Ezai 18 - Bibeli do fee

Ide iyi à waa sɔ̃ inɛi Etiopi ŋa iyi à bɛ si ilɛ mmu

¹ Inɔ kufɔi í jɛ titɛɛ Etiopi, awɔ ilɛ iyi ì nɛ akɔi inyi ŋa iyi à ya dĩ si acɔ minji. Akɔi inyiɛ ŋau à ya wai itĩi idoɛ ŋau.

² Awɔi ì ya maa bɛ inɛ ŋa iyi à ya lɔ akɔi inyi ŋa iyi à ce do njee a ceò isɛɛnɛ nŋa si idoi Nili. Woo bɛɛ ŋau à gbãa, nɔ ì ya sɔ̃ ŋai i ni a sinda a bɔ bi inɛ ŋa iyi à gboka ŋa nɔ batai ara nŋa wa daanau, bi dimi ŋa iyi zigii inɛ ŋa wa daò ŋa hai ihɛ̃ hee ku bɔ kɔɔi andunyau, bi aŋa iyi à jɛ dimi ŋa iyi à nɛ gbugbã iyi à ya ce nfei mbɛɛ nŋa ŋau. À ya sɔ̃ inɛ ŋaui a ni, i sinda i nyi ilɛ nŋɛ iyi ido ŋa à kpɛ̃u.

³ Iŋɛ inɛi andunya ŋa fei, iŋɛ iyi ì wa si ilɛu ihɛ̃, waati iyi aa na a gũ tuuta si iri kuta ŋau ŋa, i sinda i cɔ, nɔ i maa de itĩ ŋa waati iyi aa na a fã kuu.

⁴ Ntɔ ntɔ Aɔ̃ Lafɛ̃ɛ í sɔ̃m í ni, hai lele bi kuwam, amu Aɔ̃ Lafɛ̃ɛ ǹ leekĩ sɛ̃ɛ ǹ wa n cɔ mii iyi wa ce fei do laakai. Ǹ yɛi bɛi inya gbãa nla nla iyi wa naa hai si inunu, walakɔ bɛi ikpã iyi í yɛ bɛi kudũi ijĩ si waatii inya gbãai amaajɛ ŋa ku da.

⁵ Wee hee a maa da amaajɛ ŋa, waati iyi jĩi ndii rezɛ̃ɛ í da koko í tã, waati iyi kokou í baa í ce iso ŋa, nɔ í jĩa, à ya da amaawɔ ŋa iyi a kù ce ncɛɛ ŋaui do iyi à ce wua ngbɛ ngbɛ ŋau a nyɔ ŋa.

⁶ À ya nyɔ fei ndɛɛ bɛi ku jɛ sɔndai yembeeku ŋa iyi à wa si iri kuta ŋau do ti mɛɛmui sako ŋa. Sɔndai yembeeku ŋaui á jɛ sukui kokoo, nɔ ku jɛ ti mɛɛmui sako ŋa sukui jɛadɔ̃.

⁷ Waati bɛɛbɛ, zamaau, aŋa iyi à jɛ inɛ kugboka ŋa nɔ batai ara nŋa wa daanau, aŋa iyi inɛ ŋa à waa ce njo nŋa hee kɔɔi ilɛu, aŋa iyi à jɛ ilu gbugbã ŋa nɔ à ya tɛɛsɛ mbɛɛ nŋa ŋa, aŋa iyi ido ŋa à kpɛ̃ ilɛ nŋau, aa naaò amua ŋau wai si iri kutai Siɔ̃ɔ tengi bii Aɔ̃ Lafɛ̃ɛi lele do ilɛ í wau.