Ezai 16 - Bibeli do fee

Moabu wa tɔɔ sobii Zeruzalɛmu

¹ I sambaa inɛ iyi í jɛ inɛ ngboi ilɛu ama angudã wa. Aa sambaɛ wa ŋai hai Sela, nɔ aa too ŋai do ikpa bi gbaau ku bɔ si iri kutai Siɔ̃ɔu.

² Inaaboi Moabu ŋa à sai à kua acãi inyii Aanɔɔ. Inaabo ŋau à yɛi bɛi yɛi ŋa iyi à jɔ̀ à sa à fangaa hee jĩijĩ hai bi antɛ nŋa.

³ Inɛi Moabu ŋa à waa tɔɔ inɛi Zeruzalɛmu ŋa à ni, i mu nwa ikɔ, nɔ i ce lasabu ŋa si gãmɛ nwa. I jɔ̀ jĩjĩ nŋɛ ku bii si wa si waatii dasã bɛi idũ. I singa woo sa nwa ŋau, i maà zamba ŋa ŋa.

⁴ I jɔ̀ inɛ nwa ŋa, inɛi Moabu ŋa iyi à waa sa ŋau a wa bi tu ŋɛ. I jɔ̀ a manji bi tu ŋɛ na woo ce nfei inɛu. Nɔ bii waatii ijuukpãu í naa í leekĩ, waati iyi gbugbã ku taa inɛu á na ku leekĩ, nɔ inɛ iyi wa ce nfei ilɛu í nɛ,

⁵ bommau á nyi ku ba gbugbã mái na saabui jiida ku jɛ. Nɔ waati bɛɛbɛ inɛ mmu gɔ iyi í jɛ tɔkui Davidii á buba si bommau do dee dee ku jɛ. Inɛ nŋu á jɛ woo kiiti iyi lasabuɛ í wa si mii iyi í tɛ, nɔ á jɛ inɛ iyi á ya bi mii iyi í jɛ dee dee.

Zeruzalɛmu kaa yɔkɔ ku sobi Moabu si nkãma

⁶ [Ŋɔi inɛi Zeruzalɛmu ŋau à ni,] à gbɔ baaui faaui inɛi Moabu ŋa. Faau nŋa í la hee í caa. Ara ku so nŋa do inɛ ku donda nŋa mɔ í caa. À gbɔ baaui idɔɔkɔ̃ nla nŋa do fufu ku tɔɔ nfe nfe nŋa ŋa.

⁷ Amma nsɛi inɛi Moabu ŋau à wasi ku weewea si njɛ. À waa kpata na Kii-Haresɛti iyi í cuku mam mam hee ilɛ.

⁸ Jĩi ŋa iyi à wa Hɛsebɔ̃ɔ ŋau mɔ à kpa ŋa, nɔ inɛ ngboi ilɛ ŋau à kpa jĩi ndii rezɛ̃ɛ jiida ŋa iyi à wa Sibuma ŋau. Jĩi ŋau à bɔi hee Yazɛɛ, nɔ à fitai bii fei si gbaau. Amaawɔ nŋa ŋa à sɔi hee à kua tenku.

⁹ Na ŋɔi í jɔ̀ an kpata bɛi inɛi Yazɛɛ ŋa na jĩi ndii rezɛ̃ɛi Sibuma ŋau. An kpatai hee cikãajum ku cã ilɛ na irii iŋɛ inɛi Hɛsebɔ̃ɔ do Eleale ŋa, domi anu ku dɔ̃i igũ í naa si amaajɛ nŋɛ ŋa iyi ì waa da do iyi ì waa mu ŋa.

¹⁰ Inɔ didɔ̃ kãma kù wa si ikoi jĩi nɔu má. Nɔ si inɔ jĩi ndii rezɛ̃ɛ ŋau, iri ku kɔ̃ do inɔ didɔ̃ do akpɛ kãma kù wa si má. Woo fɔ̃ inyii isoi jĩi ndii rezɛ̃ɛ ŋau, kù waa fɔ̃ɔ si dangala ŋau má. Ǹ jɔ̀ anu ku dɔ̃i inɔ didɔ̃ fei í leekĩ.

¹¹ Na ŋɔi í jɔ̀ ǹ wa n yaya na irii inɛi Moabu ŋa bɛi mɔɔlɔ iyi à waa cã, nɔ idɔm í wa si inɛi Kii-Haresɛti ŋa.

¹² Bii inɛi Moabu ŋa à naa, nɔ à gbɛɛji si geetei bi ku ce kuweeu ku gũ, nɔ à to ilei iwɛ̃ nŋa bɛ ku ba a ce kutɔɔ, a kaa yɔkɔ a ba nkãma.

¹³ Ide iyi Aɔ̃ Lafɛ̃ɛ í fɔ mbɛ hai ku kpɛ si gãmɛi Moabu.

¹⁴ Nsɛi bɛbɛi, ide ŋa iyi Aɔ̃ Lafɛ̃ɛ wa fɔ wee. Í ni, hai nsɛi ku bɔ adɔ̃ mɛɛta cau cau, amboei inɛi Moabu ŋa á baa ku jɛ yaako. Baa do kulai zamaau fei, inɛ ŋa iyi à gbe ŋau, a kaa jɛ nkãma má, nɔ a kaa nɛ bɛɛrɛ kãma.