Ezai 17 - Bibeli do fee

Kucukui bommai Damasi do ti Izirɛli

¹ Idei ijuukpã iyi à fɔ si gãmɛi Damasi wee. Ntɔ ntɔ, Damasi kaa na ku jɛ ilu nla nla má. Á na ku baa ku kpɔò bommai.

² Aa fũsi ilui Aroɛɛ ŋau awɔi. Mɛɛmu gaa ŋai aa jɔ̀a. Tengi bɛi aa ce bi kuwa nŋa ŋa, nɔ inɛ kãma kaa bitandi ŋa.

³ Bommai Efaraimu kaa nɛ bindi ku nɛ gbugbã ŋa má. Ilɛi Damasi kaa nɛ ilaalu má. Aɔ̃ Lafɛ̃ɛi lele do ilɛ í ni, bɛɛrɛi inɛi Siri iyi à gbe ŋau, kaa re ti inɛi Izirɛli ŋa.

⁴ Ajɔ á na ku naa si bii bɛɛrɛi tɔkui Zakɔbu ŋa á na ku kaye, nɔ bɛi à nɛ kaato, aa baa a gbɛi.

⁵ Á yɛi bɛi waati iyi à da amaajɛ à tɔtɔɔɛ si icuɛ, nɔ woo muu í wasi amaajɛ ŋau ku mu. Á yɛi má bɛi waati iyi à waa fengee amaajɛ si lɔɔmai inɛi Refaimu ŋau.

⁶ Inɛi Izirɛli ŋa iyi aa gbe, a kaa kpɔ. Aa yɛi bɛi jĩi ndii olivi iyi iso iyi í gbeaa kù re minji walakɔ mɛɛta hee lele. Si amaawɔi ilɛ ŋau mɔ, iso mɛɛ ku bɔ miiu. Amu Aɔ̃ Lafɛ̃ɛi ǹ fɔ bɛɛbɛ.

⁷ Ajɔ nŋu bɛ, amanɛ á wu ijui ku cɔ ikpa bi woo takaɛ nŋu iyi í jɛ Inɛ Kumái Izirɛliu.

⁸ Ijuɛ kaa maa wa ikpa bi ku ce kuwee ŋa iyi à jɛ icɛi awɔɛ ŋau má, nɔ kaa maa cɔ jĩi iyi í gũ na iwɛ̃ɛ Asera do bi ku jo tuae iyi í ce do awɔɛ ŋau má.

⁹ Ajɔ nŋu bɛ, aa fũsi ilu nla ku nɛ gbugbãi Izirɛli ŋau awɔi bɛi à tako à fũsi ilu nlai inɛi Hɛvi ŋau do ti inɛi Amɔre ŋau awɔ si waati iyi inɛi Izirɛli ŋau à waa naa si ŋau. Ilui Izirɛli ŋau mɔ aa baa a jɛ gbaai.

¹⁰ Ntɔ ntɔ iŋɛ inɛi Izirɛli ŋa, ì gbɛjɛ Aɔ̃ Lafɛ̃ɛ nŋɛ iyi í faaba ŋɛ. I kù waa ye gigii kuta ku nɛ gbugbã nŋɛ. Na ŋɔi í jɔ̀ ì waa lɔa iwɛ̃ ŋa jĩi ŋa iyi á sĩa nŋa si, nɔ ì waa gbɛ̃ dimi ŋa iyi aa jɛ bɛɛrɛi iwɛ̃ ŋau.

¹¹ Ajɔ iyi ì lɔ ŋa ŋau, ajɔ nŋu bɛi mɔi à dede à la. Daakɔu bɛ mɔi mii ŋa iyi ì gbɛ̃ ŋau à ce koko ŋa. Amma amaajɛ nŋɛ ŋau à tãi si waatii bɔ̃ɔ. Nɔ nŋui í baa í jɛ wahala nŋɛ iyi kù nɛ ku tã.

Anu ku dɔ̃i zamaau

¹² Zamaa nkpɔ nkpɔ wa dɔ̃ anu bɛi ibai tenku ŋa. Zamaa nkpɔ nkpɔu wa ce ibai bɛi ibai inyi nla nla ŋa.

¹³ Zamaa nkpɔ nkpɔu wa ce ibai bɛi ibai inyi nla nla ŋa. Aɔ̃ Lafɛ̃ɛ í la si ŋa, nɔ à sa à waa nɛ hee jĩijĩ. Í lele ŋai bɛi fɔfɔ wɛwɛɛ ŋa iyi fufu wa tale hai si iri kuta ŋa, do bɛi ilulu iyi í dede na fufu dabii nla gɔ iyi í dede.

¹⁴ Bii alɛ í lɛ, zigiidai í ya naa. Hee iju ku maa má, kãma nŋa ci ya wɛɛ má. Iyi bɛi í jɛ mii iyi á ba inɛ ŋa iyi à waa ce asɔɔi mii ndu wa ŋau, nɔ à ko ndu ŋa à waa nɛòu.