔɔi ilɛu.

²⁰ Nŋu bɛi á jɛ nyinda do sɛɛda iyi Aɔ̃ Lafɛ̃ɛi lele do ilɛ í wa si ilɛi Ezibiti. Nɔ waati iyi inɛi Ezibiti ŋa aa dɔ̃ siɛ anu a tɔɔɛ faaba na inɛ ŋa iyi à waa ta nŋa gbugbã ŋau fei, á bɛ nŋa woo faaba wai iyi á naa ku gba ŋa hai si awɔ nŋa.

²¹ Aɔ̃ Lafɛ̃ɛ á jɔ̀ inɛi Ezibiti ŋau a màa. Aa ya ce kuwee ŋai a maa tɔɔɛò, nɔ aa ya cea amua ŋa. Aa ya cea kuwã ŋa, nɔ aa ya ceò icɛ.

²² Waati iyi Aɔ̃ Lafɛ̃ɛ á cã inɛi Ezibiti ŋa ku mɛɛ ŋa ku tã, á nyi ku jɔ̀ a ba iri má. Aŋa taka nŋa aa sinda a nyi wa bi titɛɛ. Á gba kutɔɔ nŋa nɔ ku jɔ̀ a ba iri.

²³ Waati bɛɛbɛ, kpãa á na ku wɛɛ hai Ezibiti hee ku bɔ Asiri. Inɛi Asiri ŋa aa ya bɔ Ezibiti, nɔ inɛi Ezibiti ŋau mɔ aa ya bɔ Asiri, nɔ ajɔi aa ya tɔɔ Aɔ̃ Lafɛ̃ɛ.

²⁴ Ajɔ wa naa si bii Izirɛlii do Ezibiti do Asiri aa ce anu akã. Hai do bi tu ŋai Aɔ̃ Lafɛ̃ɛ á weea inɛi andunya ŋa.

²⁵ Aɔ̃ Lafɛ̃ɛi lele do ilɛ á weei ku ni, kuwee ku jɛ ti inɛi Ezibiti inɛm ŋa do ti Asiri nŋu iyi í jɛ icɛi awɔm do ti Izirɛli nŋu iyi í jɛ tubum.