Ezai 15 - Bibeli do fee

Walii iyi à ce si gãmɛi Moabu

¹ Idei ijuukpã iyi à fɔ si gãmɛi ilɛi Moabu wee. Ntɔ ntɔ si idũ akãi à ce nfei ilui Aa-Moabu nɔ í kpa iri. Ntɔ ntɔ si idũ akãi à ce nfei ilui Kii-Moabu nɔ í kpa iri.

² Ŋɔi à bɔ Bayiti do Dibɔ̃ɔ si geete bi ku ce kuwee ŋau à koo à kpata. Nɔ Moabu wa kpata wa weewea si Nebo do si Medeba. Ŋɔi à gbogoo iri nŋa ŋa fei, nɔ à wa agbã nŋa ŋa mɔ fei.

³ Ŋɔi à dasi jĩnɛ ŋa iyi à ce do saaki ŋa à nyisiò inɔ kufɔ nŋa à bɛi à bɔ si kpãai inɔ ilu ŋau. Inɛ gɔ ŋa à waa leekĩ si antaii sikifai ile ŋa, nɔ inɛ gɔ ŋa à wa si bantumai iluu. Aŋa fei à wasi ku weewea nɔ à waa kpata.

⁴ Inɛi ilui Hɛsebɔ̃ɔ do Eleale ŋa à wasi ku dɔ̃ anu. À waa gbɔ anu ku dɔ̃ nŋau wa hai bɛ hee ku naa Yahasi. Na ŋɔi í jɔ̀ woo ja igũi Moabu ŋau à wasi ku dɔ̃ anu, nɔ à wɛɛò inɔ kufɔ.

⁵ Ŋɔi ǹ dɔ̃ anu ǹ wa n tɔɔ faaba na inɛi Moabu ŋau. Inɛɛ ŋau à sa à waa nɛ hee Soaa, do hee Egalati-Selisia. Ŋɔi à koo à waa gũ geetei Luhiti do kukpata, nɔ à wasi ku dɔ̃ anui inɔ kufɔ si kpãai Horonaimu,

⁶ domi inyii idoi Nimurimu í gbɛ, nɔ fɔfɔ ŋa mɔ à gbɛ. Jĩi ŋa iyi à nɛ wua tũtũ ŋau à gbɛ. Fɔfɔ tũtũ boogu kù wɛɛ má.

⁷ Na ŋɔi í jɔ̀ à ko mii iyi í gbe nŋa à waa nɛò hee do alalai acãi inyi iyi í nɛ jĩi ŋau.

⁸ Nɔ inɛ ŋa à waa gbɔ anu ku dɔ̃ nŋaui bii fei si ilɛi Moabu. À waa gbɔ weewea nŋaui hee Egalaimu do hee Bɛɛ-Elimu.

⁹ Inyii idoi Dimɔɔ í kɔ̃i do njɛ. Nɔ Aɔ̃ Lafɛ̃ɛ í ni, an nyi n jɔ̀ wahala titɔ̃ mmuɛ ku naa si Dimɔɔ má. An jɔ̀ muusu nla gɔ ku naa si inɛi Moabu ŋa iyi à gbe ŋau, do si mii iyi í gbe si ilɛ nŋau.